1 Salota micciday, sa7aa medhiday, asas de7o ayyaana immida Goday Isra7eeleba odida Godaa qaalay haysa: 2 “Heko, taani Yerusalaame katamaa, iya yuushuwan de7iya asa ubbay uyin gandigarsiya woyne ushshi tigiya wanca oothana. Yerusalaamey oyketiya wode Yihuda katamati oyketana. 3 He wode taani Yerusalaame katamaa asa ubbaas deexo shuchu oothana; iya denthiya ubbay baw deshetana. Sa7aa kawotethati ubbay iya olanaw issife shiiqana. 4 He wode taani para ubbaa daganthana; para asata gooshshana.” Taani Goday haysa odayis. Yihuda asaa taani ta keeha ayfen xeellana; shin morketa parata ubbaa qooqisana. 5 He wode Yihuda halaqati banta wozanan, “Yerusalaame asay Ubbaafe Wolqaama Godan, banta Xoossan, minotethaa demmidosona” yaagana.

6 “He wode taani Yihuda kochata mitha dooriya giddon de7iya xiifanne mirqeeta giddon laxiya xompe oothana. Enti banta ushachan, banta haddirsaninne banta yuushuwan de7iya asa ubbaa maana; shin Yerusalaame katamay, asay saro de7iya bessi gidana.

7 “Dawita kochata bonchoynne Yerusalaamen de7eyisata bonchoy Yihuda asaa bonchuwafe aadhona mela taani Goday kasetada Yihuda asaas xoono immana. 8 He wode enta giddon daro laafa geetetiya asi Dawita mela mino gidana. Taani Goday Yerusalaamen de7eysatas gondalle gidana. Dawita kochati Xoossa mela, Godaa kiitancho mela gididi enta kaalethana. 9 He wode taani Yerusalaame olanaw dendiya kawotethata ubbaa dhaysanaw dendana.

10 “He wode taani Dawita kochata bollanne Yerusalaamen de7iya asaa bolla qadhenne woosa ayyaana gussana. Hessa gisho, enti banta caddidaysa be7iya wode asi ba issi na7as yeekeysada yeekana. Qassi ba bayra na7as kayoteysada kayotana. 11 He wode Yerusalaamen yeeketiya yeehoy Magido denban Hadaad-Rimoonas yeeketida yeehuwa mela wolqaama gidana. 12 Biittan de7iya issi issi kochay baw baw yeekana; Dawita kochati banta machetara, Naatana kochati banta machetara bantaw, 13 Leewe kochati banta machetara bantaw, Same7a kochati banta machetara bantaw, yeekana. 14 Attida kocha ubbay baw baw yeekana; enta macheti bantaw bantaw yeekana” yaagees.