1 Hessa gisho, Kiristoos Yesuusan de7eysati ha77i pirdetokona. 2 Kiristoos Yesuusa baggara nuus de7o immiya Geeshsha Ayyaana higgey, tana nagaranne hayqo higge aylletethaafe kessis. 3 Nu nagara asatethaa gaason, higgey daaburancho gidiya gisho nuna ashshanaw danda7ibeenna. Xoossay ba na7aa nagarancho asa leemison nagaras yarsho gidana mela kiittidi hessa oothis. Yaatidi, Xoossay Kiristoosa ashuwa baggara nagara, nagarancho asa giddon pirdis. 4 Xoossay hessa oothiday, nu asho amoy koyeysada gidonashin, Geeshsha Ayyaanay koyeysada de7iya nu bolla higgiya xillo kiitay poletana melasa.

5 Banta asho amuwa kaallidi de7eysati bantana ufaysiyabaa qopoosona. Shin Geeshsha Ayyaana shenen de7eysati Geeshsha Ayyaana ufaysiyabaa qopoosona. 6 Nu qofay asho amos haaretiko hayqo ehees, shin ayyaana amos haaretiko de7onne sarotethi ehees. 7 Asho amos haaretiya asi Xoossaa higgiyas kiitetanaw koyonna gishonne kiitetanaw danda7onna gisho, Xoossara morke. 8 Banta asho amuwas haareteysati Xoossaa ufaysanaw danda7okona.

9 Shin Xoossaa Ayyaanay hintenan de7ikonne hintena haariko, hinte Ayyaana shenen de7eetape attishin, hinte asho amuwas haareteketa. Kiristoosa Ayyaanay bayna oonika Kiristoosaba gidenna. 10 Shin Kiristoosi hintenan de7iko, hinte asatethay nagara gaason hayqidaysa. Shin hinte ayyaanay xillotethaa gaason de7on de7ees. 11 Shin Yesuusa hayqope denthida Xoossaa Ayyaanay hintenan de7iko, Kiristoosa hayqope denthida Xoossay, hintenan de7iya ba Geeshsha Ayyaanan hayqiya hinte asatethaas de7o immana.2 Qoro 3:16.

12 Hiza, ta ishato, nuuni nu asho amuwa kaallidi daanaw bessenna. 13 Hinte, hinte asho amuwas de7iko hayqana, shin Geeshsha Ayyaana wolqan nagara oosuwa wodhiko hinte de7on daana. 14 Xoossaa Ayyaanay kaalethiya ubbay Xoossaa nayta. 15 Nuuni, “Abbaa, ta Aawaw” yaagidi xeegiya, Xoossaa nayta oothiya Geeshsha Ayyaana ekidaape attishin, zaaridi yashshan daanaw aylle oothiya ayyaana ekibooko.Mar 14:36; Gala 4:6. 16 Xoossaa Ayyaanay nu ayyaanara gididi nuuni Xoossaa nayta gideysa markatees. 17 Nuuni iya nayta gidiko Xoossaa anjuwa laattana; Kiristoosara wolla he anjuwa laattana. Qassi nuuni Kiristoosara metuwa ekiko iyara wolla iya bonchuwan shaaketana.

18 Nuuni ha77i waayetiya waayiya, sinthafe nuus qoncana bonchuwara gathi be7iko, ginisanaw danda7etenna gada qopayis. 19 Medhetetha ubbay Xoossaa nayta qoncethaa daro laamotidi naagoosona. 20 Medhetetha ubbay hada gidis; hessika, medhetetha dooron gidonashin, ufaysan naagana mela oothida Xoossaa shenen hanis.Medhe 3:17-19. 21 Medhetethay ba huuphen dhayo aylletethaafe wozetidi, Xoossaa naytara wolla boncho la77a shaaketana. 22 Medhetethay issife hanno gakanaw iqethi oykida maccasada ooleninne un7an de7eysa nu eroos. 23 Qassi hessa medhetetha xalaala gidonashin, Geeshsha Ayyaana bayra imotada ekida nuuni, nu huuphen nu asatethaas wozo gidida Xoossaa nayta gidana ufaysaa naagishe nu asatethan oolos.2 Qoro 5:2-4. 24 Ha ufaysan nuuni attida. Shin nuuni ufaysi oothiyabay bentiya gidiko hessa ooni ufaysi oothii? 25 Shin nu be7onnaba demmana gidi ufaysan naagiko hessa danda7an naagoos.

26 Hessada Geeshsha Ayyaanay nu daaburan maaddees. Nuuni Xoossaa waati woossanaw bessiyako eroko, shin Geeshsha Ayyaanay ba huuphen, asi odanaw danda7etonna qaalan nuus gaannatees. 27 Qassi asa wozana eriya Xoossay Geeshsha Ayyaana qofay aybeko erees. Geeshsha Ayyaanay Xoossaa sheniyada geeshshatas gaannatees.

28 Xoossaa siiqeysatasinne iya sheniyada xeegetidaysatas Xoossay ubbaa lo77os ootheysa eroos. 29 Xoossay koyrottidi eridaysati ba Na7aa daanana melanne na7ayka ammaneyisata giddon bayra gidana mela enta dummayidi wothis. 30 Xoossay koyrottidi dummayidaysata xeegis; he xeegidaysata xillisis; he xillisidaysata qassi bonchis.

31 Yaatin, nu ha ubbaas woyganee? Xoossay nu bagga gidiko nuura oone eqetanay? 32 I hari attoshin, ba na7aas qadhetonnashin, nu gisho aathidi immis. Yaatin, ba na7aa nuus aathidi immidaysi waanidi ubbaba coo immennee?

33 Xoossay entana xillisida gisho I dooridaysata oone mootanay? 34 Yaatin, enta bolla pirdanaw danda7ey oonee? Oonika baawa. Hayqope dendidi Xoossaa ushachan uttida, Kiristoos Yesuusi, I nuus gaannatees.

35 Hiza, nuna Kiristoosa siiquwape shaakanay oonee? Waayeye woyko metoye woyko goodeye woyko kosheye woyko kallotetheye woyko yashsheye woyko oleyee? 36 Geeshsha Maxaafan,

37 Shin nuuni, nuna siiqida Kiristoosan ha ubbaa polo xoonos.

38 Hessa gisho, hayqo gidin de7o gidin kiitanchota gidin haareyisata gidin ha77i de7eysa gidin sinthafe yaanaysa gidin wolqaamata gidin, 39 salo wolqaa gidin sa7a wolqaa gidin ay medhetethi gidin nu Godaa, Kiristoos Yesuusan de7iya Xoossaa siiquwape nuna shaakanaw danda7onnaysa taani eras.