1 Sǝk Farisiyawecha wa, mbǝs Yesu kǝmsichǝ kaˈan, pǝɗanti yi Yohanna ha, mǝthlan chan baptisma tanda. 2 (Chika nakan wa ngga Yesu tǝ indiyan nech chit baptisma tǝ ini wa, kǝɗu kǝmsichiyan.) 3 Malkǝ Yesu Yahudiya ha, nggǝrangkan in kǝ hahi Galili.

4 Chok chan wa, nan mbǝr tǝ ha tǝ hur Samariya. 5 Ɓakan kǝ wan mǝrǝɓ ɗi thlǝ ˈya fee wa Saikar, hur Samariya. Hahiˈan nduk tǝ thle mǝti Yakubu, thla fǝrandǝn waˈyan Yusufu choh. 6 Ɓunndu tǝɗi re Yakubu minni. Kǝ hatak Yesu ha tǝ wiˈta, chokkan ha mii ɓunndu taˈan. Sǝɓchi ichiɗiya hur Farta.

7 Fartǝ ini ɓak nunefa thlǝ Samariyawata, kǝthlǝm kǝ kwantǝ ˈyema. Ndang kǝ Yesu nunafan wa, “Komkom chiitǝn ˈyemsi kǝ si.” 8 (Kǝmsichiyan tapi yimndǝ kǝ hur mirɓa kǝthlǝm kǝ hi ndǝ ɗǝsǝmnda.)

9 Ndang kǝ nunafan thlǝ Samariyawaɗan wa, “Thlǝ Yahudawat nako, nggǝt paɗ thlǝ Samariyawata. Chich in kǝni natu nditawa, kǝ chuchi ˈyam satsi?” (Kǝthlǝm Yahudawecha tǝ Samariyawecha mbǝnwanda wa.) 10 Nggǝman kǝ Yesu wa, “Mamwa tǝ shinin fǝr pafǝn i Farta, paɗ tǝ thla nduchiwa, ‘Chi ˈyemsi kǝ si.’ Mǝ tǝ nen shiyanda, mǝthlan paɗ nan fǝru ˈyema thla thlǝ fǝranchǝ nafchǝ shishinggnda kǝ poriˈ.”

11 “Thlǝ chaˈandǝ nafchǝ har, nda nunafan, ɗǝkwanˈyamanˈyo sǝ wa, paɗ ɓundutaˈan hwengnga. Necho mbǝs ˈyamɗiya ǝ ayi, thla thlǝ fǝranchǝ shishingndǝ nafcha? 12 Awi, ǝ mbireen chin ǝn Yakubu ha, thla malamǝnchǝ ɓundutaˈan wa? Mǝthlan tǝ indiyan, kǝɗu paɗ wanchiyan, tǝ ɗǝparechˈyan, sat ndǝ huran.”

13 Nggǝman kǝ Yesu nuɗa tǝ ndat wa, “Nat thla sech ˈyam ɗiya naa kuchimndǝ nggǝr hwaranda. 14 Tǝ kǝɗu nat thla sech ˈyamɗi nati fǝranda, nggǝ kuchimndǝ nggǝr hwaranchi paɗ wa. ˈYam ɗi nati fǝranda nechan chokta kǝɗ weniti ˈyema thla thlǝ yiɗcha, thla thlǝ fǝrchǝ shishingndǝ kǝ poriˈ.” 15 Ndang kǝ nunafan wa, “Thlǝ wira, fǝri ˈyem ini. Kǝthlǝm kǝ nggǝr kuchimndǝ hwarita wa, paɗ kǝ nggǝri ɓat kǝmɗiya kǝ kwan ˈyema wa.”

16 Ndang kǝ Yesu nunafan wa, “Ɗu ˈyo chimat wa kǝ ɓowun waˈ.”

17 Nggǝman kǝ nunafan wa, “Ə chiman nǝs wa.”

Ndang kǝ Yesu wa, “Mbuˈin kit tǝ ndat wa, chimatu sǝ wa. 18 Kǝthlǝm, riyin hǝssǝ ɗǝrman, thla natu mǝɗiyan nakanya ngga chimatuni wa. Ənɗi mbuˈtu kittaˈan.”

