1 Wanmanchina hǝssǝ tǝ nǝssa, yahchisi kǝ sǝnwun, ndat wa, kakechimǝn nat wiˈchandǝ ǝ kan husaba, nat ndǝ paɗ mbǝrchandǝ ha tǝ hur kufa. 2 Tǝmɗi mbǝrtiyandǝ ha ǝ hur husabiˈyan, tǝ hur kufiˈyan paɗ, chokkan kǝɗ tǝ chan fee tandǝ baptisma, chokkandǝ kǝ fǝ para Musa. 3 Nat nda sǝm kandǝ weˈtǝ ɗǝsǝmndǝ arta, yi shemeta. 4 Nat ndǝ paɗ si ndǝ ˈyamɗi fǝrandǝ Farta tanda. ˈYamɗi satndiya ɓechan kesh thlaˈtǝ hur nggwalɗi parech har tǝ tanda fartǝɗi nat ndǝ wiˈtǝ ǝ hur chanjeya. Nggwallan paɗ nech kǝ Kǝristi. 5 Nat nda sǝk ndǝ mbǝn ǝnɗi chandǝ Farta tanda, paɗ, terchan hur nanda chǝndǝ ǝnɗi mbǝnawakchi Farta fa. Kǝthlǝm ndaˈan mǝmatakanda, mǝmatechaˈan chǝk tǝ yenni ǝ hur chanjeya.

6 Nat ichiɗi sǝɓchiya, chok ndǝ kǝ ǝna chaˈata mǝɗiyamǝn, kǝthlǝm kǝ ɗǝfmǝn wanɗikaɗatˈyamǝn kǝ ɓǝra sǝɓtǝ icha wa, kǝɗ thla chit nda wa. 7 Kǝ chok wun kǝ fǝ para ɗǝhacha wa, kǝɗ thla chok tǝ fowun hur nanda wa. Kǝɗ ǝnɗi natǝn kǝ yaraɗan hur ndikti Farta ndat wa, “Chok nafchaˈan ha, sǝm kanda, saa kanda, yim kandǝ kǝ rǝɓta tǝ chǝt ichǝ sam samǝn.” 8 Mǝ yim mǝn kǝ tar fǝlaukǝta wa, kǝɗ thla chit fowun hur nanda wa, chich mǝrtǝ nafcha aru kumchit chap nggǝrsi mahkan (23,000), fartǝ arta. 9 Mǝ kaɗamǝn Chinda wa, kǝɗ ǝnɗi chit fowun hur nanda wa, chich ɓǝlandǝ wuruɓchǝ tanda wa. 10 Kǝ fathlamǝn mee kǝɗ ǝnɗi chǝt fowun hur nanda wa, chich ɓa thlǝ thlǝndǝ Farta ɓǝlandǝn tanda wa.

11 Ichiɗiya sǝɓchan tǝ kakechmǝn, kǝ chok kǝ saktaˈan mǝɗiyamǝn. Paɗ yaranchi fee ha kǝthlǝm kǝ tǝɗan fee thlǝmechˈyamǝn, nggǝmǝn tǝɗi ɓa yuwa hǝshiɗiya mbǝsamǝn ndǝ ha. 12 Kǝthlǝm ndaˈan maa thlǝ sakchowa necho kit kaˈan, chǝko hǝɓakka mǝ hǝminhawa. 13 Kaɗatsi tamchǝ mbǝswunchǝ, thla sǝnwak tǝ fee ha tǝ cha ndǝ nefa wa. Farta thlǝ ɗǝf mee nakan, nen malanchǝ kǝ kaɗowunchǝ fee thla nech mbǝrandǝ alkǝtˈyowun ha wa, paɗ kǝ ɗar kaɗaɗan, nan inowun mban hǝraˈtǝsi tǝ paɗ kǝ kǝrǝswun.

14 Kǝthlǝm ndaˈan, kun tǝɗi yahti, mbǝham langngǝ tǝ para ɗǝhacha. 15 Nechi ndiktǝ tǝ wunchi, kun tǝɗi kǝsanchǝ hur inchiyowun. Ɗǝpaman kun tǝ iɗiyowun kǝ nowun ǝnɗi thlǝ mbuˈti, ndu kit, ndu ngga kit wa. 16 Tǝp saaˈem ini yi usoko, thla thlǝ chandǝ mǝn usoko Farta kǝthlǝm ndaˈan, awi ngga ndaˈan thlǝ ɗǝf chǝ mǝnchǝ kǝ namǝn arta hur feri Kǝristi wa? Ɓilsheɗi thlǝ chichendǝ mǝn ha paɗ ngga ndaˈan thlǝ ɗǝfchǝ mǝnchǝ kǝ namǝn arta hur fati Kǝristi wa? 17 Kǝthlǝm nechamǝn terchan, thlǝ kangchamǝn ɓilshet arta, chokkanmǝn kǝ fat arta.

