6
Yerusalaame Geela7ota
Maccasa ubbaafe lo77iyare, ne laggey awu bidee?
Nu neera koyana mela I bida gina nuus oda.
 
Geela7iw
Ta siiqoy dorsa wude heemmanaw,
lo77o ciishsha shiishanaw,
shitto maatay de7iya atakiltiya giddo bis.
Taani ta siiquwaba; ta siiqoy tabaa;
I ciishsha giddon wude heemmees.
 
Panthaa
Ta siiqe, ne Tirsa katameeda lo77aasa;
Yerusalaameda daro lo77aasa.
Bandira oykidi salpiya,
olanchoda yashshaasa.
Enti tana un7ethida gisho,
hayyana ne ayfiya taape dentha.
Ne binaanay Galada zumaape wodhiya,
deesha wude daanees.
Ne achay meecetidi keyiya,
ubbay mente yeliya,
enta giddon awucayey bayna dorsa wude mela.
Ne nam7u shakalay guulunthaa giddora xeelliya wode,
nam7u kessidi phalqida oromaane daanosona.
Usupun tammu macca kawoti,
hospun tammu laggethoti,
tayboy bayna geela7oti de7oosona.
Shin borey bayna ta holliya taw dumma;
iya ba aayes issinno.
Iyo yelida aayiya ubbaafe aathada iyo dosawusu;
Geela7oti iyo be7idi, “Hanna anjetidaaro” yaagosona;
macca kawotinne laggethoti iyo sabboosona.
 
Yerusalaame Geela7ota
10 Hanna wonta xalqeda doliyara,
ageenada poo7iyara, xalqeda caddiyara,
bandira oykidi salpe keyida,
olanchoda yashshiyara hanna oonee?
 
Panthaa
11 Taani zangaaran toketida mithata be7anaw,
woyney aacidako oromaaney ayfidaako xeellanaw,
duge ocholone gade wodhas.
12 Ta qoponna de7ishin ta amoy tana efidi,
kawa asaa para gaareta giddon tana utisis.
 
Yerusalaame Geela7ota
13 Neno Sulaamape yidaare, haaya; haa simma;
Nu nena loythidi xeellana mela haa simma.
 
Geela7iw
Daro asaa sinthan yexiya asada,
tana ayis xeelleetii?