1 Kǝthlǝm ndaˈan thlarani ha hur wanɗǝkaɗatinchi wa, peˈwi wiˈyowundǝ fa thla nech ɗǝf wunchi kǝ sǝɓtǝ hwira wa. 2 Kǝthlǝm maa ɗǝfinchǝ wunchi kǝ sǝɓtǝ hwira, wun nech tǝrandǝ hwirinchǝ ha, maangga kun tǝɗi sǝɓandi wanɗǝkaɗechˈyowun kaɗ wa? 3 Ndaˈan chicha yarowundi ɗelwel tǝɗisi, kǝthlǝm yahwisi kǝ ɓi mbǝs nafchiɗi kǝmchǝs kǝ tǝrandi hwirinchi ha, kǝ ɗǝf ndǝ nenchi kǝ sǝɓtǝ hwira wa. Kǝthlǝm fǝrinchǝ kit kǝ wunchǝ nat, ndat wa natˈwun nowun mbǝnfat tǝ nenchi.

4 Yarowunchisi hur sǝɓtǝ hwira tǝ ɓahtǝ ha, tǝ ˈyamǝt kaan, ngga wa kǝ ɗǝfi wunchǝ kǝ sǝɓtǝ hwira wa, paɗ kǝthlǝm kǝ sǝnwun kwiɗimǝn yahtǝɗi nessinchin kǝthlǝm kǝt kun.

5 Maa ɗǝf yowun wunchǝ kǝ sǝɓtǝ hwira, ngga nggǝt ichǝnnǝ sǝɓandǝn hwirˈyan kaɗ wa, nat wun sǝɓandǝn hwirˈyowun kaɗi, ngga nechi mbuˈtǝ kǝɗu kǝthlǝm kǝ ɗahowunchi in wa. 6 Ɓahtǝɗi saa nafɗa, mǝɗi tertǝwun, ǝ cheˈ kǝɗu. 7 Kwechchan kǝ kalawun ɓǝɓifatˈyan ha, kǝ ndǝksawun wanɗǝkaɗatˈyan, kǝthlǝm kǝ ɓǝ sǝɓtǝ hwir mbǝrandǝ alkǝtˈyan ha wa. 8 Kǝthlǝm ndaˈan, nggǝt shiyowunda, kǝ wathlawun yah raˈan ˈyowun ha kafˈyan. 9 Ənɗi chicha yarowundi ɗelwertǝɗisi, kǝthlǝm kǝ kaɗowunchi, kǝ nii ndu thlǝ parechowun ǝnɗi thlǝ mbaˈowun ndi chǝk tǝ yen mbanda. 10 Thla kalandǝ wun chǝka mǝ ha, nggǝt paɗ kalani ha. Ənɗi kathli ha paɗ, ma ǝnsi yi kathlǝ ha, chichi kǝthlǝm kun, ǝ pangngǝn Kǝristi, 11 kǝthlǝm kǝ pǝɗan hwǝˈrǝ alkǝt ˈyamǝn ha wa. Nakan sǝn mǝn mban ɗathl chiyan.

12 Kǝ saˈki kǝ Taruwasa kǝ ɓasi kwastǝ ndikti Kǝristi, sǝninchi paɗ wa inichi Chindǝ mbandǝsi kǝ chi taran ǝ mǝɗa. 13 Chǝka tǝ kǝɗu hunawu hur indinchi ha wa, kǝthlǝm ǝ mbǝsa wi wanmanǝ Titus hur fǝr kit ǝ minni wa, kǝthlǝm ndaˈan, ndanki tanda wa nggǝt nii mbǝrtǝ ha, mbǝrki ha kǝ Makidoniya.

14 Paɗaa usoko kǝmɗi Farta. Mǝthlan tǝɗi thlǝ nech kǝs kalatˈyamǝn kǝɗ tǝ thlǝthlamǝn pangkǝˈin hur Kǝristi, tǝmɗiyamǝn thlǝnatǝn welandǝ saˈtaˈan tǝɗi nech mbinchan yi sǝn Kǝristi chǝka tǝyeni. 15 Kǝthlǝm paɗaa, ǝ mǝɗi Farta nggǝmǝn nech kǝ saˈtaˈan nech mbinchan yi Kǝristi hur fee naa fee hǝraˈa ndata, tǝ fee nech ǝ mban tǝktǝ ha. 16 Kǝmɗi feuwuna saˈtǝɗi mbǝnchan ya mǝrta, kǝmɗi fowun paɗ saˈtǝɗi mbinchan ya shishingnda. Wun nech mbahan chǝt weˈtǝ tarɗiya? 17 Kǝthlǝm ngga nechamin kǝɗ takǝɗ nafcha wa, fee thlǝ ɓaschi Ndikti Farta kǝthlǝm mbǝs chekta. Paɗ nakan Farta thlǝnchi nggaˈan, thlǝ nechaˈan ndikta hur kit ǝ pangngǝnan, tǝmɗi Kǝristi.