1 Daariyosi kawotida oyddantho laythan, Kisiila geetetiya uddufuntho ageenan, oyddantho gallasan, Zakariyasako yida Godaa qaalay haysa. 2 Beetele katamaa asay Sarezeera, Regem-Melekanne entara issife de7iya asata Godaa anjoy yaana mela woossanaw kiittidosona. 3 Qassi Ubbaafe Wolqaama Godaa keethan oothiya kahinetanne nabeta, “Daro laythi oothishe gam7idaysada nuuni ha77ika ichashantho ageenan yeekanawunne xoomanaw bessii?” yaagidi oychana mela kiittidosona.

4 Hessafe guye, Ubbaafe Wolqaama Godaa qaalay haysada yaagidi taako yis: 5 “Biittan de7iya asa ubbaasinne kahinetas haysada yaagada oda: ‘Hinte ha aadhida laapun tammu laythan ichashantho ageenaninne laapuntha ageenan xoomidaynne yeekiday tana bonchanaasee? 6 Hinte miya wodenne uyaa wode hintew meetanne uyeeta. 7 Yerusalaame katamaynne iya yuushuwan de7iya katamatan de7iya asay shemponinne injen de7ida wodenne Negebaninne gadhan asay wopu gidi de7ida wode Goday ba nabeta baggara odida qaalay haysa gidennee?’ yaaga” yaagis.

8 Godaa qaalay Zakariyasako haysada yaagidi yis: 9 “Ubbaafe Wolqaama Goday kase immida kiitay, ‘Suure pirdaa pirdite; hinte issoy issuwas keehatethinne maarotethi oothite. 10 Am7eta, yi7ota, bete asaanne manqota naaqofite. Qassi hintefe oonika ba ishaa bolla iitabaa oothanaw ba wozanan qopofo.’

11 “Shin enti si7onna ixidosona; zoko zaaridi banta haythaa tuccidosona. 12 Ubbaafe Wolqaama Goday ba Ayyaanan kase ba nabeta baggara kiitida higgiyanne qaala si7onna ixidi banta wozanaa zaallada minthidosona. Hessa gisho, Ubbaafe Wolqaama Godaa matape gita hanqoy enta bolla yis. 13 Taani xeegiya wode enti si7onna ixidaysada enti xeegiya wode taani si7ike” yaagees Ubbaafe Wolqaama Goday.

14 “Taani gote ehada enti eronna kawotethata giddon laallas. Biittay asi yaanne haanne simeretonna kaysa biitta gidis; ha lo77o biittay baysa gidis” yaagees Ubbaafe Wolqaama Goday.