25
Wuɓtǝ ɗikta tǝ wanterechǝ kum fee sǝn wakchǝ hǝssa
“Fartǝˈini, nech fee kanda ndǝ kuturakti Hulafǝrta tǝ wanterchiɗi kum fee sǝn wakchǝ hish nef yu, fee tǝrchǝ wech ˈyanda kǝ ndǝ ɗǝ pǝk chǝma perra. Ɗǝrman hurnanda mbamcha, ɗǝrman paɗ ɗathlchan nda. Ɓamchǝɗi ɗǝrman yu tǝrkandǝ fitillachanda paɗ takwandǝ chektǝ fiɗetˈin wa. Fee nech ɗathlchan yu paɗ kǝsndǝ fiɗechǝhar hur kuruɓcha ɓukwa tǝ fitillachanda. Chǝ maa perriˈyan paɗ ɓawa leɗ wa, nak en fiyandǝ nat nda, saˈ kandǝ enna.
Paɗ ɗar wita, hwak fee tǝ kapa ɓǝrata, ndat wa, ‘Ə chǝ maperriyan nech ɓat yu. Chemkesh kǝ mboˈwun kakndǝ fa.’
Nat wan terechǝɗi kum yu thlaˈ kanda tasankandǝ fitillachanda. Chat ndangkǝ ɓamchǝɗi fee nech ɗathlchan yu wa, ‘Chamaˈan fiɗet ˈyowunsi, kǝthlǝm fitilachiyaˈan thlefta.’
Paɗ nggǝmankǝ fee nech ɗathlchan yu tanda wa, “ ‘Auwa, chokkan nggaˈan tǝ kun fiɗeɗan nee chaˈamǝn chǝ wa. Kwechchan ɗǝtwun kǝmɗi thlǝ hiyandǝ fee kaɗi kǝ hiwun yuwun.’ 10 Tandǝ ɗar wiˈtǝ kǝ mǝt hi fiɗeɗan, saˈ kǝ chǝma perriˈyan. Fee harchǝf yu, yimkandǝ kǝ mǝt rǝɓtaˈan tǝ chǝma perriˈyan. Nggǝlang kǝ fee mii kǝtǝnan. 11 Kǝ kǝrsa takǝt wanterechiɗi ɗich hi fiɗet yu, ɓakanda, nda kanda wa, ‘Thlǝmanda, thlǝmanda, inaˈan ndǝnsi.’
12 Paɗ nggǝrangkǝ chǝma perriˈyan tandǝs wa, ‘Kittaˈan nati mbuˈowunda, sǝnwi wunchi wa.’
13 “Kǝthlǝm ndaˈan chokam tǝ tahǝsfa, kǝthlǝm sǝn wowun fartaˈan ndu wanshengǝnɗi naa nggǝta Waˈi Nef ɓat kaɗ wa.”
Chaˈandǝ kaɗ kǝ ɗar fǝ tarchi mahkan
14 “Kuturakti Hulafǝrta nechan nat kǝɗ yowun nefa thla nech wita, ˈyakan mafechˈyan, fǝrangkan kǝnauˈyan tandǝ kǝ harˈyanda. 15 Fǝrankan arta talanti ɗǝrman, chapataˈan talanti chap, yowun fǝrankan arta, chikawuni keˈkeˈ tǝ alkǝtˈyan. Chat pǝɗakan kumichaˈan. 16 Thla thlǝch talanti ɗǝrman yu, chat kǝɗuyu ɗǝkan nakan chǝt lǝmo kǝɗ si, mbǝskan ǝnsi kǝ ɗaran ndǝrman paɗ. 17 Kǝɗu paɗ thla thlǝch talanti chap yu, mǝthlan paɗ mbǝstǝ chektǝ kǝ ɗaran chap. 18 Paɗ thla thlǝch talanti artǝ yu, ɗǝkan kohhǝt haha teshankan kǝnauɗi thlǝwuranˈyan ha yu ǝ huran. 19 “Kǝrsǝ wanmǝnchǝ terchan, ɓak thlǝwuran ˈyandǝ kaɗi. ˈYankan tandǝ kǝthlǝm kǝ mbuˈndǝ ǝnɗi chǝt ndǝs tǝ wanɗǝɓithlɗi chakandǝn tanda. 20 Ɓak thla fǝrandǝ fee talanti ɗǝrman yu. Ɓakan kǝ pangnga tǝ talanti ɗǝrman ndakan wa, ‘Thlǝwira, firichin talanti ɗǝrman. An paɗ ya, mbǝsinchi chektǝ kǝ inan ɗǝrman.’ 21 Ndangkǝ thlǝ wuran ˈyanwa, ‘Ahaa, kaa mafata, thlǝ kaa kǝta. Chǝn kaa kǝta kǝ ɗar ǝn ngguɗyeh, nii ɗǝf wech kǝ ɗǝmben har tǝ ichǝ terchan. Ɓo choku ha, kǝ mbinin fata tǝ nggǝta.’ 22 Ɓak thla fǝrandǝ fee talanti chap yu ɗuk, ndakan wa, ‘Thlǝ wira, firichin talanti chap, mbǝski chektǝ kǝ inan chap paɗ.’ 23 Ndangkǝ thlǝ wuran wa, ‘Ahaa, kaa mafata, thlǝ kakǝta. Chǝn kaa kǝta kǝ ɗar ǝn ngguɗyeh, nii ɗǝf wech kǝ ɗǝmben har tǝ ichǝ terchan. Ɓo choku ha, kǝ mbinin fata tǝ nggǝta.’ 