1 Nakanya, wanmanchina, ni kuɗukowun kusheˈtǝ kwastǝ ndiktǝɗi ɓasowundisi, thla thlǝtwun natwun parat paɗ. 2 Tǝmɗi kusheˈtǝ kwastǝ ndiktiˈini thlǝ mbǝstǝ wun hǝraˈta, tǝ shishingnda kǝ kweˈkǝchi, maa chok wa thlǝ kǝs chowun ndiktaˈan har kaˈan thla ɓasowundisi. Mangngga kǝɗu wa, fǝr kit ˈyowun mere.

3 Ndiktǝɗi nech kǝ kittaˈan thla thlǝti, ndaˈan furowundi. Ndat wa, Kǝristi mǝrchan kǝthlǝm ɓǝɓifechˈyamǝn. Kǝɗ ǝnɗi natǝn kǝ yaraɗan hur Laulawati Farta. 4 Ndat wa thlohan fee, thlaˈan kǝ fee ǝ mǝrta far mahkanda, kǝɗ ǝnɗi natǝn kǝ yaraɗan hur Laulawati Farta. 5 Paɗ pǝn tǝ fat kǝmɗi Kefas, kǝnan nggǝr pǝn fat kǝ takǝɗ kum nggǝrsi chaptaˈan. 6 Kǝrsǝ ndaˈan, pǝn tǝ fat kǝmɗi wanmancha fee mbǝranchi kum chit kum ɗǝrman ha (500). Tertǝnanda paɗ peˈndǝ ha tǝ shishingnda, fowun paɗ hur nanda mǝrnda. 7 Kǝrsǝ ndaˈan, pǝn tǝ fat kǝmɗi Yakubu. Kǝnan nggǝr pǝn indiyan paɗ kǝmɗi tatǝ kǝmsichiyan nat. 8 Ə ndukwaɗan nat, pǝn tǝ fat kǝmɗinchi. Chika nakan wa nggǝt nafɗi nggǝt tǝ fee, fartǝɗi kǝmwakchisi.

9 Kǝthlǝm nggǝt nech ngguɗyeh hur tatǝ kǝmsichi Kǝristi. Kǝmwasi kǝ i fee nenchi wa tatǝ kǝmsha i Kǝristi wa. Kǝthlǝm ɓahani nafcha fǝ para mbanchi Farta. 10 Paɗ kǝthlǝm kaakǝti Farta chokti kǝɗ ǝnɗi nati, kaakǝt ini chitǝn yu ngga mere wa. Thla chich pǝɗandi chikayen hur tatǝ kǝmshichi Kǝristi ha, tǝ tera, chika ndaki kǝɗu ngga nggǝt chǝt taran wa, Farta chicha tǝmɗi kaakǝtˈyan tǝmɗinchi. 11 Kǝɗu, ndu nggǝta, ndu tanda mbuˈowunchi kwastǝ ndikta yi sǝktaˈan, ndiktaˈan arta. Kun paɗ fǝr wun kitsi.

12 Ma fee ɓaasa ndat wa, thlaˈan fee Kǝristi ǝ mǝrta, mǝchicha thlǝ nda fowun hur wun wa, thlaˈti mǝmatechǝs wa? 13 Maa thlaˈtǝs ǝ mǝrta wa, pǝnchansǝ wa, thlaˈa wu fee Kǝristi ǝ mǝrta wa hacha. 14 Maa thlaˈa wu Kǝristi ǝ mǝrta wa, awi, ɓasiyaˈan kǝmɗi nafcha mere, fǝr kit ˈyowun paɗ mere. 15 Chokchan wa tǝ naˈan lekandǝ Farta kaf hacha wa, kǝthlǝm thlǝ nechaˈan ɓaasa wa, Farta thlaˈantǝ Kǝristi ǝ mǝrta. Maa chok wa kit thlaˈtǝs, ǝ mǝrta wa, pǝnchansǝ wa thlaˈa wa Kǝristi ǝ mǝrta wa hacha. 16 Kǝthlǝm maa thlǝ thlaˈa wu fee mǝmatecha wa, awi, chika Kǝristi maa thlaˈa wu fee ǝ mǝrta wa hacha. 17 Maa thlaˈa wu fee Kǝristi paɗ wa, awi, fǝr kit ˈyowun mere wa, paˈya nggun hur ɓǝɓifechˈyowun. 18 Awi, fee thlich Kǝristi kǝnandǝ mǝrta, tǝ mǝrndǝ poriˈ hacha wa. 19 Maa ɗǝf wanɗǝkaɗat ˈyamǝn kǝ Kǝristi kǝthlǝm naaɗi ha hur heshiya ndak, awi, chok mǝn kǝ ǝna ai kaˈan mǝ takǝɗ nafcha.

