1 ಬನ್ಹಿ ಬಾವ್ಹಾನು ಹ್ಯಾ ಗುಶ್ಟಿ ಕವಾ ಚಾ಼ಲತ್ಯಾತಾ ಮನ್ಹುನ್ ದೀಸ್ ಆನಿ ಯೊಳ್ ತುಮಾನಾ ಲಿವಾಲಾ ವ್ಹಯಿ ಮನ್ಹುನ್ ನಾಹಿ.

2 ಕಾ ಮಂಜೆ ರ‍್ಯಾಚಾ಼ ಚೊ಼ರ್ ಕಸಾ ಯತೊ ತಸಸ್ ಪ್ರಭುಚ಼ ಯನ ತುಮಾನಾ ಚಾ಼ಂಗ್ಲ ಠಾವ ಹಾ. 3 ಸಗ್ಳ ಸಮಾದಾನಾನಿ ಭೆ ನಸ್ಥಾನಾ ರಾಥಾವ್ ಮನ್ಹುನ್ ಲೊಕ ಸಾಂಗ್‌ತ್ಯಾಲಿ ಆಸ್ಥಾನಾ ತ್ಯಂಚಿವ ನಾಸ್ ಬಾಳ್ತಿನಿಲಾ ಬಾಳತ್ಫನಾಚ಼ ಯಾಗ್ ತವಾಸ್ ಯತ್ಯಾಚೆಗತ್ ಯನಾರ್; ತಿ ಕಸಿಸ್ ಚು಼ಕ್ವುನ್ ಗಿಹಿತ್ನಾಹಿತ. 4 ಫನ್ ಬನ್ಹಿ ಬಾವ್ಹಾನು, ತ್ಯೊ ದಿಸ್ ಚೊ಼ರಾಚೆಗತ್ ತುಮ್ಚಿವ ಯನಾರ್ ನಾಹಿ; ತುಮಿ ಆಂದಾರಾತ್ ರಾತ್ಯಾಲಿ ನವ್ಹಸಾ. 5 ತುಮಿ ಸಗ್ಳಿ ಉಜಿಡಾಚಾ ದಿಸಾಚಿ ಜಾ಼ಲ್ಯಾಸಾ ತ್ಯವ್ಡಿಸ್; ಆಮಿ ರಾತಿಚಿ ಆನಿ ಆಂದಾರಾಚಿಬಿ ನವ್ಹ. 6 ಮನ್ಹುನ್ ಆಮಿ ದುಸರ‍್ಯಾಂಚೆಗತ್ ನಿಜ಼ುನ್ ರಾಹುನಾಹಿ, ಜಾ಼ಗಿ ರಾಹುನ್ ತುಮ್ಚಾ ತಾಬ್ಯಾತ್ ತುಮಿ ರಾವ್ಹಾ. 7 ನಿಜ಼ತ್ಯಾಲಿ ರ‍್ಯಾಚಿ ನಿಸ್‌ತ್ಯಾತ, ಪಿವುನ್ ಘುಂಗ್ ಯತ್ಯಾಲಿ ರ‍್ಯಾಚಿ ಘುಂಗಿತ್ ರಾಥ್ಯಾತ.

