1 Kǝɗu, kǝ ɓǝra nggom icha kǝthlǝm kǝsandǝ nafchisi fǝ fǝr kit cha kǝmɗi Farta, fee nech ǝ Urshelima, cham kǝɗ ǝnɗi mbuˈandi nafchiɗi nech hahi Galatiyawecha kǝ chǝnda. 2 Ə chǝka yen tǝrkwathl kan parta yi mǝndǝ muɗ, chǝka wun hur wun kǝ ɗǝf tǝ ǝn ha kǝ kǝlar keˈke tǝ alkǝtˈyan. Kǝthlǝm yah wisi kǝ nggom fee ǝna fartǝɗi ɓati wa. 3 Maa saˈinchi, nii thlǝn fee fǝr tǝ wun kit kǝ tanda, ɓukwa tǝ yarata. Kǝ ɗǝndǝ tǝ fǝr kǝnau pafǝn ˈyowun kǝ Urshelima. 4 Maa ndiˈchansi nggǝt paɗ kǝ ɗi, kǝɗu, pǝɗakandǝ ɓukwa tǝ nenchi.

5 Nii wiˈyowun ndǝfa, maa wiˈyani hahichi Makidoniya, kǝthlǝm harinchifa nii parat tǝ Makidoniya. 6 Maˈya kǝ mǝnii ɗǝmok ǝ mǝɗˈyowun, ndu kǝ choki tǝ wunchi kǝ tǝp fekta. Kǝthlǝm kǝ kǝsichǝ wunsǝ tǝ ǝnɗi yahti, yi wiˈtinchi thlaˈtǝ mǝɗa, kǝ mǝɗi nati ɗǝta. 7 Yah wisi kǝ niwunchi nakanya kǝ mbǝriha ndak wa, auwa, yahchisi kǝ mǝnii ɗǝmok tǝ wunchi. Maa nggǝman Chinda Yesu. 8 Nakanya nii thlartǝ ha ǝ Afisa, kǝ mbǝr fartǝ Pentakos (Mǝndǝ kum chǝt ɗǝrman kǝrsǝ mbǝnfa tathlǝ ha). 9 Kǝthlǝm ini chǝ Farta kapa mbandǝsi, kǝthlǝm kǝ chi tarɗi nech nat tǝ naafu fa, paɗ atǝkrechinchǝs terchan. 10 Maa ɓi Timoti, ɗǝfam ndǝ kǝ kaltǝ fat ha hur wun, kǝthlǝm mǝthlan maa tǝri Chinda natǝn chita kǝɗ ǝnɗi nati chita. 11 Kǝthlǝm ndaˈan kǝ njir yowun ndǝ wa. Kǝ kǝsawunsi tǝ ǝna wiˈta, maˈnan ɓak kaɗ kǝmɗinchi hur hashas kǝta. Nggǝt tǝ wanmancha, nggaˈan pǝk ɓatˈyan kaɗi. 12 Nakayan, kǝ ɓǝra wanmanmǝn Apolos paɗ, nggǝt shiyandǝ kaˈan kǝ ɓǝ kǝmɗiyowun tǝ takǝɗ wanmancha, kǝthlǝm yah wa ɓat nakan yawa. Nan ɓat fartǝɗi mbǝstǝn mbanda.

13 Kǝ chok wun tǝ tahǝsfa, kǝ thlarwun ha hur fǝrkit ˈyowun, kǝ pǝparowun ha wa, thlaram ha tǝ alkǝta. 14 Nat ǝnɗi nat wun chǝta, kǝ chǝwun hur kafata.

15 Kǝthlǝm ndaˈan wanmanchina, sǝnwun sǝwa nafchǝɗi nech hur wiri Istifanus fen nech kǝ tǝrkwathl tǝrtǝ ha ǝ hur hahi Akaya. Fǝrndǝ indiyanda kǝ ɓǝra chan ter Farta. 16 Nggǝt shiyowunda kǝ fǝrawun maandǝ weˈtǝ nafchiˈini. Kǝ fǝrawun maandǝ shikechi tarchi ˈyamǝn fee nech saa ɓahtǝ tǝ mǝnchi.

17 Chǝnchi mbǝnfata tǝ ɓati Istifanus, tǝ Fartunatus, tǝ Akaikus. Ɓatˈyanda, chichǝf kǝɗ kun ɓech kǝmɗinchi. 18 Tǝrandǝ wanɗǝkaɗatinchi ha, kǝɗ ǝnɗi tǝrandǝ ndǝ wanɗǝkaɗatˈyowun ha. Weˈtǝ nafchiɗa kǝmchǝs kǝthl kuɗuk fee tǝ tanda, hur nggomndi nafcha.

19 Nafcha fǝ fǝr kit kǝmɗi Farta yi hahi Asiya tandǝ ndowun ǝn fa. Akila tǝ nuwan Biriskila, tǝ takǝt nafcha fǝ fǝr kit kǝmɗi Farta, fee nggomchǝ ha ǝ wirˈyanda, tandǝ ndowun ǝn fa kaˈan hur thlǝm Chinda Yesu. 20 Nat wanmanchǝmǝn tǝɗi mǝɗa, tandǝ ndowun ǝn fa. Kǝ ndawun ǝn raˈanfa hur yahraˈan kǝɗ wanchi Farta. 21 Nggǝt Bulus, nech yarowun ndaˈǝniɗasi tǝ herinchi.

22 Nat thla thlǝ mbǝn wakchǝ kafat kǝ Chinda Yesu, kǝ sǝɓan Farta kaɗi. Ɓo kaha Chinda Yesu.

23 Kaakǝti Chǝnmǝn Yesu, kǝ chok tǝ wunchi. 24 Kafaɗi nessinchi kǝthlǝm kun hur Kǝristi Yesu, kǝ chok tǝ wunchi. Kǝ chok kǝɗu.