1 Kweyamha tǝ yah nafcha. Paɗ kǝ kweˈwun ha tǝ kaa fǝr ichiɗi thlǝ fǝrandǝ Shemeti Farta nafcha. Kapaɗan yi mbuˈ thlǝndi Farta. 2 Kǝthlǝm thlǝ shenuˈti tǝ wanshenuˈta thla thlǝ sǝnwaktǝ fee, ngga nafchǝ natǝn shenuˈandata wa, tǝ Farta natǝn shenuˈta. Kǝthlǝm nefsi thlǝ sǝnchǝ ǝnɗi natǝn mbuˈta wa, nakan tǝthl mbuˈtǝ wuɓtǝ icha tǝmɗi alkǝti Shemeta. 3 Thla thlǝ mbuˈchǝ thlǝndi Farta, tǝn ndiktǝ tǝ nafcha kǝthlǝm kǝ tǝnanchǝ tanda, kǝ chekanchǝ tandǝ alkǝta, kǝ ndǝksanchi wanɗǝkaɗechˈyanda. 4 Thlǝ shenuˈtǝ tǝ wanshenuˈtǝɗi thlǝ sǝnwaktǝ fee, tǝn tǝnaɗǝ indiyan. Thlǝ mbuˈ thlǝndi Farta, tǝn tǝnadǝ nafcha fǝ fǝr kit cha. 5 Karwi fa wa chika wun ǝ hur wun, kǝ mbahǝntǝ shenuˈta tǝ wanshenuˈtǝɗi sǝnwaktǝn. Paɗ ǝnɗi kapati yahta kǝ mbuˈwun thlǝndi Farta. Thla thlǝ mbuˈchǝ thlǝndi Farta pǝɗantǝ thla ha thlǝ ndikchǝ tǝ wanshenuˈtǝɗi sǝnwaktǝn. Maa ngga tǝn yowunsi nech nggǝrandǝ ndiktaˈan kaɗi, kǝthlǝm kǝ tǝnanchǝ nafcha fǝ fǝr kit cha.

6 Wanmanchina, nakanya, maa ǝ ɓinchǝ naa ndiktǝ tǝ wunchǝ tǝ wanshenuˈcha, tar mǝ nati chowun nda, maa mbuˈowun wi saktǝ wanshenuˈchaˈan wa? Maa ngga maa ɓinchi tǝ thlǝndi Farta, tǝ sǝn ǝna, tǝ chaˈandǝ kaɗi, ndaˈan nech kǝsowundǝsi. 7 Kǝɗu natǝn tǝ ichiɗi nawaktǝ shishingndǝ fiyanda kǝɗ shilata tǝ kǝleya. Maa chewu ɓǝratiyandǝ kesh kaˈan wa, kǝn naa yowun sǝn saktǝ ǝnɗi naa fee fǝta ndu peta? 8 Maa pewu fee ɗiptaˈan ǝ mbanɗi kǝmchǝs wa, wun nech tahǝsfa kǝthlǝm yaanda? 9 Kǝɗu natǝn paɗ kǝmɗiyowun, maa shǝnuˈwun tǝ miɗi thlǝ sǝnwaktǝ fee, nech fee sǝn ǝnɗi nat wun mbuˈta wa kǝni? Ndikchowun pafǝn kǝɗu hacha. 10 Miichǝs samǝn samǝn hur heshi, yowunsǝ nawaktǝ sak taˈansǝ wa. 11 Maa paɗ sǝkwi miiyan wa, chokki kǝ rema kǝmɗi thlǝ ndiktaˈan, thlǝ ndiktaˈan paɗ chok kǝ rema ǝ mǝɗinchi. 12 Kǝɗu natǝn paɗ mǝɗˈyowun. Nakan wa kun kwalfa mbǝs fǝr icha yi Shemeta, kweˈkowun ha kǝ kowun fǝr icha yi Shemeta, thla nech tǝnandǝ nafcha fǝ fǝr kit cha, kǝ thlarndǝ ha tǝ alkǝtfa.