20 Kittaˈan, thlaˈan Farta Kǝristi ǝ mǝrta. Mǝthlan nech kǝ tǝrkwathl kanan hur fee mǝrcha, thla thlaˈandǝ fee ǝ mǝrta. Chok kǝɗ nǝha tǝrkwathl kanan thla fǝrandǝ fee Farta. 21 Kǝɗ ǝnɗi natǝn wa ɓech mǝrta tǝmɗi nefa, kǝɗu paɗ thlaˈtǝ ǝ mǝrta ɓechan tǝmɗi nefa. 22 Nakan mǝrchǝ nafchǝ nat tǝmɗi Adamu, nech nafchǝ nat thlaˈtǝ paɗ nat tǝmɗi Kǝristi. 23 Ne chok wuweluˈawa. Chika wuni naa fee thlaˈanda arta kǝrsǝ arta. Kǝristi nech kǝ tǝrkwathl kanan, fartǝ ɓatˈyan kaɗi fee fǝr chǝ kit kǝ anchi fen paɗ nandǝ thlaˈta. 24 Kǝn ndukwaɗan ɓata, kǝrsǝ fǝran Chinan Farta kutǝrakta. Nan fǝr kutǝraktaˈan kǝrsǝ wellandǝ kutǝrakta, tǝ manda, tǝ alkǝta. 25 Kǝthlǝm nwaat kǝchǝ Kǝristi kutǝrakta, har kǝ saˈ fartǝɗi naa Farta ɗǝf atǝkrechiyan kǝ kan sarchiyan. 26 Atǝkrekǝɗ ɗi nafcha naa fee paˈandǝ kaɗ ǝ ndukwaɗan, mǝthlan nech kǝ mǝrta. 27 Chokchan kǝɗ ǝnɗi yarandǝ fee ha hur Laulawati Farta ndat wa, “Farta ɗǝfti chikamǝ nat kǝ kan kutǝrakti Waˈyan.” Kǝ yaran kǝ fee kǝɗu, pǝnchan wa nat icha nandǝ kaa thlǝmat ha kǝ Yesu, ngga Farta nech koptǝ ha pangngǝn Yesu wa, kǝthlǝm Farta nech ɗǝf ichǝ nat kǝ kan kutǝraktiyan. 28 Kǝrsǝ ɗǝf chikamǝ nat kan kutǝraktiyan. Wanan tǝ indiyan nan fǝr indiyan kǝmɗi Farta, thla fǝrtǝn ichǝ nat kǝ harˈyan. Kǝthlǝm Farta kǝ wathlanchi ha wa mǝthlan nech kǝ chikamǝ tǝ mii.

29 Maa ngga kǝɗu wa, mǝ nech kǝ sakti nafchǝɗa, fee chandǝ fee baptisma tanda kǝ kǝthlǝm mǝmatecha? Maa nggǝ thlaˈti mǝmatechǝs wa, kǝthlǝm mǝ thlǝ chandǝ fee nafcha baptisma kǝthlǝm tanda?