8 ಆಮಿ ತರಿ ದಿಸಾಚಿ಼ ವ್ಹವುನ್ ಇಸ್ವಾಸಾಚೆ ಮಾಯೆಚ಼ ಶಾತಿಚ಼ ಕವಚಾ ರಕ್ಷಣೆಚಿ ವಾಟ್ ಬಗಾಚಿ ಡುಯಿಚ಼ ಕವಚ ಗಾಲುನ್ ಚಾ಼ಂಗಲ್ಯಾ ಮನಾನಿ ರಾಹುಯಾ. 9 ಕಾ ಮಂಜೆ ದೇವಾನಿ ಆಮಾನಾ ಆಪ್‌ಲ್ಯಾ ರಾಗಾತ್ ಗಾವ್ಹಾ ವ್ಹಯಿ ಮನ್ಹುನ್ ನಿವಡ್ಲ ನಾಹಿ ಫನ್ ಆಮಚಾ಼ ಪ್ರಭು ಜಾ಼ಲ್ಯಾಲ್ಯಾ ಯೇಸುಸ್ ಲಾಗುನ್ ರಕ್ಷನ್ ವ್ಹಯಿ ಮನ್ಹುನ್ ದೇವಾನಿ ಥರಿವ್‌ಲ್ಯಾ. 10 ಯೇಸು ಕ್ರಿಸ್ತಾನಿ ಆಮ್ಚಿಸಾಟಿ ಜೀವ್ ದಿಲಾ ಹ್ಯಚಿಸ್ ಲಾಗುನ್ ಆಮಿ ಜೀತ್ತಿ ರಾಹುನಿ ನಾಹಿತ್ ಮೆಲ್ಯಾಲಿ ರಾಹುನಿ ತ್ಯೊ ಪರತುನ್ ಯತಾನಾ ತ್ಯಚಿ ಸಂಗ ಆಮಿ ಜಿತ್ತಿ ರಾನ್ಹಾರ್. 11 ಮನ್ಹುನ್ ತುಮಿ ಆತಾ ಕರ್ತ್ಯಾಶಾರ್ಕ ಯಕಾಮಕಾಲಾ ಮಜ಼ತ್ ಕರಾ ಆನಿ ಉಮೇದ್ ದೇವಾ.

12 ಆಮ್ಚಾ ಬನ್ಹಿ ಬಾವ್ಹಾನು, ಆಮಿ ತುಮ್ಚಿಪ ಇನಂತಿ ಕರ್ತಾವ್ ಕಚಿ ಲೊಕ ತುಮ್ಚೆ ಮದ್ದಿ ಕಾಮ ಕರ್ತ್ಯಾತ ಆನಿ ಇಸ್ವಾಸಾಚಾ಼ ಜೀವ್ನಾ ಕರಾಯಾ ವಾಟ್ ದ್ಯಾವತ್ಯಾತ ಆನಿ ನಿರ್ದೆಶನ್ ದೆತ್ಯಾತ ತ್ಯನಾ ಚಾ಼ಂಗ್ಲಾ ಸನ್ಮಾನ್ ದೇವಾ. 13 ತ್ಯಂಚಾನಿ ಕೆಲ್ಯಾಲ್ಯಾ ಕಾಮಾಸ್ ಲಾಗುನ್ ತ್ಯಂಚಿವ ಮಾಯಾ ಆನಿ ಮುಟಿ ಮರ‍್ಯಾದ್ ದಾವಾ ಆನಿ ತುಮ್ಚಾ ತುಮ್ಚಾತ್ ಸಮಾದಾನಾನಿ ರಾವ್ಹಾ.

14 ಆಮ್ಚಾ ಬನ್ಹಿ ಬಾವ್ಹಾನು, ಮೀ ತುಮ್ಚಿಪ ಮಾಗುನ್ ಗಿಹ್ಯಾಚ಼ ಕ್ಯಾ ಮಂಜೆ ಕಾಮ್ ಕರಿ ನಸ್ನಾರ‍್ಯಾನಾ ಜಾ಼ಗಿ ಕರಾ ಬಳ್ ನಸ್‌ಲ್ಯಾಲ್ಯಾನಾ ಮಜ಼ತ್ ಕರಾ ಸಗ್‌ಳ್ಯಾಂಚಿ ಸಂಗ ಸಮಾದಾನಾನಿ ರಾವ್ಹಾ. 15 ಯಕಾಮಕಾಲಾ ಆನಿ ಸಗ್‌ಳ್ಯಾನಾ ಕವಾಬಿ ಚಾ಼ಂಗ್ಲ ಕರಾಯಾ ಯತ್ನ ಕರಾ ಕುನಿಸ್ ಬುರ್ಶಾಲಾ ಬುರ್ಸ ಕರುನಾಹಿ ಆಸ ಬಗಾ; ಬರ ತೆಸ್ ಕರಾ.

