106
Xoossay Gita, Iya Galatite
1 Godaa galatite!
I keeha gidiya gishonne
iya siiqoy merinaasa gidiya gisho,
Godaa galatite.
2 Goday oothida wolqaama ooso odanaw,
woyko iya galataa ubbaa qoncisanaw
danda7ey oonee?
3 Pirdaa naageysatinne
ubba toho xillobaa ootheysati anjetidaasaata.
4 Abeeti Godaw, neeni ne asaas keehiya wode tana qopa;
enta neeni ashshiya wode tana alla.
5 Hessika ne doorida asaa dichaa ta be7ana mela,
ne asaa ufaysan taani ufaytana melanne
ne asaara issife taani galatana melasa.
6 Nuuni nu aawatada nagara oothida;
nu balida; iitabaa oothida.
7 Nu aawati Gibxen de7iya wode,
malaalsiya ne oosuwa qopibookona.
Ne siiquwa darotethaa enti hassaybookona;
Zo7o abba matan iya bolla makallidosona.
8 Gidoshin, I ba sunthaa gisho,
ba gita wolqaa erisanaw enta ashshis.
9 I Zo7o abba kiittin, abbay melis;
mela biittara kanthidi aadhiyada,
ciimmo giddora enta kaalethidi pinthis.
10 I enta ixeyisata kushepe ashshis;
morketa kushepe enta wozis.
11 Enta morketa haathay mittis;
entafe issoyka attibeenna.
12 He wode enti iya ufaysa qaala ammanidosona;
iya mazmuren sabboosona.
13 Gidoshin, enti I oothidaba dogidosona;
I zoriya ogiya naagidi baanaw dosibookona.
14 Mela biittan de7ishe daro amotidosona;
mela biittan Xoossaa paacidosona.
15 Enti woossidaysa I immis;
shin iita harge enta giddo kiittis.
16 Mela biittan dunkaanen de7ishe Musenne
Godaas dummatida Aarona qanaatidosona.
17 Biittay dooyetidi Daatane mittis;
Abeero iya keetha asaara moogis.
18 Enta maabara giddon tami eexis;
lacoy he iita asata xuuggis.
19 Koreeba zuman worqafe
mara misile medhidosona;
he misiliya goyinnidosona.
20 Enti, banta boncho Xoossa
maata miya mehe misilen laammidosona.
21 Enti Gibxen gita ooso oothidanne
entana ashshida Xoossaa dogidosona.
22 Kaama biittan oosetida malaalsiyabanne
Zo7o Abban hanida malaata oothidaasaa.
23 Hessa gisho, Xoossay enta dhaysana gis;
shin dhaysonna mela iya hanqo zaaranaw,
Xoossay doorida Musey giddon eqis.
24 Hessafe guye, enti
iya qaala ammanonna gisho,
he lo77o biitta kadhidosona.
25 Enti banta dunkaaniya giddon zuuzumidosona
Godaa qaalas kiitetibookona.
26 Hessa gisho, I enta bazzon yegganaw,
ba kushiya denthidi caaqis.
27 Enta kochaa kawotethata giddon,
yegganawunne biitta bolla laallanaw caaqis.
28 Hessafe guye, enti Bi7eel-Fagoora eeqa goyinneysatara issife gahetidosona;
shempoy bayna eeqatas yarshetida yarshuwa midosona.
29 Banta oosuwan Godaa hanqethidosona;
hessa gaason enta giddon iita hargey wodhis.
30 Shin Pinihaasi dendidi,
enta nagaraa pirdin,
iita hargey enta bollafe kichis.
31 Hessika, iyaw, yeletethaafe yeletethaa gakanaw
merinaw xillotetha gididi taybetis.
32 Mariba pultuwa matan Godaa hanqethidosona;
enta gaason Muse bolla metoy gakis.
33 Enti iya yiloyidosona;
Muse doonape bessonna qaalay keyis.
34 Goday dhaysite gin,
enti Kanaane asata dhaysibookona.
35 He palabaape, enti he asatara
walaketidosona;
enta de7o woga kaallidosona.
36 Xoossa asati enta eeqa goyinnidosona;
hessi entaw xihe gidis.
37 Enti banta addenne macca nayta
tuna ayyaanatas yarshidosona.
38 Enti xillo suuthu Kanaane eeqatas yarshidi,
banta addenne macca nayta suutha gussidosona;
he suuthan biittay tunis.
39 Hessada enti banta ooson tunidosona;
banta hanotan banta layma kessidosona.
40 Hessa gisho, Godaa hanqoy
iya asaa bolla eexis;
I ba laata shaatetis.
41 I enta allaga kushen aathidi immis;
enta morketi enta haaridosona.
42 Enta morketi enta un7ethidosona
banta shenen enta aysidosona.
43 I enta daro wode ashshis;
shin enti banta makalla aggonna ixidosona;
banta nagaraa gaason dhayidosona.
44 Gidoshin, I enta waasuwa si7is;
enta waayiya qopis.
45 I enta gisho, ba ufaysa qaala hassayis;
ba siiquwa daruwan enta maaris.
46 Enta di77ida ubbay,
entaw qadhetana mela oothis.
47 Nuuni ne geeshsha sunthaa galatana mela
Abeeti Godaw, nu Xoossaw, nuna ashsha.
Ne bonchuwan nu ceeqetana mela,
kawotethata giddofe nuna shiisha.
48 Isra7eele Goday, Xoossay,
merinaape merinaa gakanaw galatetto!
Asa ubbay, “Amin7i” yaago.
Godaa galatite!