11
Xoossi Isra7eeleta Aggibeenna
1 Ane ta oychayis: yaatin, Xoossay ba asaa aggideyee? Aggibeenna! Taani ta huuphen Isra7eele; Abrahaame sheeshi; Biniyaame koche.Filphi 3:5. 2 Xoossay koyro doorida ba asata yeggenna. Geeshsha Maxaafan, Eeliyaasi Isra7eeleta Xoossaa sinthan waati mootidaako, hinte ereketii? 3 Eeliyaasi, “Godaw, enti ne nabeta wodhidosona, ne yarsho bessaaka laallidosona. Ta tarka attas; enti tanaka wodhanaw koyoosona”1 Kawo 19:10, 14. yaagis.
4 Xoossay iyaw woygidi zaaridee? “Ba7aale geetetiya eeqas goyinniboona laapun mukulu asaa taw ashshas”1 Kawo 19:18. yaagis.
5 Hessadaka, ha wodiyan Xoossay ba aadho keehatethan doorida guutha Isra7eeleti de7oosona. 6 I enta dooriday ba aadho keehatethanaape attishin, enta ooson gidenna. Dooroy ooson gidiko, iya aadho keehatethay tuma aadho keehatethi gidenna.
7 Yaatin, waanidee? Isra7eeleti banta koyaba demmibookona, shin Xoossay doorida guuthati demmidosona. Attidaysati banta wozanaa muumisidosona. 8 Hessika, Geeshsha Maxaafan,
“Enti banta ayfiyan be7onnaada
banta haythan si7onnaada,
hanno gakanaw entaw
Xoossay azalla ayyaana immis”Zaare 29:4; Isa 29:10.
geetetidi xaafetidaysada hanis. 9 Qassi Dawiti,
“Enti miya gaytay enta xiheda oyko;
enta gufanthiya aafo gido;
enta iitatethay enta bolla gako.Maz 69:22-23.
10 Enti xeellonnaada enta ayfey goozeto;
ubba wode meton enti kuunidi de7o” yaagis.
11 Yaatin, Ayhudeti zaari dendonna mela kundidonayee? Gidenna! Enta kundethay Ayhude gidonna asay attana mela gaaso gidis. Hessika Ayhudeti enta bolla qanaatanaada oothis. 12 Ayhudeta nagaray alamiyas daro anjo ehis; qassi enta kundethay Ayhude gidonna asaas daro anjo gidis. Yaatin, dooretida Ayhudeti kumethi attiya wode anjoy ay mela darandeesha!
13 Taani, ha77i hintew Ayhude gidonna asaas odayis. Ayhude gidonna asaas hawaare gidada ootheysan taani daro ceeqetayis. 14 Ta hessa oothiday taw ashon koche gidida Isra7eeleta qiiroyada entafe guuthata ashshanaasa. 15 Xoossay enta yeggida wode, ha alamey Xoossara sigetis. Xoossay enta shiishi ekiya wode hayqida asi hayqope dendida mela gidees.
16 Koyro menthida baso uythay Xoossaas yarshetidi geeshshi gidiko, muume uythayka geeshshi. Mithas xaphoy geeshshi gidiko, tasheyka geeshshi. 17 Gaden tokida shamaho tashe gidida Ayhudeti karetin, hinte bazzon dolida shamaho tashe gidida Ayhude gidonnaysati enta bessan dhanthetidi enta anjuwanne duretetha shaaketideta. 18 Hiza, hinte tasheda karetidi wodhida Ayhudeta bolla otortofite. Hinte otortiyaba gidiko, xaphoy hintena tookesipe attishin, hinte xaphuwa tookonnaysa akeekite.
19 Neeni, “He tasheti karetiday, ta enta bessan dhanthetana melasa” gaanaw danda7aasa. 20 Hessi tuma. Enti ammanibona gisho karetidosona. Neeni ammanida gisho he bessan eqadasa. Neeni yayyanaw besseesipe attishin, otoranaw bessenna. 21 Xoossay medhon tashe gidida Ayhudetas qadhetonna ixiko hintewuka qadhetenna.
22 Hiza, Xoossay ay mela keehekonne ay mela yashshiyako be7a. I yashshey kiitetonayisata, qassi I keehey iya ammanidi minnidi eqidaysatasa. Minnidi eqonna ixiko hinteka karetana. 23 Ayhudeti ammaniko, kase enti de7iya bessaa simmana. Xoossay enta zaaridi, wothanaw danda7ees. 24 Hintena bazzon de7iya shamaho gidida Ayhude gidonnayisata qanxidi, gaden tooketida shamahuwa bolla hintena tokiko, medhon gade shamaho gidida Ayhudeta banta koyro bessan zaari tokanaw waanidi danda7etennee?
Xoossa Maarotethi Ubbaasa
25 Ta ishato, hinte hintena erancho gidi ceeqetofite. Ta hintew odiya issi xuuri de7ees. Hessika Isra7eeletape baggay si7onna ixiday wursethi gakanaw gidonashin, attanaw de7iya Ayhude gidonna asay kumethi Xoossako yaana gakanaasa. 26 Hessadaka, Isra7eele asa ubbay attana. Geeshsha Maxaafan,
“Nuna ashsheysi Xiyoonepe yaana;
Yayqooba kochaafe iita ubbaa diggana.Isa 59:20-21.
27 Taani enta nagara atto giya wode
entara caaqana caaqoy haysa”Isa 27:9.
geetetidi xaafetis.
28 Ayhudeti Wongela ekonna ixidi, hinte gisho Xoossara morke gididosona. Gidoshin, ha77ika enti dooretidaysata, Xoossay enta aawata gisho enta dosees. 29 Xoossay ba imuwaninne ba xeessan qiirotenna. 30 Hinte Ayhude gidonnaysati kase Xoossaas kiitetibeketa. Shin ha77i Ayhudeti kiitetonna ixin, hinte Xoossaa maarotethaa ekideta. 31 Hessadaka, hinte ekida maarotethaa Ayhudeti ekana mela ha77i Xoossaas kiitetonna ixidosona. 32 Xoossay asa ubbaa ba maarotethaa bessanaw koyidi, asi ubbay kiitetonna ixana mela oothis.
33 Xoossaa duretetha, cincatethaanne eratethaa akeekidi odanay oonee? Iya pirday pilgetenna, iya ogey eretenna.Isa 55:8. 34 Geeshsha Maxaafan,
“Godaa qofaa erey oonee?
Iya zoranaw danda7ey oonee?Isa 40:13.
35 Xoossaas tal7eynne
tal7iya zaaridi ekey oonee?”Iyyo 41:11.
yaagees.
36 Ubbaa I medhis; ubbay iyan de7ees; ubbay iya bonchosa. Xoossaas merinaw bonchoy gido. Amin7i.2 Qoro 8:6.