6
Chokti Parcha tǝ Wanchiyanda
1 Wancha, cham thlǝrɗaktǝ tǝ parchiwun kǝthlǝm nechowun kǝ yi Chinda, paɗ ndaˈan nech kǝ ǝnɗi nech ndiˈchan kǝ chiwun. 2 Kussiˈ yi tǝrkwathl kanan wumandǝ fee ha tǝ ɗǝfmee ndaˈan nech kǝ:
“Fǝram maandǝ chu tǝ mu,
3 maˈ maanawun chinchiwun tǝ manchiwun, “Nat ichiɗi natwun chita nan wiˈtǝ keˈke kǝmɗiyowun, paɗ nowun nat ha kǝ hurechǝ kaan hur.”
4 Chincha, kǝ sǝɓawun hurchi wanchiyowun kaɗwa tǝ mbanɗi thlǝ paratwun tǝ tanda. Tǝ kǝɗu, param tǝ tandǝ tǝ chaˈandat har tǝ para kussiˈ thla ɓech mǝɗi Farta.
Mafecha Tǝ Fǝ Wurchiyanda
5 Kun mafecha, cham thlǝrɗakta tǝ fǝ wurchiyowun fee nech hur heshiɗiya. Kǝ pǝnawun fǝr maanda tanda, nakowun para tanda hur chika mǝ nat, tǝ hwir arta paɗ, kǝɗ tǝ nowun chit teri Kǝrǝsti. 6 Kǝ chiwun ter kǝthlǝm fee ɗǝpowun nda wa, kǝɗ fee nech kaa chimndǝ nafcha wa, tǝ kǝɗu nakan wa kun mafechi Kǝrǝsti, cham ǝn ɗi yahtǝ Farta tǝ hwir arta. 7 Cham tarchiyowun tǝ kafata tǝ kaɗat ndiˈchan, kǝɗ tǝnowun chandǝ Chinda ngga kǝmɗi nafcha wa. 8 Kǝ sǝn wunsǝ paɗ wa, nat kaakǝt ɗi chit nefa, ndu nechan kǝ mafata ndu wan hwira, Chinda ndak nech tiyanda.
9 Kun fǝ wurcha, kun paɗ chaman mafechiyowun kǝɗu. Kǝ malawun kwara nda ta. Kǝ sǝnwunsǝ paɗ wa kun tǝ tanda Chin wun arta hulafǝrta, mǝthlan paɗ pǝnwa taata wa.
Nat Ichi Yaandi Farta
10 Ndukwa Ndikta: Chokam kwaˈkwa hur Chinda tǝ alkǝtˈyan thla nech kwaˈkwa. 11 Ɗǝfam icha yi yaanchi Farta kafˈyowun nat kǝthlǝm kǝt kǝ mbahǝnwun thlarta kǝ ɗar ɗafǝrtǝ mbandi hwerǝ nat. 12 Kǝthlǝm kǝt yaandǝ ˈyamǝn ngga tǝ atekǝritǝ fer ndu tǝ fata wa, nechan tǝ ɓǝɓi kutǝrcha tǝ fǝ alkǝta fee nech parat tǝ wuthlɗi nech hur heshiɗiya, tǝ ɓǝɓi shemecha hur hulafǝrtǝ kaɗi michǝ sam samǝn. 13 Kǝthlǝm ndaˈan pam ǝna yaandi Farta nat kǝthlǝm kǝ mbahǝn wun thlartǝ tǝ atekǝrichiyowun hur ɓǝɓi minchaˈan. Kǝrsǝ yaanan kǝ chokwun kwaˈkwa.
14 Thlaram ha tǝ alkǝta, tǝ sahtǝ kǝnda kan sheɓtǝyowun tǝ kapata yi yaandi Farta yi thlǝrɗakta. 15 Pahamchǝ paɗ yi kǝɓikaɗi natwun pata yi ɓas Kwastǝ Ndiktǝɗiya nakowun tǝ tahǝstǝ fa. 16 Chektaˈan kǝ ɗar ichiɗiya nat, kǝsam kǝsǝmnda yi fǝr kit kǝ mbahǝn wun thlarandǝ wanhafchi hweˈra.
17 Pakowun hǝraˈta kǝɗ lǝɓokra lu indiyowun, tǝrkowun wanfuha I Shemeta, thla nech kǝ ndikti Farta. 18 Shiyama hur Shemeta chika kwati tǝ paɗ hur mǝ nat Chokam tǝ tahǝstǝ fa tǝ ɗǝt kǝ pangga hur shitǝyowun kǝthlǝm fee nech para Farta nat chika ayi. 19 Shiyam paɗ kǝthlǝm nenchi paɗ. Shiyam kǝthlǝm nenchi. Shiyan kowun Farta kǝ fǝritǝ kaa ndikta thla nati mbahǝn mbuˈta kǝ ɗar ichiɗi chit Farta tǝ thla tahsandǝn ha kǝthlǝm kǝt Kwastǝ Ndiktiya yi Yahudawecha tǝ takǝt nafchǝ nat. 20 Nggǝt hur chalala nakanya, paɗ naki ɓassa kǝɗ thla thlǝndǝ fee i Farta. Shiyama maˈ ni mbahǝn ndiktǝ tǝ alkǝta kǝthlǝm anchi kǝɗ ǝnɗi kǝmchisi
Nda Əna yi Ndukwaɗan
21 Tikikus wanmanan mǝn thla yahti, thlǝ chitera, thlǝ kaakǝt paɗ kǝmɗi Chinda, nan sǝnowun chika mǝ nat kǝthlǝm kǝ sǝnwun ndu nechi kǝni tǝ ichiɗi yimndǝ huran. 22 Thlinchi ndi kǝmɗiyowun kǝthlǝm kǝ sǝnwun ndu nechi kǝni, paɗ kǝ ndǝksantǝ wandǝkaɗechˈyowun. 23 Wanmanchina, kǝɓikaɗi i Farta Papa tǝ Chinda Yesu Kǝrǝsti kǝ chok tǝ wunchi, tǝ thlǝrɗakta tǝ fǝr kit paɗ. 24 Kaakǝta kǝ choktǝ wunchi tǝ nat fee yahchǝ Chinmǝn Yesu Kǝrǝsi tǝ kafata thla thlǝ tǝɓawakcha.