1 ಮಿಂಡುರ್ ಜಾ಼ಲ್ಯಾಲ್ಯಾನಿ ಸಾತ್ವಾ ಸಿಕ್ಕಾ ಉಗಡ್ಲಾ. ತವಾ ಸ್ವರ್ಗಾತ್ ಜ಼ವಳ್ ಜ಼ವಳ್ ಆರ್ದಾತಾಸ್ ಶಾಂತ್ ಜಾ಼ಲ್ಹ. 2 ಮಂಗ್ ದೇವಾಚೆ ಮೊರ‍್ಹ ಸಾತ್ ದೇವ್ದುತ್ ಉಬ ರಾಯ್‌ಲ್ಯಾಲ ಮೀ ಬಗ್ಲ ತ್ಯನಾ ಸಾ ತುತ್ತುರಿ ದಿಲ್‍ತ್ಯಾ.

3 ಆನಿ ಯೊಕ್ ದೇವ್ದುತ್ ಯವುನ್ ಯಜ್ಞವೇದಿಪ ಉಬಾರಾಹುನ್ ತ್ಯೊ ಧುಪ್ ಆಸ್‌ಲ್ಯಾಲಿ ಸೊನ್ಯಾಚಿ ದುಫಾರತ್ ದರ‍್ಹುನ್ ಹುತ್ತಾ ದೇವಾಚಾ ಲೊಕಾಂಚಾ ಮಾಗ್‌ನ್ಯಾಂಚಿ ಸಂಗ ದಿಯಾಸಾಟಿ ತ್ಯಲಾ ಖುಬ್ ಧುಪ್ ದಿಲ್ತಾ ಹ್ಯಾ ದೇವ್ದುತಾನಿ ಸಿಂಹಾಸನಾಚೆ ಮೊರ‍್ಹ ಸೊನ್ಯಾಚೆ ಯಜ್ಞವೇದಿವ ಹ್ಯೊ ಧುಪ್ ಥೆವ್ಲಾ 4 ತ್ಯಾ ದುಫಾಚಾ಼ ಧುರ್ ದೇವ್‌ ದುತಾಚಾ ಹಾತಾತ್ನಿ ದೇವಾಚಾ ಲೊಕಾಂಚಾ ಮಾಗ್‌ನ್ಯಾ ಸಂಗ ದೇವಾಪ ವರ್ ಗೇಲಾ. 5 ತವಾ ದೇವ್ ದುತಾನಿ ಪೆಟ್‌ಲ್ಯಾಲಿ ದುಫಾರತ್ ಗಿಹುನ್ ದರ್ಥಿವ ಹೊಲ್ಪಟ್ಲಿ. ತವಾ ಇಜ಼್ ಲವ್ಲಿ ಗಡ್ಗಡ್ಲಾ ಆನಿ ಯೆಕ್ ತರಚಾ಼ ಆವಾಜ಼್ ಆಲಾ ಆನಿ ಭುಕಂಪ ಜಾ಼ಲಿತ.

6 ನಂತರ್ ತೆ ಸಾತ್‍ಜಾ಼ನ್ ದೇವ್‌ ದುತ್ ಸಾತ್ ತುತ್ತುರಿ ವಾಜ್ವಾ಼ಯಾ ತಯಾರ್ ಜಾ಼ಲ್ಹ.

7 ಪೈಲ್ಯಾ ದೇವ್‌ದುತಾನಿ ಆಪ್ಲಿ ತುತ್ತುರಿ ವಾಜಿವ್ಲಿ. ತವಾ ರಗಾತ್ ಮಿಸಾಳ್ಯಾಲ ಗಾರಚಾ಼ ಪಾವುಸ್ ಆನಿ ಇಸ್ತು ದರ್ತಿವ ಪಡ್ಲಾ. ದರ್ಥಿಚಾ಼ ತಿನವ್ಯಾತ್ಲಾ ಯೊಕ್ ಭಾಗ್ ಆನಿ ಹಿರವ ಗವಾತ್ ಸಗ್ಳ ಜ಼ಳುನ್ ಗೇಲ; ಆನಿ ಜಾ಼ಡಾಂಚಾ಼ಬಿ ತಿನಿತ್ಲಾ ಯೊಕ್ ಭಾಗ್ ಜ಼ಳುನ್ ಗೇಲಾ.