13 Kǝthlǝm ndaˈan nat thla thlǝ ndikchǝ tǝ wanshenuˈtǝɗi sǝnwaktǝ fee, shenuˈkan tǝ Farta kǝthlǝm kǝ fǝran fee sǝnan kǝ mbahǝn tǝ nggǝrandǝ kaɗi kǝ sǝn fee. 14 Maa shenuˈinchǝ tǝ Farta tǝ wanshenuˈtǝɗi thlǝ sǝnwaktǝ fee, shemetinchǝ nech shenuˈtǝ tǝ Farta, paɗ kaɗatinchi chok wa hur shenuˈtǝ tǝ Fartaˈan wa. 15 Kǝɗu, mǝ nati chita? Nii shenuˈtǝ tǝ Farta tǝ shemetinchi, tǝ kaɗatinchi paɗ. Nii inˈyamǝs maanandǝ Farta tǝ shemetinchi, nechi chǝt tǝ kaɗatinchǝ paɗ. 16 Maangga kǝɗu wa, maa cheen Farta usoko tǝ shemetˈyo ndak, kan tǝ kǝni thla nech kǝ yuwa tǝrtǝ ha nech ndat wa, “Kǝ chok kǝɗu” kǝ ɓǝra usoko tǝɗi natu chita, maa sǝn wa ǝnɗi natu mbuˈta wa? 17 Chika nakan wa cheen Farta usoko kaˈan, ai, wanmu chek wa tǝ ǝna wa.

18 Chani Farta usoko kǝthlǝm thlǝ ndikchi tǝ wanshenuˈcha mǝni chika wun hur wun nat. 19 Nat tǝ kǝɗu, ǝ nggomndi nafcha fǝ fǝr kit, yahchisi kǝ mbuˈi ndikchǝ ɗǝrman tǝ kaɗatinchi kǝthlǝm kǝ chaˈani fowun har, mǝ kǝ mbuˈi ndikchǝ aru kum (10,000) ǝ hur wanshenuˈtǝɗi sǝnwak tǝ fee.

20 Wanmanchina hǝssa tǝ nǝssa, kǝ chok kaɗatˈyowun kǝɗ yi wan wancha wa. Tǝmɗi chǝt ɓǝɓifata, kǝ chok wun kǝɗ wan waˈyaarcha, paɗ kaɗatˈyowun kǝ chok kǝ yi paktecha. 21 Nechan kǝ yaraɗan hur Laulawati Farta, ndat wa,

22 Kǝthlǝm ndaˈan, ndikta tǝ wanshenuˈtǝɗi sǝnwak tǝ fee, kapa ǝna saka inda kǝmɗi fǝ kumi fǝr kit, ngga kǝthlǝm fǝ fǝr kit cha wa. Mbuˈ thlǝnɗi thlǝt fee mǝɗi Farta, kǝthlǝm fǝ fǝr kit cha, ngga kǝthlǝm fǝ kumi fǝr kit wa.

23 Kǝthlǝm ndaˈan, maa ǝ nggom nafcha fǝ fǝr kit cha kǝ mǝt arta. Chikawun paɗ ndikta tǝ wanshenuˈtǝɗi thlǝ sǝnwak tǝ fee, ɓak fee nech kǝ yuwa tǝrtǝ ha, ndu fǝ kumi fǝr kit yimkandǝsi. Awi, nggandǝ nda wa, tǝ tǝrwun kafǝrta wa? 24 Paɗ maa chikawun mbuˈ thlǝnɗi thlǝt fee mǝɗi Farta, thlǝ kumi fǝr kit, ndu thla sǝnwakchi ǝnɗi nafee chita yimkansi, tǝkan kǝ ndikti chikawun herfa ǝ hur wanɗǝkaɗatˈyan. Maa kǝɗu, ndiktiyowun nat, ɗǝftǝ anchi kǝ tǝr tǝ ha. 25 Wuɓtǝ ǝnɗi nech hur wanɗǝkaɗatˈyan nan chet kesh hayang, tǝ kǝɗu hǝmkan ha, nakan manandǝ Farta, nakan ndat wa, “Kittaˈan Farta ǝ pǝthlǝr wun.”

