1 Ubbaafe Wolqaama Godaa qaalay qassika taako haysada yaagidi yis: 2 Ubbaafe Wolqaama Goday, “Taani Xiyoones daro qadhetayis; I mishay tana xuuggees. 3 Taani Xiyoone simmada Yerusalaamen daana. Qassi Yerusalaamey ammanthiya katama geetetada eretana. Ubbaafe Wolqaama Godaa zumay Geeshsha Zuma geetetidi xeegetana” yaagees.

4 Ubbaafe Wolqaama Goday, “Cimidi guufera biya addeynne maccasay kaseysada Yerusalaame dabaaban uttana. 5 Yerusalaame katamaa ogeti kaa7iya addenne macca naytan kumana” yaagees.

6 “Attida asaas hessi malaalsiyaba gidikoka, tana hessi malaalsiyabayee? yaagees Ubbaafe Wolqaama Goday. 7 Heko taani ta asaa dolohapenne wulohape shiishana. 8 Enti Yerusalaamen daana mela oothana. Enti ta ase gidana; taani xillonne ammanthiya enta Xoossaa gidana” yaagees Ubbaafe Wolqaama Goday.

9 Ubbaafe Wolqaama Goday haysada yaagees: “Hinteno, Ubbaafe Wolqaama Godaa keethaa baasoy yegetida gallasaape doomidi nabeti odida qaala si7idaysato, hinte kushiya minthite; oosuwa minnidi polite. 10 He wodiyape kase asaas damoozey, mehiyas qanxetiya keri baawa. Taani asa ubbaa issuwa issuwa bolla morketethan denthida gisho, geleysasinne keyeysas saroy baawa. 11 Shin ha77i taani ha attida asaa bolla kase oothidaysada oothike” yaagees Ubbaafe Wolqaama Goday.

12 “Entii zerida ubbay dolana; woyney ba ayfiya immana; goshshay kathan kumana; saloti banta ira immana. Haysa ubba attida asaas laata oothada immana. 13 Hinteno, Yihuda asaw, Isra7eele asaw, kawotethata giddon hinte baadetidaysata gidideta, shin ha77i taani hintena ashshana; hinte anjetidaysata gidana. Yayyofite! hinte kushiya minthite!” yaagees.

14 “Hinte mayzati tana yiloyida wode enta qadhey bayna seeranaw qofa qachas. 15 Ha77i taani Yerusalaamesinne Yihudas lo77oba oothanaw qofa qachas. Hiza yayyofite! 16 Hinte oothanaw koshshiyabay haysa: issoy issuwara tumaa odetite; pirda dabaaban tumaanne saruwa ehiya pirda pirdite. 17 Issoy issuwa qohanaw iitabaa hinte wozanan maqetofite; wordon caaqofite. Hayisata ubbaa taani ixayis” yaagees Ubbaafe Wolqaama Goday.

18 Ubbaafe Wolqaama Godaa qaalay qassika taako haysada yaagidi yis: 19 “Oyddantho, ichashantho, laapunthonne tammantho ageenan hinte xoomida xoomay Yihuda asaas ufaysinne inje wode gidana. Hessa gisho, hinte tumatethinne sarotethi dosite” yaagees.

20 “Daro asaynne daro katamatan de7iya asay Yerusalaame yaana. 21 Issi kataman de7iya asay hara kataman de7iya asaako bidi, ‘Godaa anjoy yaana mela woossanawunne Ubbaafe Wolqaama Godaa koyanaw ane boos; taanika bayis’ yaagana. 22 Qassi daro asaynne wolqaama kawotethati Ubbaafe Wolqaama Godaa koyanawunne woossanaw Yerusalaame yaana. 23 He gallasatan dumma dumma qaalan haasaya kawotethata ubbaafe tammu asati yidi, issi Ayhude addiya ma7uwa macaraa oykidi, ‘Xoossay hintera de7eysa nuuni si7ida gisho, nuuni hintera baana’ yaagana” yaagees Ubbaafe Wolqaama Goday.