7
Panthaa
1 Kawo na7ada lo77iyare,
Laxana caamma aathida ne tohoti waani lo77i!
Ne sheechey hiillanchoy qoxidi,
alleeqisida al7o shuchu daanees.
2 Ne gul7ay woyney kumida birille daanees;
ne xeessa yuushoy ciishshan qashetida giste mirqe daanees.
3 Ne dhanthati mente yeletida,
gen7e mari daanosona.
4 Ne qoodhey dangarsa zaalen
alleeqetida adussa shako mela.
Ne ayfey gita Haseboona katama pengiya matan,
de7iya zeero haatha daanees.
Ne siidhey Damasqoko zaaridi gimbida,
Libaanose gimbiya daanees.
5 Ne huuphey Qarmeloosa zuma daanees;
ne binaanay qacina xaathi daanees;
ne huuphiya dathay kawa ufaysees.
6 Ta siiqe, ne waanna lo77ay!
Ne waanida yegelsse!
Ne siiqoy tana waani ufaysi!
7 Ne geesay zamba daanees;
ne dhanthay zamba mor77e daanees.
8 Taani, “Zamba bolla keyana;
iya ayfiya maxana” yaagas.
Ne dhanthay woyne mor7e mela;
ne siidhiyara keya peenoy apileda sawees.
9 Ne doonape keyiya peenoy
lo77o woyne mela.
Geela7iw
Hiza lo77iya woyne ushshay,
ne siiqe mettershafenne achafe giddora,
lepi gidi goggo.
Geela7iw
10 Taani ta siiquwaba; ika tana amottees.
11 Ta siiquwaw, haaya;
katamaape keyidi gaxare boos;
nam7ay qamma yan aathana.
12 Wonta guura woyne atakiltiya giddo boos;
woyney ciiyidaako, ayfe aathidako,
oromaaney ayfidaako ane be7oos.
Taani ta siiquwa nena yan bessaana.
13 Inkoye ayfe sawoynne
dumma dumma ufaysiya atakilte ayfey
nu karen kumis.
Ta siiquwaw! Ha ayfetape teeridaysanne
oorathi maxidaysa new wothas.