26 Kǝɗu, mǝ natmǝn ndat hacha, wanmanchǝna? Fartǝɗi nggomndǝwun ha, yowun ˈyamǝs maanandǝ Farta yansi. Yowun chaˈandǝ ndikti Farta kaɗi, yowun paɗ mbuˈ thlǝnɗi thlǝt fee mǝɗi Farta, yowun ndiktǝ tǝ wanshenuˈtǝɗi thlǝ sǝnwak tǝ fee, yowun paɗ nggǝrandǝ ǝnɗi mbuˈtǝ fee. Mallan kǝ chǝ fee chǝka mǝ nat kǝthlǝm tǝnandǝ nafcha fǝ fǝr kit. 27 Maa fowun sǝ nech ndikta tǝ wanshenuˈtǝɗi thlǝ sǝnwak tǝ fee, mǝ pǝɗandǝ nef ha chap ndu mahkan wa, kǝ chǝndǝ paɗ artǝ arta, chok nwaat yowun kǝ nggǝranchǝ ǝnɗi mbuˈ tǝ nda. 28 Maa thlǝ nggǝrandǝ wanshenuˈtaˈansi kaɗ wa, chǝkawun hur nanda nggaskan ɓaˈ hur nafcha fǝ fǝr kit. Kǝ ndik tǝ Farta hur wanɗǝkaɗatˈyan ndak.

29 Fǝ mbuˈ thlǝnɗi thlǝt fee mǝɗi Farta, chokkan nafchǝ chap ndu mahkan kǝ ndik nda, kaɗankǝ fowun ha hur nanda saktǝ ǝnɗi mbuˈtǝ feyu. 30 Maa fǝran Farta thla ɗas hur wun sǝn ǝnɗi thlǝ mbuˈtǝ fee, thla tǝr kwathl kanan nech ndiktiyu nggas kan ɓaˈ. 31 Nat wun thlǝ mbahǝnchowun mbuˈ thlǝnɗi thlǝt wun mǝɗi Farta artǝ arta, thla naa chǝkawun mbǝs chaˈata, kǝ ndǝkǝsfa paɗ.

32 Nat thla thlǝ thlǝch thlǝnda mǝɗi Farta, alkǝtˈyansi kǝ ɓǝra shemetˈyan. 33 Kǝthlǝm Fartiyamǝn ngga Farta thla thlǝ sakech ha wa, thlǝ yahchan kǝ chok fee hur hashas kǝta.

Nechan kǝɗu paɗ hur nat nafcha fee chǝɗchǝɗ i Farta, 34 kǝmchansi nǝssa kǝ nggasndǝ ɓaˈ hur nggomnda. Kǝthlǝm fǝrawu fee tandǝ mbandǝ kǝ shenuˈ nda wa. Kǝ parandǝ tǝ kusiˈ tǝɗi mbuˈtǝ Musa. 35 Ma ǝnsi yahtǝndǝ sǝnda, kǝɗu, chahan kandǝ hǝsǝyandǝ ǝ wiri. Kǝthlǝm ǝna hartǝfata nunefa kǝ shenuˈ hur nggomndi fǝ fǝr kit cha.

36 Ə ɗar indiyowun nggak tǝ ndikti Farta wa? Ndu nggun ichǝtwun saˈtǝ ndiktaˈan kǝmɗiyowun wa? 37 Maa artǝs hur wun yowunsi thlǝ kaɗech wa thlǝ thlǝt thlǝnda nakan mǝɗi Farta, ndu thlǝ fǝrti Farta yi shemeta, kǝɗu, sǝnkan tǝ ndat wa, ǝnɗi nati yarowundǝs ya ǝnɗi mbuˈtǝ Chinda Yesu tǝ indiyan. 38 Maa ǝ kar yowun ndǝ mbat har tǝ thleya, mǝthlan paɗ kǝ nggǝmwun ndǝ fa wa.

39 Kǝthlǝm ndaˈan, wanmanchina, ɗǝfam wanɗǝkaɗatsi kǝ mbuˈ thlǝnɗi thlǝt fee mǝɗi Farta, mǝ ˈyatowun ndiktǝ tǝ wanshenuˈtǝɗi thlǝ sǝnwak fee wa. 40 Kǝ chǝ fee chikami ǝ mbanɗi kǝmchisi. Kǝ chǝ fee artǝ arta.