16 ಕವ್ವಾಬಿ ಆನಂದಾನಿ ರಾವ್ಹಾ; 17 ಕವ್ವಾಬಿ ಮಾಗ್ನ ಕರಾ; 18 ದೇವಾಲಾ ಸಗ್‌ಳ್ಯಾ ಯಳಾತ್ ದನ್ಯವಾದ್ ಸಾಂಗಾ. ದೇವಾಚಿ ತುಮ್ಚಾ ಜೀವ್ನಾಸಾಟಿ ಕ್ರಿಸ್ತ್ ಯೇಸುಚೆ ಯಕಿತ್ ಹ್ಯಸ್ ಚಿತ್ ಜಾ಼ಲ್ಯಾ.

19 ಪವಿತ್ರಾತ್ಮಚ಼ ಕಾಮ್ ಇಜ್ವು಼ ನಕೊಸಾ; 20 ದೇವಾಪ್ನಿ ಆಲ್ಯಾಲ್ಯಾ ಸಾಂಗ್‌ನ್ಯಾಚಾ಼ ಆವ್ಮಾನ್ ಕರು ನಕೊಸಾ; 21 ಸಗ್‌ಳ್ಯಾಚಿ ಪಾರಕ್ ಕರುನ್ ಚಾ಼ಂಗ್ಲ ತ್ಯಸ್ ಘಟ್ ದರಾ; 22 ಸಗ್ಳೆ ತರಚಾ. ಬುರ್ಶಾತ್ನಿ ದುರ್ ರಾವ್ಹಾ.

23 ಥಂಡ್ಪನ್ ದೇನಾರಾ ದೇವ್ ಸ್ವತಾ ತುಮಾನಾ ಪುರೆತರನಿ ಪವಿತ್ರ ಕರುನಿ. ಆತ್ಮ, ಜೀವ್, ಆನಿ ಶರಿರಾಲಾ ಆಮ್ಚಾ ಪ್ರಭು ಕ್ರಿಸ್ತ ಯೇಸು ಮಾಗಾರಾ ಯತಾನಾ ದೊಶ್ ನಸ್ತಾನಾ ಪವಿತ್ರ ವ್ಹವುನ್ ರಾಹುಂತ. 24 ಕಾ ಮಂಜೆ ತುಮಾನಾ ಹಾಕಟ್ಯಾಲಾ ಇಸ್ವಾಸಾಚಾ಼ ತ್ಯೊ ಆಪ್ಲಿ ಕಾಮ ಕರ್ನಾರ್ 25 ಬನ್ಹಿ ಬಾವ್ಹಾನು ಆಮ್ಚಿ ಸಾಟಿ ಮಾಗ್ನ ಕರಾ.

26 ಸಗ್‌ಳ್ಯಾ ಇಸ್ವಾಸಿನಾ ನಿರ್ಮಳ್ ಮನಾನಿ ನಮಸ್ಕಾರ್ ಕರಾ.

27 ಮಿ ಪ್ರಭುಚಾ ಹುಕ್ಮಾನಿ ತುಮ್ಚಿಪ ಇನಂತಿ ಕರ್ತೊ. ಹ್ಯ ಪತ್ರ ಸಗ್‌ಳ್ಯಾ ಇಸ್ವಾಸಿ ಬನ್ಹಿ ಬಾವ್ಹಾನಾ ವಾಚ್ವು಼ನ್ ಸಾಂಗಾಯಾ ವ್ಹಯಿಸಾ.

28 ಆಮ್ಚಾ ಪ್ರಭು ಜಾ಼ಲ್ಯಾಲ್ಯಾ ಯೇಸು ಕ್ರಿಸ್ತಾಚಿ ಕ್ರಪಾ ತುಮ್ಚಿ ಸಂಗ ರಾಹುನಿ.