1 Far mahkanan chǝk fee mbǝnfa kǝn reta ǝ Kaana hur hahi Galili. Man Yesu paɗ mǝthlan minni. 2 Shiyan kǝ fee Yesu, tǝ kǝmsichiyan, kǝ ɗǝndǝ kǝ mǝt kǝn reɗan. 3 Kǝ tǝɓak ˈyam yanggiɗi nech minni, ɓak man Yesu kǝmɗiyan ndangkan wa, “Tǝɓi ˈyam yanggiyanda.”

4 Nggǝman kǝ Yesu manan wa, “Yaa, michicha natu ɗǝf nenchi kǝ hur ndiktǝɗiya?” Saˈwu wanshengnan inchi kwaɗǝn wa, malitǝn. 5 Ndangkǝ man Yesu mafeechiɗi minni wa, “Nat ǝnɗi ndowundǝn wa kǝ chǝwun, chama.” 6 Ə minni ɓutǝ sa ˈyamchǝsi michcha tahǝs tǝ fee tǝ ɗakwancha shet, ǝna tar raˈati Yahudawecha yi chap icha. Chika yen ɓutǝ sa ˈyem arta thlǝ thlichan kǝɗ ɓutǝ ˈyema kumchit chap ndu kumchit mahkan yi ˈyema. 7 Ndangkǝ Yesu mafechaˈan wa, “Ndiɗaman ɓutǝ sa ˈyamchaˈan tǝ ema.” Fen paɗ ndiɗan kandǝ kǝ miyan. 8 Ndangkan tanda wa, “Nakanya, cham har, kǝ ɗawun kapa thlǝ mbǝnfaɗan.” Chǝkan ndǝ ˈyam ɗa har yu, ɗan kandǝ kapa thlǝ mbǝnfaɗan. 9 Kǝ hoɓan kǝ kapa thlǝ mbǝnfaɗan ˈyamɗi, nggǝrchǝ ha kǝ ˈyam yangga yu ngguɗyeh. Mǝthlan paɗ sǝnwa mǝɗi ɓa fee taˈanchǝ wa (Mafeechiɗi kwanchǝ ˈyaman ndak sǝncha.) Chat kapa thlǝ mbǝnfaɗan ˈyakan chima periˈan cheɗek. 10 Ndangkan wa, “Chika wuni thlǝ ɓechan tǝ ˈyam yanggiɗi nech mbinchan kwaɗǝn. Fartǝɗi nggathlǝ nafchǝ kaˈan, kǝnan ɓat tǝ thla nawakchǝ mbinchan kǝrsa. Tǝ kǝɗu cha wuɓan ko thla nech mbinchan kǝ nakanya.” 11 Thleya nech kǝ tǝrkwathl kan sakaˈincha hur fee chǝt Yesu, ǝ Kaana i hahi Galili. Minni pǝndǝ Yesu maandiyan, kǝmsichiyan paɗ fǝrkandǝ kit kǝ anchi. 12 Kǝrsǝ thleya ɗǝk Yesu kǝ Kafarnahum, fen tǝ manan, tǝ wan manchaˈan tǝ kǝmsichiyan. Chokkandǝ ha minni kǝ wanminchǝ ngguɗyeh.

13 Kǝ nak fartǝ mbǝnfa Tathla yi Yahudawecha saˈta, ɗǝk Yesu kǝ Urshelima. 14 Hur Wiri Farta, mbǝssan kǝ Yesu nafchǝ hiyandǝ thlech kaɗi, tǝ chohrecha. Tǝ kunggurha, tǝ fee nech mbeɗa ndǝ wanɗǝɓǝthl chǝ kaɗi ɗǝɗas mǝt chokchi yanda. 15 Lǝm kǝ Yesu sahta kǝ teta, rǝkkan tandǝ hur Wiri Fartaˈan, nat tǝ chohrechaˈan ta thlechaˈan. Welankan wanɗǝɓǝthl chaˈan ˈyandǝ kaɗi, patan kan tebur chaˈan ˈyandǝ kaɗi. 16 Ndangkǝ Yesu nafchiɗi nech hiyandǝ kunggurha kaɗ wa, “Haraman ichiɗi ya kesh mǝɗiya. Kǝ chawun Wiri Papa kaɗ kǝ mǝt hita tǝ hiyandǝ ichikaɗ wa.” 17 Kǝmsichiyan kuɗuk kanda, nechan kǝ yaraɗan tǝ ndat wa, “Kaafaaɗi nessinchi kǝ wurɗoya mǝthlan kǝstǝ finchi kǝɗ wata.” 18 Chihankǝ paktechi Yahudawech mee Yesu. Ndangkanda wa, “Weˈtǝ ǝna saka in mii natu chita thla nech pǝna ǝndǝ wa alkǝtˈyosi kǝ nen chit nat ichiɗiya?”

19 Nggǝma ndak Yesu wa, “Tǝtokaman Wiri Farta ɗi ha ya, nggǝt paɗ ni thlaˈandǝ hur mǝndǝ mahkan.”

20 Paktechi Yahudawechaˈan nggǝrangkandǝs wa, “Tǝrchan hurech kum chǝt foɗɗa nggǝrsǝ michcha (46), tǝ tǝn Wiri Farta ɗiya. Kantǝ kǝni natu thlaˈanda hur mǝndǝ mahkan?”

21 Kǝɗu Wiri Farta thla naa Yesu ndiktǝ kǝ ɗaran, fatˈyan. 22 Paɗ kǝ thlaˈan kǝ fee Yesu ǝ mǝrta, kǝmsichaˈanˈyan kuɗuk kandǝ tǝ ndat wa ǝ mbuˈ kǝɗu. Chat fǝr kandǝ kit kǝ yara ndikti Farta, tǝ ndiktiɗi mbuˈtǝ Yesu paɗ.

23 Ə Urshelima far Mbǝnfa Tathla terchan nafchǝɗi fǝrchǝ kit kǝ Yesu, kǝ nakan ndǝ ǝna saka inchiɗi natǝn chǝta. 24 Kǝɗu Yesu fǝra wa fat tanda wa, kǝthlǝm sǝntǝ nafchǝ nat. 25 Kǝthlǝm sǝntǝ wanɗǝkaɗati chǝka wuni, ngga wa kǝ mbuˈan fee ǝn kǝ ɗar nafcha wa.