1 Ta ishato, taani odey higge eriya asatasa. Higgey issi asi paxa de7iya wode ubban iya haarees. 2 Leemisos, azina gelida maccasiya I azinay paxa de7iya wode higgen iyara qashetasu. Shin I azinay hayqiko iyara iya caaqida caaqoy iyo haarenna. 3 Hessa gisho, iya ba azinay paxa de7ishin, hara adde geliko, iya laammidaaro geetetawusu. Shin I azinay hayqiko, caaqoy iyo haaronna gisho iya hara azina geliko, iya laammidaaro geetetuku.

4 Hessa gisho, ta ishato, hinte Kiristoosa asatethaa baggara higge wolqaas hayqidi, Xoossaas ayfe ayfanaw hayqope dendida Kiristoosas gidideta. 5 Nu asho amoy nuna haarin, nu de7iya wode higgey guji nagara oothana mela nuna denthethees. Nu asatethaa giddon iita amotethi de7iya gisho nuuni hayqo ayfe ayfana mela oothis. 6 Shin ha77i nuuni nuna qachida higgiyas hayqida gisho nuuni higge qashope biletida. Hessa gisho, Geeshsha Ayyaana ogen Xoossaas kiitetosipe attishin, xaafetida cima higgiyas kiitetoko.

7 Yaatin, nuuni woyganee? Higgey ba huuphen nagaree? Gidenna! Shin higgey nagari aybeko tana erisis. Higgey, “Amotofa” goonnako, amotethi aybeko taani erike.Kessa 20:17; Zaare 5:21. 8 Shin ta ubbaba amottana mela nagari higge baggara tanan oge demmis. Higgey bayneko nagari hayqidaysa.

9 Kase higgey bayna wode ta paxa, shin higgey imetida wode nagari paxin ta qassi hayqas. 10 Taani de7on daana mela Xoossay immida higgey taw hayqo ehis. 11 Nagari higge baggara tana cimmiya ogiya demmidi, wodhis.Medhe 3:13.

12 Hessa gisho, higgey geeshshi; iyan xaafetida kiitayka geeshshi, xillonne lo77o.

13 Yaatin, lo77o gididabay ta bolla hayqo ehideyee? Gidenna! Shin nagari nagara gideysi qoncana mela lo77oban maaddetidi taw hayqo ehis. Hessa gisho, nagara nagaratethay higge baggara aadhidi eretis.

14 Nuuni higgey ayyaanaba gideysa eroos. Shin taani nagaras bayzetida asho asi. 15 Taani oothiyaba akeekike; taani dosiyaba oothanaysa aggada ta ixiyaba oothayis.Gala 5:17. 16 Taani ixiyaba oothiya gidiko, higgey lo77o gideysa ta ma7ayis. 17 Hessa gidiko, he oosuwa tanan de7iya nagaray oothaysipe attishin, ta oothike.

18 Tanan, hessika ta ashuwan lo77obay baynaysa erayis. Lo77oba oothiya amotethi tanan de7ees, shin lo77oba oothanaw danda7ike. 19 Taani ixiya iitabaa oothaysipe attishin, ta dosiya lo77oba oothike. 20 Taani ixiyaba oothiya gidiko, hessa tanan de7iya nagaray ootheesipe attishin, oothey tana gidike.

21 Hiza, ta lo77oba oothanaw dosishin, iitabaa oosoy woga gideysa demmas. 22 Taani ta wozanan Xoossaa higgiyan ufaytayis. 23 Shin ta asatethaa giddon de7iya ta qofaa higgiyara oletiya dumma higge be7ayis. He higgey ta asatethaa giddon oothiya nagara higgiyas tana aylle oothidi immis. 24 Taani waanida yibbata asee? Hayqos efiya ha asatethafe tana ashshanay oonee? 25 Nu Godaa Yesuus Kiristoosa baggara tana ashshiya Xoossaas galatay gido.

Hiza, taani ta qofan Xoossaa higgiyas haaretayis; shin ta asatethan tana nagara oosisiya higgiyas haaretayis.