1 Nggǝt mafata wa? Nggǝt ngga tatǝ kǝmsha i Yesu naki wa? Nawi Yesu Chinmǝn tǝ wenitinchi wa? Kun ngga kǝnau terinchi hur Chinda wa? 2 Kǝmɗi fowuna, maangga tatǝ kimsha naki wa, kittaˈan kǝmɗiyowun tatǝ kǝmsha naki. Kǝthlǝm kun chokchǝ kǝ ǝnɗi nech pǝnda wa tatǝ kimsha naki pangngǝn Chinda.

3 Tǝ thlǝya thlǝ nati kǝsaandǝ indinchisi, kǝmɗi fee thlǝ yahchi kǝ chaki chindǝ mee. 4 Awi Barnabas tǝ nggǝta Bulus kǝmwasi kǝ fǝraˈanchi fee ɗǝsǝmnda tǝ ina sata wa? 5 Mbandiyaˈansi kǝ kahˈǝn nǝssiɗi fǝ fǝr kitcha, kǝ wiˈǝn tǝ tanda wa, kǝɗ thla thlǝ chǝt takǝɗ tatǝ kǝmsicha, tǝ wanmanchi Chinda, tǝ paɗ thlǝ chǝt ndǝ Kefas wa? 6 Ndu nggǝta Bulus tǝ Barnabas ndak chokchan nwaat kǝ chǝˈǝn tar sǝman ǝn indiyaˈan wa?

7 Wun nech chit teri thlǝ kǝnhwira kǝ sǝmantǝ ǝn indiyan? Wun nech huɗa hǝnggǝ yangngga kǝ wulan sǝm wanchaˈan? Wun nech para chapa, kǝ wulan saa yinjaˈan? 8 Mbuˈchi kǝɗu kǝthlǝm kǝt kaɗati nefa wa? Ngga kussiˈ i Musa mbuˈchan kǝɗu paɗ wa? 9 Kǝthlǝm nechan kǝ yaraɗan hur kussiˈ i Musa ndat wa, “Mǝ nggǝlan fee mee i thla huɗata tǝ langteya ǝ fartǝɗi natǝn chit tar tǝp ɗǝsǝmnda wa.” Thlechi ndak naa Farta ɓillat tǝ tanda wa? 10 Ngga kǝthlǝm kǝt nggǝmǝn natǝn shenuˈta wa? Kittaˈan kǝthlǝm kǝt nggǝmǝn yara fee. Kǝmchansi thlǝ huɗata tǝ thlǝ tǝptaˈan kǝ ɗǝf ndǝ wanɗǝkaɗatˈyanda ndat wa, nandǝ mbǝs kǝnau ɗǝsǝmǝn hǝngngi ˈyan. 11 Nakan tapi hǝf ǝn weˈta yi shishingnda kǝ wanɗǝkaɗatˈyowun, chokchan kǝ ǝn ˈyangˈyang mǝɗˈyowun wa, kǝ mbǝs ǝn ɗǝsǝmnda mǝɗˈyowun? 12 Maa naa fowun mbǝs mban ti ɓillachanda mǝɗˈyowun, awi, pǝɗawaˈan tandǝ ha tǝ mbǝs mban ti ɓillachaˈan mǝɗˈyowun wa?

Nat tǝ kǝɗu chiwaˈan tertǝ mban chǝt kǝɗu wa. Paɗ kǝrisˈǝn tǝ chika mii, kǝthlǝm kǝ ˈyataˈan tar kusheˈtǝ kwastǝ ndikta yi sǝkta i Kǝristi. 13 Awi sǝnwowun wa fee thlǝ chǝt ter ǝ kǝtǝn shita ǝ minni thlǝ mbǝstǝndǝ ɗǝsǝmndiyanda wa? Fee thlǝ chǝt ter mǝt thle ɓǝra icha, ǝ minni thlǝ mbǝstǝndǝ ɗǝsǝmnda. 14 Kǝɗu natǝn paɗ, mbuˈchi Chinda Yesu tǝ ndat wa, fǝ wiˈta kǝnandǝ ɓas kusheˈtiyan thla mbinchan yi sǝkta, tǝmɗi ɓas kusheˈtiˈini nandǝ mbǝs ɗǝsǝmnda.

