1 Nefsi naa thlǝman wa Nikodimus, thlǝ Farisiyawata, paɗ arta hur paktechi Yahudawecha. 2 Fartǝ thleya ǝ wita ɗǝkan kǝmɗi Yesu. Ndangkan wa, “Thlǝ chaˈandǝ nafchi har, sǝn ǝn wa Farta thlinchǝ wechi kǝthlǝm kǝ ɓen chaˈa andǝ har. Nefsi nech mbahǝn chǝt ǝna saka inchiɗi thlǝ chitu ya wa, mangga Farta nech parat tǝ anchi wa.”

3 Ndangkǝ Yesu wa, “Kittaˈan, nati mbuˈuta, nefsǝ nech mbahǝn yimndǝ kǝ kutǝrakti Farta wa, mangga tǝ nggǝr fee nggǝt anchi wa.”

4 Chǝhan kǝ Nikodimus mee Yesu tǝ ndat wa, “Tǝ kǝni naa fee nggǝr nggǝt nefa ma sher kaɗi? Tǝn nggǝr nggǝrandǝ in kǝ hwiri manan yi chapataˈan, kǝn fee nggǝr nggǝt anchi wa?”

5 Nggǝman kǝ Yesu wa, “Kittaˈan, nggǝt mbuˈuta, mangga tǝ nggǝt fee nefa tǝmɗi ema tǝ Shemeta wa, nggech yim kǝ hur kutǝrakti Farta wa. 6 Nat ǝnɗi nggǝttǝ nefa chok chan kǝ nefa, tǝ kǝɗu ǝnɗi nggǝt tǝ Shemeta nechan kǝ yi Shemeta. 7 Mǝ tǝrin kafǝrta wa kǝthlǝm ndin chǝ wa, ‘Nwaat kǝ nggǝr fee nggǝt wech wa.’ 8 Rǝnnaa thlǝ shipchan mǝɗi yahtǝn. Thlǝ sǝkcho kusheˈtaˈan, kǝɗu no mbahǝn sǝn mǝɗi chetǝn wa, ndu mǝɗi natǝn ɗǝta wa. Nechan kǝɗu tǝ nat nafɗi nggǝttǝ fee tǝmɗi Shemeti Farta.”

9 Chǝhan kǝ Nikodimus, “Nechan nat wa kǝni?”

10 Nggǝrang kǝ Yesu sǝ wa, “Chich in kǝni cha thlǝ chaˈandǝ nafchi har nako ǝ Israˈila, kǝɗu shinwen ichiɗiya wa? 11 Kittaˈan, nati mbuˈuta, ǝnɗi sǝndǝ ǝn ndaˈan nati mbuˈuta, ǝnɗi nat ǝn ndaˈan nat ǝn mbuˈowunda kǝ ɗaran. Chǝka kǝɗu kun nafcha thlǝwowun ǝnɗi ndat ǝn wa. 12 Ndikinchi kǝ ɗar ichiɗi nech hur heshiɗiya. Kǝɗu fǝrwowun kitsǝ wa, necho wun fǝr kitsǝ wa kǝni ma ndikinchǝ kǝ ɗar ichiɗi nech hulafǝrta? 13 Nefsi tamchǝ tǝrtǝ kǝ hulafǝrta wa, mangga Waˈi Nefa wa thla ɓech minni wa.

14 “Kǝɗ ǝnɗi thlaˈandǝ Musa wirɓa ɓǝra fangnda ǝ chenjeya. Nwaat kǝɗu paɗ naafee kukwandǝ Waˈi Nefa kǝ thlaˈan fee kafǝrta. 15 Kǝthlǝm ndaˈan, nat thla fǝrchǝ kit kǝ anchi, nan mbǝs shishingnda kǝ kwekichi.