30 Maa nggǝ thlaˈti mǝmatechǝs wa, kǝthlǝm mǝ paɗ thlǝ natmǝn ɗǝf indiyamǝn kǝ hur kuɓa shishingndǝ chǝk yen wanshengnda? 31 Wanmanchina, nggǝt mbuˈowunda, nggǝt mǝrta chik yen parta. Ni mbahǝn mbuˈtǝ kǝɗu tǝ alkǝta, kǝthlǝm sǝnɗi nessǝnchǝ tǝ wunchǝ hur Kǝristi Yesu Chǝnmǝn. 32 Fartǝɗi nati Afisa, nafchǝ terchan karndǝ ndiktinchi. Kǝnden wa kǝɗ tǝ yani tǝ thlǝu hur hwalichǝɗi nech tǝ yandǝf kaˈan. Kǝɗu maa thlaˈti mǝmatechǝs wa, mǝ nech nat kǝ chektaˈan inchi?

33 Kǝ lǝm fee wunchǝ wa. “Choktǝ tǝ ɓǝɓi nafcha, thlǝ sǝɓanchan nafchǝɗi kaɗ naa hur inchiyandǝsi.” 34 Mbam kaɗ kǝ hur inchiyowun ndiˈchan. Kǝ ɗǝwun kǝ pang tǝ chǝt ɓǝɓifata wa. Kǝthlǝm fowun hur wun sǝnwandǝ Farta wa. Mbaˈchi kǝɗu kǝthlǝm kǝ harowunchǝ fata.

35 Maˈ kǝ chǝh yowun nef mee kǝ nda wa, “Kǝn naa nafɗi mǝrcha thlaˈtǝ ǝ mǝrta? Tǝ weˈtǝ faami natǝn thlaˈta?” 36 Chǝ ɓam nefa, ǝnɗi hǝftu, nwaat kǝ mǝr kwaɗǝn kǝnan tǝfta. 37 Ənɗi hǝftu paɗ, nggen tif kesh tǝ faɗi hǝftu wa. Weˈtǝ ndak natu hǝfta, ndu yi hwerma, ndu tǝ weˈtǝ samǝn. 38 Paɗ Farta thlǝ fǝranchǝ wanan saˈchiyan kǝɗ thla yahtǝn. Chika yen wanan tǝ weˈtǝ saˈchiyan. 39 Ngga nat fata weˈtǝ arta wa. Nafcha weˈtǝ yinandǝsi. Ɗǝparecha tǝ weˈtǝ yinanda. Ɗǝngchǝ tǝ weˈtǝ yinanda. Yirǝfchǝ paɗ tǝ weˈtǝ yinanda. 40 Weˈtǝ fatsi yi hulafǝrta, neˈsǝ paɗ weˈtǝ yi hur heshi. Yi hulafǝrta, maandiyansi, yi hur heshi paɗ, maandiyansi samǝn. 41 Watfarta maandiyansi samǝn. Ndǝr paɗ maandiyansi samǝn. Wanndǝr paɗ maandiyansi samǝn. Yowun wandǝra maandiyansi, yowun paɗ tǝ maandiyan samǝn.

42 Kǝɗu natǝn tǝ thlaˈta ǝ mǝrta. Faɗi naa fee thlohanda, ǝna thla nech mǝthlǝ kaɗi. Faɗi naa fee thlaˈanda ǝ mǝrta, mǝthlan mǝthl wa kaɗ wa. 43 Fartǝɗi naa fee thlohandǝ faɗan maandiyansǝ wa, fartǝɗi naa fee thlaˈanda nan choktǝ tǝ maanda. 44 Thlǝ thlohanchi fee fata yi tapta, thlǝ thlaˈanchi fee fata yi Shemeta.