8 ದೊನವ್ಯಾ ದೇವ್‌ ದುತಾನಿ ಆಪ್ಲಿ ತುತ್ತುರಿ ವಾಜಿವ್ಲಿ. ತವಾ ಇಸ್‌ತ್ಯಾನಿ ಪೆಟ್ಯಾಲಾ ಮೊಟಾ ಕನಾ ಮಂ‌ತ್ಯಾಲ ಯಾಕ್ ಸಾಮಾನ್ ಸಂಮಿದೊರಾತ್ ಹೊಲ್ಪಟ್ಲ. ತವಾ ಸಂಮಿದೊರಾಚಾ ತಿನವ್ಯಾತ್ಲಾ ಯೊಕ್ ಭಾಗ್ ರಗಾತ್ ಜಾ಼ಲಾ 9 ಸಂಮಿದೊರಾತ್ ಆಸ್‍ಲ್ಯಾಲ್ಯಾ ಜೀವಿತಲ್ಯಾ ತಿನವ್ಯಾತ್ಲಾ ಯೊಕ್ ಭಾಗ್ ಮರುನ್ ಗೇಲಾ ಆನಿ ವ್ಹಡಿಚಾ಼ ತಿನ್‍ವ್ಯಾತ್ಲಾ ಯೊಕ್ ಬಾಗ್ ನಾಸ್ ಜಾ಼ಲಾ.

10 ತಿನವ್ಯಾ ದೇವ್‌ ದುತಾನಿ ಆಪ್ಲಿ ತುತ್ತುರಿ ವಾಜಿವ್ಲಿ. ತವಾ ಚು಼ಡಿಚೆಗತ್ ಪೆಟ್ಯಾಲಿ ಯೇಕ್ ಮುಟಿ ಚಾನ್ನಿ ಆಬ್ಳಾತ್ನಿ ಬುಡಿ ಪಡ್ಲಿ. ತಿ ಚಾನ್ನಿ ನ್ಹತ್ನಿ ಆನಿ ಪಾನ್ಯಾಚಾ ಜ಼ರ‍್ಯಾಚಾ ತಿನ್‌ವ್ಯಾತ್‌ಲ್ಯಾ ಯಕಾ ಬಾಗಾವ ಪಡ್ಲಿ. 11 ತೆ ಚಾನ್ನಿಚ಼ ನಾವ್ “ಕಡು ಜಾ಼ಡ್” ಆನಿ ಪಾನ್ಯಾಚಾ಼ ತಿನವ್ಯಾತ್ಲಾ ಯೊಕ್ ಬಾಗ್ ಕಡು ಜಾ಼ಲಾ. ಹ್ಯ ಕಡು ಪಾನಿ ಪಿವುನ್ ಖುಬ್ ಲೊಕ ಮಿಲಿತ.

12 ಮಂಗ್ ಚಾರವ್ಯಾ ದೇವ್ ದುತಾನಿ ಆಪ್ಲಿ ತುತ್ತುರಿ ವಾಜಿವ್ಲಿ. ತವಾ ದಿಸಾಚಾ಼ ತಿನವ್ಯಾತ್ಲಾ ಯೊಕ್ ಬಾಗ್, ಚಾ಼ಂದಾತ್ಲಾ ತಿನವ್ಯಾತ್ಲಾ ಯೊಕ್ ಬಾಗ್ ಆನಿ ಚಾನ್ಯಾಂಚಾ಼ ತಿನವ್ಯಾತ್ಲಾ ಯೊಕ್ ಭಾಗಾಲಾ ತರಾಸ್ ಆಲಾ ಆನಿ ಆಂದಾರ್ ಜಾ಼ಲಾ. ದಿಸಾಚ಼ ಆನಿ ರಾತಿಚ಼ ತಿನವ್ಯಾತ್ಯಾ ಯಕಾ ಬಾಗಾಲಾ ಉಜ್ಜಿಡ್ ನಸ್‌ಲ್ಯಾಚೆಗತ್ ಜಾ಼ಲಾ.

13 ಆನಿ ಮೀ ಬಗಿತ್ ಆಸ್ತಾನಾ, ಯೊಕ್ ಗರುಡ್ ಪಕ್ಷಿ ಆಬ್ಳಾಚೆ ಮದ್ದಿ ತಳ್ಪತಾ ತ್ಯೊ ಆಸಾ ಮೊಟ್ಯಾನಿ ಮಂಥ್ಯಾಲ ಮೀ ಐಕ್‌ಲ್ಯಾಲ ಕ್ಯಾ ಮಂಜೆ, ಆಸ ತಿನ್ ಜಾ಼ನ್ ದೇವ್‌ದುತ್ ಆಪ್ಲಿ ತುತ್ತುರಿ ವಾಜಿವ್‌ತ್ಯಾತ ತ್ಯಂಚೆ ತುತ್ತುರಿಚಾ ಆವಾಜಾ಼ನಿ ಧರ್ಥಿವ ರಾಥ್ಯಾಲ್ಯಾ ಲೊಕಾನಾ ತುಮಚಿ ಗತ್ ಕ್ಯಾ ಸಾಂಗು.