15 Paɗ chiwi ter tǝ chǝk arta ǝ hur mbǝs ichiˈinni wa. Paɗ ngga tǝ ni yarowun ndǝs tǝ ɗǝf wanɗǝkaɗatsi kǝthlǝm kǝ chichi fee kǝɗu wa. Mǝ kwech chan mǝrti, mǝ kǝ nggǝmanni kǝ ˈyatichi yowun sǝnda. 16 Chika nakan wa nggǝt ɓas kwastǝ kusheˈtǝ ndikta, thleya chokwa kǝ ina sǝndǝ kǝmɗinchi wa. Nakan kǝthlǝm kǝt tarɗa ɗǝftǝ fee nenchisi. Aiˈinchi paɗ maa ɓaswi kwastǝ ndikta yi sǝkta wa. 17 Maa nechi ɓasa kǝthlǝm kǝt yah indinchi, naa fee fǝri kǝnawan. Paɗ nakan ngga kǝthlǝm kǝt yah indinchi nati ɓasa wa, tǝ fǝrichi fee ǝn kǝ har, kǝ chi. 18 Kǝthlǝm ndaˈan, mǝnech kǝ kǝnawan inchi? Kǝnawan inchi, kǝ ɓasi kusheˈtǝ kwastǝ ndikta, kǝ chi pafǝn. Tǝ kǝɗu, chiwi ter paɗ tǝ ndiid mbǝs indinchi yi thlǝ ɓas kwastǝ kusheˈtǝ ndikta yi sǝkta wa.

19 Chǝk nakan ngga mafati chikawun naki wa, ngga nechi kanɗukwati yowun wa, chani indinchi kǝ mafati chika wuni. Kǝthlǝm kǝ kaɓi nafchi terchan kǝ fǝr ndǝ kit kǝ Chinmǝn Yesu Kǝristi. 20 Maa nggǝt mǝɗi Yahudawecha, thlǝ chokchi kǝɗ thlǝ Yahudawata, kǝthlǝm kǝ kaɓi Yahudawecha kǝ chok ndǝ kǝ yi Kǝristi. Mǝɗi fee naa kussiˈ i Musa chit kutǝrakta kǝ ɗar nanda, thlǝ chokchi kǝɗ thla naa kussiˈ i Musa chǝt kutǝrakta ǝ ɗaran. Chik nakan wa nggǝtya, ngga kussiˈ taˈan nech chit kutǝrakta ǝ ɗar indinchi wa. Thlǝ chichi kǝɗu, kǝthlǝm kǝ kaɓi fee naa kussiˈ taˈan chit ter kǝ ɗar nanda, kǝmɗi Chinda Yesu. 21 Kǝmɗi fee nawaktǝ kussiˈ i Musa ɗar nanda, chokkinchi kǝɗ thla nawaktǝ kussiˈ i Musa ɗar indiyan (ngga tǝni ndat wa, kussiˈ i Fartǝs nech chit kurakta ǝ indinchi wa). Auwa, kussiˈ i Kǝristi mǝthlan chit kurakta ǝ ɗar indinchi, kǝthlǝm kǝ kaɓi fee nawakchi ǝ kan kussiˈ i Musa. 22 Mǝɗi fǝ kumi alkicha hur fǝr kit, chokinchi nggǝ Alkǝtinchǝs wa, kǝthlǝm kǝ kaɓi fee nawaktǝ alkǝtˈyandǝsi kǝmɗi Chinda Yesu Kǝristi. Chokinchi kǝ weˈti chika mii mǝɗi chikawun weˈti nefa kǝthlǝm chika kǝni kǝ hǝraˈani fowuna. 23 Thlǝ chichi ichiɗiya nat, kǝthlǝm kusheˈti kwasti ndikta thla nech mbinchan yi sǝkta. Kǝ sǝkki mbǝn kǝnau pafǝn i kusheˈti kwasti ndikta thla nech mbinchan yi sǝkta, tǝ takǝɗ nafcha.

24 Awi, sǝnwowun wa, ǝ mǝt tarak rakata, nat fǝ rakecha thlǝ rakechanda, paɗ arta ndak thlǝ mbǝschi ǝnɗi tahsandǝ fee tandǝ ha? Kǝɗu, nakowun kweˈtǝha tǝ rakata kǝthlǝm kǝ mbǝswun ǝnɗi tahsandǝ fee ha. 25 Chikawun thlǝ rakata thlǝ eltanchan indiyan kaˈan ǝ hur chikayen mbenna. Thlǝ chichandǝ kǝɗu kǝthlǝm kǝ mbǝsndǝ fatǝ inɗi thlǝ sǝɓchi kaɗi. Nggaˈan paɗ fatǝ indiyaˈan ngga thla thlǝ sǝɓchi kaɗ wa. 26 Kǝthlǝm ndaˈan rakatinchi ngga wa mǝtsi nati saˈta wa. Yandinchi paɗ ngga rinna thlǝ nati thlǝfta wa. 27 Paɗ thlǝ eltanchi fatinchi kǝ nggǝranni kaɗ kǝ mafatinchi, kǝthlǝm kǝrsi ɓasinchi kǝmɗi fowun, nggǝt tǝ indinchi kǝ ˈyatichifee mbǝs ǝnɗi tahsandǝ fee ha wa.