1 Qassi taani dhoqu gada xeelliya wode oyddu para gaareti nam7u naase birata deretape giddora yeyisata be7as. 2 Koyro gaariya zo7o parati goochosona; nam7antho gaariya kareetha parati goochosona. 3 Heedzantho gaariya bootha parati goochosona; oyddantho gaariya wanco parati goochosona. 4 Taani kiitanchuwako, “Ta godaw, haysati aybee?” yaagada oychas.

5 Kiitanchoy zaaridi, “Haysati biitta ubbaa Godaa sinthan eqidi oothiya oyddu salo carkota. 6 Kareetha parati goochiya gaarey pudeha bagga biitta bees; bootha parati goochiya gaarey wuloha bagga bees; wanco parati goochiya gaarey dugeha bagga bees” yaagis.

7 He parati biitta wochanaw keyida wode gede haa pachiparoosona. Kiitanchoy entako, “Bidi biitta ubbaa yuuyidi wochite” yaagis. Enti bidi biitta ubbaa yuuyidi wochidosona. 8 Hessafe guye, kiitanchoy ba qaala dhoqu oothidi, “Heko, pudeha bagga biitta bida parati ta Ayyaana he biittan shempisidosona” yaagis.

9 Godaa qaalay taako haysada yaagishe yis: 10 “Babiloone di7etethaafe simmida Heldayi, Xoobeynne Yadayi immiya biranne worqa imota ekada he gallas Sofoniyaasa na7aa Iyosyaasa soo ba. 11 Entafe ekida birapenne worqafe kallacha medhada Iyosadeqa na7aa, kahine halaqaa Iyyasu huuphen wotha. 12 Ubbaafe Wolqaama Goday haysada yaagees gada iyaw oda: heko, tashey ba bessan daaya gishonne I xoossa keetha keexiya gisho, iya sunthay ‘Tashe geetetida addey haysa. 13 Godaa keetha keexanay iya; I kawotetha ma7uwa ma77idi, araatan uttidi haarana. Qassi iya araata matan issi kahiney eqana; enta nam7aa giddon issifetethi daana.’ 14 He kallachay Heldaya, Xoobbiya, Yadayanne Sofoniyaasa na7aa Iyosyaasa qofiso gididi, Godaa xoossa keethan daana” yaagis.

15 He wode haaho bessan de7iya asati Godaa keetha keexidi maaddanaw yaana. Ubbaafe Wolqaama Goday tana hinteko kiittidaysa hinte hessan erana. Godaas, hinte Xoossaas hinte polo kiitetiko hessi hanana.