Nakan fatsi yi heshiɗiya, kittaˈan fatsi yi Shemet paɗ. 45 Kǝɗu natǝn kǝ yaraɗan, “Farta tǝntǝ Adamu thla fǝrandǝ fee shishingnda tǝrkwathl kanan.” Chapatǝ Adamu paɗ, mǝ thlan nech kǝ Shemeta thla thlǝ fǝranchǝ nafchǝ shishingnda. 46 Ngga fata yi Shemeta nech kǝ tǝrkwathl kanan wa, paɗ fata yi nafkǝta lech natsi, kǝn yi Shemeta. 47 Tǝrkwathl kan nefa tǝ taptǝ haaha chǝt fee ndi. Chapatǝ nef paɗ thlaˈtǝ hulafǝrta ɓatǝn. 48 Kǝɗ ǝnɗi naa nafɗa kǝ taptǝ haaha, kǝɗu nafchiɗi nech kǝ yi tapta, nechandǝ kǝɗ mǝthlan. Keɗ ǝnɗi naa nafɗa kǝ yi hulafǝrta, kǝɗu naa nafchiɗi nech kǝ yi hulafǝrta nechandǝ choktǝ kǝɗ mǝthlan. 49 Kǝɗ ǝnɗi tǝr tǝmǝn fata yi nafɗi tǝndǝ fee tǝ tapta, kǝɗu paɗ natmǝn tǝr fati nef ini thla nech hulafǝrta.

50 Ənɗi thlǝ mbuˈowundi hacha, wanmanchina, faaɗi tǝndǝ fee tǝ tapta thla naa fer fiyan, nggen yim kǝ maandi Farta wa. Ngge chǝ wa, chǝk ngguɗyeh. Kǝɗu paɗ thla thlǝ mǝthlchi kaɗi, ngge sǝm kǝrsǝ mǝrtǝ maandi thla thlǝ mǝthlǝ wakchi kaɗ wa.

51 Kam thlǝ mat haa, ni mbuˈowun wuɓtǝ ǝna yowun. Ngga nat mǝn nech mǝrta wa, paɗ natmǝn naa fee mbeɗandǝ fat ˈyamǝn ha. 52 Nechan choktǝ kǝɗ pǝthl wiɗ tǝ wenita, tǝ sǝk ɓǝratǝ mbeembeta yi ndukwaɗan. Kǝthlǝm naa fee peendǝ mbeembeta, mǝmatecha nandǝ thlaˈta tǝ weˈtǝ faaɗi thlǝ mǝthl wakchi kaɗi. Nggamǝn paɗ naa fee mbeɗandǝ fat ˈyamǝn ha. 53 Kǝthlǝm faaɗiyamǝn ya thla thlǝ mǝthlchi kaɗi, nwaat kǝ chok kǝ thla thlǝ mǝthl wakchi kaɗi. Faaɗi thlǝ mǝrchǝ paɗ nwaat kǝ chok kǝ faaɗi thlǝ mǝrwak cha. 54 Paɗ ǝ fartǝɗi mbeɗa faaɗi ha thla thlǝ mǝthlchi kaɗi kǝ chok kǝ thla thlǝ mǝthlwakchi kaɗi. Fat paɗ thla thlǝ mǝrcha kǝ chok kǝ thla thlǝ mǝrwakcha. Kǝn ndiktǝɗi nech kǝ yaraɗan hur ndikti Farta nan ndiiɗ ha. Thla yarandǝ fee ndat wa,

58 Kǝthlǝm ndaˈan, wanmanchina fee yahti, nggǝt mbuˈowun nda, thlaramha tǝ alkǝtfa. Kǝ ɗǝf ǝnwunchǝs kǝ mbuhowun kaɗ mǝɗi natwun wa. Chǝk yen parta, kǝnowun kweˈtǝ ha hur tarɗi thlǝ chandǝ wun Chinda Yesu. Kǝthlǝm sǝnwun wa tarɗi thlǝ chǝtwun kǝthlǝm Chinda ngga pafǝn wa.