16 “Kǝthlǝm yah Farta heshi kaan, fǝrkan Wanɗengthlutiyan, kǝthlǝm thla fǝrchǝ kit kǝ anchi kǝ saa ɓahtǝha wa. Kǝ mbǝs tǝ shishingndǝ kǝ kwekichi. 17 Thlǝn wu Farta Waˈyan kǝ hur heshi kǝthlǝm kǝ chakkan tǝ mee heshi wa, thlinchan anchi kǝthlǝm kǝ heraˈ heshi tǝmɗiyan. 18 Nat thla fǝrchǝ kit kǝ Waˈi Farta, nggǝ fee chakan mee wa. Kǝɗu nat thla fǝrwak chǝ kit kǝ anchi, tapi chakan fee mee. Kǝthlǝm fǝr wa kit kǝ thlǝm Wanɗengthluti Farta wa. 19 Thleya nech kǝ chak miyan, ɓi ɗaˈkǝta kǝ hur heshi, paɗ nafcha yahkan ndǝ wuthla kaan mǝ ni ɗaˈkǝɗan. Kǝthlǝm ǝna chichˈyanda nechan kǝ ɓǝɓiˈan. 20 Nat thla thlǝ chich ɓǝɓi icha, yah wa ɗaˈkǝta wa, paɗ ɓawa kǝ mǝt ɗaˈkǝta wa, kǝthlǝm ǝna chichˈyan mǝ chikesh wa. 21 Nat thla chich ǝnɗi nech kǝ kit, thlǝ ɓechan kǝ mǝt ɗaˈkǝta. Kǝthlǝm nafcha kǝ naa nda, ndat wa, tǝn chit ǝnɗi yahtǝ Farta.”

22 Kǝrsǝ ndaˈan, Yesu tǝ kǝmsichiyan, pǝɗa kandǝ kǝ kǝllaar hahi Yahudiya. Minni chokkan tollǝ tǝ tanda, nakan chanda baptisma. 23 Yohanna paɗ nakan chan baptisma nafcha ǝ Ainon, nduk tǝ Salim, kǝthlǝm kapa ˈyemsi minni. Nafchǝ paɗ nakandǝ ɓata kǝthlǝm kǝ chan tǝ baptisma tanda. 24 (Sǝɓchǝ ǝnɗa kǝn fee nggǝlandǝ Yohanna kǝ hur pursuna.)

25 Thlaˈkǝ asˈinda pǝthlǝr fowun kǝmsichi Yohanna tǝ yowun nefa thlǝ Yahudawata. Kǝ ɗar tar raˈatˈyanda yi ndik chapandǝ fechˈyandǝ kaɗi kǝɗ thla chaˈanda chinchinandǝ har. 26 Ɓakandǝ kǝmɗi Yohanna, ndang kanda wa, “Thlǝ chaˈa ndǝ kaɗi, nafɗi choh thla nech tǝ wechi ǝ kǝrsǝ Kufi Urdun yu, thla mbuˈtu kǝ ɗaran. No, mǝthlanya chǝt baptisma, chǝka wuni mǝthlan ɗǝta kǝ thlǝmaɗan.” 27 Nggǝran kǝ Yohanna tandǝs wa, “Nefsi nech mbahǝn thlǝt ǝn chǝka arta wa, mangga tǝ fǝran fee ǝ hulafǝrta wa. 28 Kun, tǝ indiyowun sǝnwunsi ndechi wa, ‘Ngga nggǝt nech kǝ Kǝristi wa. Kǝɗu tǝ thlǝn fee nenchi kǝ lii mǝ anchi.’ 29 Hishnefa mǝthlan nech kǝ chǝma perra. Shike tǝ chǝma perra, thla thlǝ thlarchiha kǝ kan tǝ thlǝmat chǝma perriˈan, nan ndiiɗ kaɗi tǝ mbǝnfata. Maa sǝk tǝ ɓǝrati chǝma perriˈan. Thleya ɗǝfchǝ nenchǝ kǝ mbǝn fee ini, nakanya ndiiɗ ha. 30 Nwaat nan naa chekta, nggǝt paɗ nwaat kǝni taktǝ ha.”

31 Nefa thla ɓech kah fǝrta, pǝɗan tǝ chǝka wun ha nat. Thla ɓech hur heshi, yi heshi nakan. Thlǝ ndikchan kǝɗ thla nech hur heshi. Paɗ thla ɓech kah hulafǝrta pǝɗan tǝ chika wun ha nat. 32 Thlǝ mbuˈchan kǝ ɗar ǝnɗi natǝn tǝ ǝnɗi sǝktǝn, kǝɗu yowunsi thlich ǝnɗi mbuˈtǝn wa. 33 Nat thla thlich ǝnɗi mbuˈtǝn, wathlanchi ha wa, Farta thlǝ kit. 34 Kǝthlǝm thla thlǝndǝ Farta, ndikti Farta thlǝ natǝn mbuˈta. Mǝthlan ferandǝ Farta Shemetˈyan nggǝ sǝrtaˈansǝ wa. 35 Chinda yahtǝ Wanan, fǝrkan chǝka mǝ nat kǝ harˈyan. 36 Nat thla fǝrchi kit kǝ Wanan, shishingndiyansi kǝ kwekǝchi. Nat thla karchǝ Wanan, nggen mbǝs shishingnda wa, kǝthlǝm sǝɓtǝ hwiri Farta nan mbǝs anchi.