18 Ɗǝpaman nati nafchi Israˈilawecha. Awi, tandiɗi sǝmcha ɓǝra thle ichiɗi fǝrtǝ fee, ngga tǝ nandǝ chit thlǝrɗakta tǝ thla fǝrandǝ fee thle ɓǝra icha wa? 19 Mǝ nati sakta ǝ minni? Ənɗi fǝrandǝ fee ɗǝhata ndaˈan nech kǝ kapa ǝna wa? Ndu ɗǝhataˈan nech kǝ kapa ǝna wa? 20 Auwa, chǝk ngguɗyeh. Ichiɗi thlǝ fǝrtǝ fǝ para ɗǝhacha yi thle ɓǝracha, tǝthl fǝrandǝ hwaˈarcha, ngga Farta wa. Yah wisi kǝ chok wun nggitkyekta arta tǝ ɓǝɓi shemeta wa. 21 Mbandǝs natwun sat hur tǝɓ saˈema kǝthlǝm kuɗuktǝ tǝ Chinda Yesu, kǝ nggǝrwun sat hur yi hwaˈarcha wa. Mbandǝs natwun kang ɓilsheta yi kuɗuktǝ tǝ Chinda Yesu, kǝ kang wun yi hwaˈarchǝ paɗ wa. 22 Ndu tǝ namǝn patandǝ Chinda Yesu kǝ sǝɓan tǝ hwir kaɗ wa? Tǝ pǝɗamǝn ha tǝ alkǝta wa?

23 “Nat icha nggǝman fee ˈyamǝn,” paɗ ngga nat icha nech tǝ nafu fa wa. “Nat icha nggǝman fee ˈyamǝn,” paɗ ngga nat ichǝ thlǝ tǝnancha wa. 24 Kǝ ɗǝf yowun hur wun wanɗǝkaɗatsi kǝ ɗar ǝnɗi nech kǝsandǝ indiyansi ndak wa, paɗ kǝ kǝsanchǝ wanmanansi.

25 Kangam nat ǝnɗi thlǝ hǝyandǝ fee kaɗi, mǝt hǝyandǝ thlǝu kaɗi, ngga nwaat kǝ chǝhowun wa, ndu keˈke, ndu ngga keˈke wa. 26 Kǝthlǝm ndech ndikti Farta wa, “Heshiɗiya tǝ ichiɗi nech huran nat yi Chinmǝn Farta.”

27 Maa i thlǝ kumi fǝr kit wunchi kǝ sǝm ǝna, yahkowunsi kǝɗuwun, sǝm kowun nat weˈtǝ ǝnɗi fǝrowun ndǝ fee. Sǝmama, ngga tǝ chǝhamee, ndu kimsi, ndu kǝmwasu wa. 28 Maa ndowunchǝ ˈyowun nefa wa, “Fǝr chǝ fee thle ɓǝra ichiɗiya kǝmɗi ɗǝhacha,” kǝɗu, kǝ sǝmwun wa, kǝthlǝm ɗǝbandǝ maandi nef inni nech mbuˈowun nda, tǝ paɗ shemeta. 29 Ngga shemetˈyowun nati ndikti kǝ ɗaran wa, paɗ shemeti nafɗi mbuˈowuncha. Kǝthlǝm mǝ naa sakti wanɗikaɗati ˈyowuna ˈyati ǝnɗi yahti chita? 30 Maa sǝminchi ɗisǝmnan tǝ usoko kǝmɗi Farta, kǝthlǝm mǝ naa fee ˈyara nenchi kǝ ɓǝra ǝnɗi chandi Farta usoko kǝthlǝm ndaˈan? 31 Kǝthlǝm ndaˈan, nat ǝnɗi nat wun chita, ndu sǝmnda, ndu sata, cham chika mǝ nat kǝthlǝm manandǝ Farta. 32 Kǝ chokwun kǝ ǝna che wan sarti Yahudawecha wa, ndu pong nafcha, ndu nafcha fǝ para Farta. 33 Cham kǝɗ ǝnɗi thlǝ chiti. Kweˈyamha kǝ ɗǝf wun chikawun kǝ sǝktǝ mbǝnwunfa. Kǝthlǝm nggǝt chit ǝnɗi nech tǝrandǝ wanɗikaɗati nafchǝ ha, ngga kǝthlǝm kǝt indinchi nati chita wa. Thlǝ chichi kǝthlǝm nafchi terchan kǝ mbǝndǝfa, kǝ mbǝsndǝ shishingnda kǝ kweˈkǝchi.