13
Nagarape Geeyethi
Ubbaafe Wolqaama Goday haysada yaagees: “He wode Dawita kochatanne Yerusalaamen de7eyisata nagarapenne tunatethafe geeshshiya pultoy dhuuqana. He wode taani enti nam7antho qofetonna mela eeqata sunthaa biittafe dhaysana. Qassi nabetanne tuna ayyaanata biittafe dhaysana. Taani Ubbaafe Wolqaama Goday haysa odayis. Qassi oonika, taani nabe giiko, iya aawanne aayiya iya, ‘Neeni Godaa sunthan wordo odiya gisho, hayqanaw bessees’ yaagana. I tinbite odiya wode iya aawaynne aayiya iya caddidi wodhana. He wode taani nabe giya oonika ba be7ida qoncethan yeellatana. Qassi ase cimmanaw ikisey de7iya ma7o ma77enna. Shin I, ‘Taani nabe gidike; na7atethafe doomada biitta oothiya asi’ yaagana. Issi asi, ‘Yaatin, ha ne bolla de7iya madunthay aybee?’ yaagidi oychiko, i, ‘Haysi taani ta laggeta son madunxidaysa’ yaagana” yaagees.
Henthanchoy shocetin Dorsati laaletidosona
“Mashshaw denda, taw mata gidida ta dorsata henthanchuwa bolla barka! Dorsati laaletana mela henthanchuwa wodha. Taani guutha dorsata bolla ta kushiya denthana” yaagees Ubbaafe Wolqaama Goday.
“Biitta ubban de7iya heedzu kushe asaape nam7u kushey shocetidi hayqin, issi kushe xalaali attana. Taani Goday haysa odayis. Ha attida siko asaa taani taman yeggana; biri taman geeyada enta geeshshana; worqey paacetiyada paacana. Hessafe guye, enti ta sunthan woossana; taani enta si7ana. Taani enta, ‘Ta ase’ gaana; enti, Goday, ‘Nu Xoosse’ yaagana” yaagees.