19 Ndang kǝ nunafan Yesu wa, “Thlǝ chaˈanan kaɗi, nggǝt nat ya thlǝ mbandi Farta nako. 20 Kwathl ǝn choh manaandǝ Farta ɗar nggwalɗiya. Kun Yahudawecha ndakowun wa ǝ Urshelima ndak kǝmchis wa nafcha kǝ fǝr ndǝ maanda.”

21 Nggǝran kǝ Yesu sǝ wa, “Nunefa, fǝru kit kǝ nenchi. Kǝthlǝm Fartaˈan ɓata thla nawak tǝ wun manaandǝ Chinda ɗar nggwalɗiya ndu ǝ Urshelima. 22 Kun Samariyawecha, sǝnwowun ǝnɗi natwun fǝran maanda wa. Nggaˈan Yahudawecha, sǝn ǝn ǝnɗi thlǝ fǝrandǝ ǝn maanda, kǝthlǝm ɓech heraˈta tǝmɗi Yahudawecha. 23 Kǝɗu Fartaˈan ɓata, tapi ɓi, fartǝɗi naa fee thlǝ mananchi tǝ kit nandǝ manaandǝ Chinda hur Shemeta, tǝ kit paɗ. Kǝɗu, weˈtǝ fee thlǝ fǝrchǝ maanɗiya, fen naa Chindǝ kata kǝ manaanda. 24 Farta Shemet nakan, fee nech manaandǝ yu nwaat kǝ manaanda hur Shemeta, tǝ kittaˈan paɗ.”

25 Ndang kǝ nunafan Yesu wa, “Sǝninchi wa Masiha nan ɓata (thla thlǝ ˈya fee wa Kǝristi). Maa ǝ ɓi nan mbuˈa an chika mǝ nat.”

26 Ndang kǝ Yesu wa, “Nggǝt thla nech ndiktǝ tǝ wech nakanya, nggǝt niya.”

27 Kǝ peˈkandǝ ɗar ndikta, ɓak kǝmsichiyan kǝ mbǝs tanda, tǝrkandǝ kafǝrta tǝ naɗi nat ndǝ anchi ndiktǝ tǝ nunefa. Tǝ kǝɗu yowunsi ndanchǝ nunafan wa, “Mǝ yahtu?” Ndu kǝ chihandǝ mee Yesu wa, “Kǝthlǝm mi natu ndiktǝ tǝ anchi?”

28 Kǝɗu malkǝ nunafan ɓutǝ ˈyem ˈyan ha minni, nggǝran kan in kǝ hur mirɓa. Ndangkan nafcha wa, 29 “Ɓama, kǝ nowun nafɗi mbuˈi chǝ nat ichiɗi tamndi chita. Na nafɗa nat kǝ Kǝristi tǝ ɗa wa?” 30 Chek nafchaˈan kesh hur mǝrɓan ɗǝkandǝ kǝmɗi naa Yesu.

31 Ə kǝɗu naa ichiˈini sǝɓtǝ yu, shiyan kǝ kǝmsichiyan ndangkanda wa, “Thlǝ Chaˈanan kaɗi, sǝmu ɗǝsǝmnda.” 32 Kǝɗu ndang kǝ Yesu tanda wa, “Ɗǝsǝm ndinchi si thla nati sǝmnda, thla sǝn waktǝwun.” 33 Kǝmsichaˈan nakandǝ chihandǝ raˈan wa, “Tǝ ɓan yowun ɗǝsǝmndǝ kǝrsǝmǝn wa?”

34 Ndangkǝ Yesu tanda wa, “Ɗǝsǝmndinchi ndaˈan nech kǝ chi teri nafɗi thlǝnchi nenchi, paɗ kǝ tǝɓani taran ˈyan. 35 Ngga thlǝ ndechowun wa, takchan ndǝr foɗɗa kǝ saˈ sǝfakta wa? Tǝ kǝɗu nggǝt ndowun nda wa, ɗǝpaman hǝnggicha ndiˈchan, tapi nǝhinda, kǝmndǝ tǝ hathla. 36 Chika nakanya thlǝ hathla, thlǝ mbǝschan kǝnauwa, tǝn nggomandǝ nafchiyan kǝ mbǝsndǝ shishingndǝ kǝ poriˈ. Kǝɗu nafɗi chehcha tǝ nafɗi hathlcha kǝ mbǝndǝ fat keɗecha. 37 Minni chek tǝ ndiktǝɗiya ɓi kǝ kit, ndat wa, ‘Yowun thlǝ chehta, yowun thlǝ hathla.’ 38 Thlǝnchi wunchi kǝ hathl wun ǝnɗi chehwak tǝ wun. Fowun ɓahchi ha kǝ ɗaran, kun tapi sǝm wun kǝnau ɓahtiyandǝ ha.”

