Tǝrkwathl kan yarati
Yohanna
Tǝrkwathl kan ndikta
Ɗelwer tǝɗa, tatǝ kǝmsha Yohanna yarecha ǝ mǝrǝɓ Afisa. Yerech fee ɗelwer taˈan kǝthlǝm kǝ ndǝksan fee fǝ fǝr kitcha. Kǝ chǝndǝ thlǝrɗakta tǝ Farta tǝ Waˈyan Yesu Kǝristi. Ɗelwer taˈan paɗ ndik kǝ ɗar chaˈandǝ kaɗi yi lekta, thla thlǝ chǝt fee, kǝthlǝm kǝ sǝɓan fee thlǝrɗaktǝɗi kaɗ ya. Chaˈaɗǝ kaɗ yi lektǝ ɗa, mǝthlan ndat wa, yimwu Yesu kǝ hur heshi tǝ weˈtǝ fati nefa wa. Thlǝ yaraɗan wathlanchǝ tandǝ ha wa Yesu ɓechan hur fati nefa. Ndat wa, Yesu ngga nef kǝɗ takǝɗ pong nafcha wa. Yerech fee ɗelwer taˈan paɗ, kǝthlǝm kǝ ndǝksan fee fǝ fǝr kit cha, kǝ wathlandǝch ha paɗ kǝ ɓǝra fǝr kit ˈyanda. Kǝ yah ndǝ raˈan kǝɗ ǝnɗi yahtǝ Fartǝ tanda.
1
Ndikta i shishingnda
1 Nggaˈan yarowundǝs kǝ ɓǝra thla nech tǝrkwathl kan heshi mǝthlansi. Thla sǝktǝˈǝn tǝ thlǝmech ˈyaˈan, ɗǝpaˈǝn tǝ wenitiyaˈan, niiˈǝn ndi paɗ tǝka ǝn herfa tǝ harchiyaˈan. Mǝthlan thlǝ fǝrchǝ shishingnda. 2 Pǝn fee thla thlǝ fǝrchǝ shishing ngǝɗa hayan paɗ niiˈǝn ndi tǝ wenitiyaˈan. Nggaˈan ndik ǝnɗi sǝndǝˈǝn kǝ ɗaran. Nggaˈan ndiktǝ kǝ ɓǝra thla thlǝ fǝrchǝ shishingnda kǝ kwekǝɗan. Thla nech choh tǝ Chinmǝn Farta paɗ pǝnamǝnchǝ fee ndi kǝmɗiyamǝn hayan. 3 Nggaˈan sǝnowun ndǝs kǝ ɓǝra nafɗi natˈǝn tǝ wenitiyaˈan tǝ paɗ sǝkˈǝn ndi. Kǝthlǝm kun paɗ kǝ chokwun thlǝrɗakta tǝ nggaˈan. Chok thlǝrɗaktǝyamǝn mǝthlan tǝ Chinda Farta tǝ paɗ Wayan Yesu Kǝristi. 4 Nggaˈan yarowun ǝnɗisiya kǝthlǝm mbǝn fat ˈyaˈan tǝ yuwun kǝ ndiiɗ ha.
Farta ɗaˈkǝta
5 Thleya nech kǝ ndiktǝɗi sǝktǝˈǝn meˈi Wayan tǝ paɗ ndaˈan natˈǝn mbuˈowunnda. Farta ɗaˈkǝt nakan, ǝnsi wumanchǝ ha tǝ wuthla wa chǝk ngguɗyeh. 6 Maa ǝ ndimǝn wa nggǝmǝn chǝt thlǝrɗakta tǝ Farta, paɗ peˈkamǝn wiˈtǝ hur wuthla, pǝnchan wa namǝn lekta paɗ kittaˈansi hur natˈyamǝn ha wa. 7 Maa wiˈ mǝn hur ɗaˈkǝta, kǝɗ thla naa Farta kǝ ɗaˈkǝta, pǝnchansi wa nggǝmǝn chok thlǝrɗaktǝ tǝ raˈan. Feri Yesu Waˈyan ɗǝftǝ minchi kǝ namǝn chiɗ chiɗ ɗar chǝka yen ɓǝɓifata.
8 Maa ndimǝn wa ɓǝɓifatsi fiyamǝn wa, chokchan tǝ namǝn lǝm indiyamǝn, paɗ kitsǝ hwirˈyamǝn wa. 9 Maa mbuˈamǝn Farta ɓǝɓifechˈyamǝn nat, Farta thlǝ kafata, thlǝ thlǝrɗakta nan kalamǝn ɓǝɓifechˈyamǝn ha nat paɗ kǝ chapamǝn chǝ kaɗ hur ɓǝɓifechˈyamǝn nat, kǝ namǝn chiɗ chiɗ. 10 Maa ndimǝn wa tamwamǝn chǝt ɓǝɓifata wa, tǝ ndamǝn wa Farta thlǝ lekta, ndiktiyan paɗ neˈsi hwirˈyamǝn wa.