39 Terchan Samariyawecha ǝ mǝrɓan fǝrkan ndǝ kit kǝ Yesu, kǝthlǝm ndikti nuɗi ndech wa, “Mbuˈichi ichiɗi nat tamndi chita.” 40 Kǝ saˈ kǝ Samariyawechaˈan kǝmɗi Yesu, shiyankanda kǝ chok mǝɗiyanda, mǝnkan chap minni.

41 Terchan fowun Samariyawechaˈan paɗ fǝrchǝ kit kǝ Yesu, kǝthlǝm ndiktiyan. 42 Kǝ nan ndǝ nda ndǝ nunafan wa, “Nakanya, fǝr ǝn kit, ngga wa kǝthlǝm ǝnɗi mbuˈtu wa, auwa, kǝthlǝm sǝk ǝn tǝ indiyaˈan. Sǝn ǝn paɗ wa nafɗiya nech kǝ Thlǝ Hǝraˈandǝ heshi nat.”

43 Kǝrsǝ mǝnɗi chap yu, malkǝ Yesu minni ha pǝɗakan kǝ hahi Galili. 44 (Yesu tǝ indiyan ndechan wa, “Thlǝ Mbandi Farta si naa fee manaanda ǝ mirɓiyan wa.”) 45 Kǝ saˈkan kǝ hahi Galili, nafchaˈan thlǝkandǝ anchi tǝ harchǝ chap chap, kǝthlǝm niindǝ nat ǝnɗi chitǝn ǝ Mbǝnfa Tathlan, ǝ Urshelima. Fen paɗ ɗǝnda kǝ Urshelima.

46 Nggǝr kǝ Yesu ɗǝt kǝ wan mǝrɓi Kaana ǝ hahi Galili, mǝɗi nggǝrandǝn ˈyem kaɗ kǝ ˈyam yangga. Ə Kafarnahum kapa nefsi thla naa waˈyan haˈchan. 47 Kǝ sǝkkǝ nafan wa ǝ nggǝran Yesu in kaɗ kǝ Galili thlaˈtǝ Yahudiya. Ɗǝkan kǝmɗiyan shiyan kan kǝ ɗa kǝ kǝnandǝ waˈyan kaɗi, thla nech meˈi mǝrta. 48 Ndang kǝ Yesu kapa nafan wa, “Nowun tam fǝr kit wa, maangga tǝ nowun ǝna sakaˈincha tǝ ǝna pǝparech ha wa.”

49 Kapa nafan nggǝr kan sǝ wa, “Thlǝ Maanda, komkom ɓo mǝrwak wanan inchǝ kwaɗǝn ya.”

50 Ndang kǝ Yesu wa, “Nggǝranˈin kaɗi waˈyo nan nat ha, nen mǝr wa.” Nafan paɗ fǝrkan kit kǝ ǝnɗi mbuˈtǝ Yesu, nggǝran kan in kaɗi. 51 Kǝ nakan nggǝrandǝ in kah kyeuriyan, fee thlǝ chich ter hur wirˈyan ɓakandǝ kǝ mbǝsndi ndangka ndawa, “Kǝn waˈyo kaɗi.”

52 Chihan kan tanda, wanshengngǝn ɗi nggak tǝ wanan mbǝs sǝmmǝkǝta. Nggǝran kandǝs wa, “Ɓǝraa tǝ wanshengnan arta hur Farta kathlǝ hatǝfa ɓǝɓiˈan anchi ha.” 53 Chat kaɗak chin wannan har keˈkeˈ tǝ wanshengngǝnɗi nda ndǝ Yesu wa, “Na waˈyo nat ha.” Fǝrkǝ nafan nat tǝ nafchiɗi nech hur wirˈyan kit kǝ Yesu.

54 Ndaˈan nech kǝ chapa tǝ ǝna saka inda thla chit Yesu kǝrsǝ mal hahi Yahudiya ha kǝ hahi Galili.