24 Thla fǝrandǝ fee talanti arta yu mǝthlan paɗ ɓakan nduk, ndakan wa, ‘Thlǝ wira, sǝninchǝ wa chǝ nefa thla thlǝ mbǝrwaktǝ fee si. Thlǝ hwechecho mǝɗi ngga chi weˈech weˈtaˈan wa. Thlǝ hathlcho mǝɗi ngga chǝ hǝf cha wa. 25 Ndaˈan chǝt lekǝti, ɗiki kohǝt haha wuɓanki wanɗǝɓǝthlˈyo ha. Aˈan thlu ǝnɗi nech kǝ yu wa.’ 26 Nggǝmang kǝ thlǝ wuran ˈyan ndangkan wa, ‘Chǝ ɓǝɓi mafata, yiɗa, awi shinin wa thlǝ halchi mǝɗi ngga kǝɗ hǝfcha wa. Ngǝt paɗ thlǝ hwechechi mǝɗi ngga nggǝt weˈech weˈtaˈan wa? 27 Mǝ kǝmchansi kǝ ɗǝfichǝn wanɗǝɓithlǝnchi ha kǝ mǝɗi nati mbǝs chektǝ kǝ ɗaran, ma ɓinchǝ kaɗi thlǝki ichinchi tǝ ˈyaman. 28 Kǝthlǝm ndaˈan thlam talanti tǝɗi nech haryan, kǝ fǝrawun thla nessan kum yu. 29 Kǝthlǝm nat thla na ǝnˈyansi, naa fee chekan nda, kǝ mbǝs terchan. Thla nawaktǝ ǝnyansi paɗ, chǝka ǝnɗi nessiyan ngguɗyeh, nafee thlǝt ǝ mǝɗ ˈyan. 30 Paɗ mǝkam koha mafaɗa kǝ pongngǝn wuthla. Mǝɗi na fee tǝta tǝ kang wanthlancha.’ ”
Chak mee yi ndukwaɗan
31 “Fartǝ ɗi na nggǝta Waˈi Nefa ɓat kaɗi hur maandinchi tǝ fǝ thlǝnchǝ nat, chat kǝ choki ha kǝ ɗar mitchoktǝ kuturaktinchi yi maada. 32 Naa fee nggommandǝ kwathl nafchǝ heshi nat kǝ pangngǝnaa, kǝ chakandǝ tandǝ ha sam-samǝn. Kǝɗ ǝnɗi thlǝ taɗandǝ thlǝ parat chohrechi kesh ǝ hur yukwecha. 33 Nii ɗǝf chorecha tǝ har harsǝm inchi, yukwechǝ paɗ kǝ kaaku inchi. 34 Kǝn Kuturan ndandǝ fee nech tǝ harsǝmˈyan wa, ‘Ɓama, kun tǝɗi ɗǝfowun ndǝ Papa mbǝs ǝn kǝ har. Kǝ thlǝwun sǝm kǝrsǝ mǝrtǝ kuturaktǝɗi tahsowun ndǝ Fartǝsi kǝn fee tǝn heshi. 35 Kǝthlǝm kǝ sǝkki mita fǝrichǝwun ɗǝsǝmnda kǝ sǝmi. Kǝ sǝkki kwichimnda, fǝrichǝ wun ema kǝsi. Wiˈki ramkǝta, fǝrikowun mǝt hunata. 36 Nggǝt tandǝr kwaiˈ, fǝri kowun kapata. Haɗinchi, ɗǝpakowunsi nenchi. Nggǝt ǝ pursuna, wiˈikowun fa.’ 37 Kǝn fǝ kafechaˈan nggǝmaanda wa, ‘Chinda, kwat nat ǝn wech mitǝfˈyo, furutǝˈǝn ɗǝsǝmnda? Ndu kwichǝmndǝ fiyo furutǝˈǝn em kǝ sen? 38 Kwat paɗ nat ǝn wech kǝ rema, thlǝt ǝn wechi? Ndu tandǝr kwaiˈ, furutǝˈǝn kapata? 39 Ndu kwat nat ǝn wech haˈchan ndu ǝ pursuna wiˈyu tǝ ǝn fa?’ 40 Na kuturan nggǝmandǝ tandǝ wa, ‘Kittaˈan nggǝt mbuˈowunnda, nakan chawun artǝ hur wanmanchiniɗa hǝssa tǝ nǝssa fee nech ngguɗyeh kaan. Nggǝt chandǝ wun.’ 41 Kǝnan nda ndǝ fee nech kaaku ˈyan wa, ‘Chakam ha tǝ nenchi kun nafchiɗi hommbandǝ fee, yimam kǝ waɗi nawakchǝ tam lǝfta kǝ kwekǝchi. Thla tah sandǝ fee hweˈrǝsi tǝ fǝ thlǝnchiyan. 42 Kǝthlǝm mitifinchi fǝriwowun ɗǝsǝmnda kǝ sǝmi wa. Kǝsichi kwichimnda, fǝ riwowun ˈyam sata wa. 43 Chinchi ram kǝta, thlǝwowun nenchi wa. Nggǝ tandǝr kwaiˈ, fǝriwowun kapata wa. Haɗinchi paɗ nggǝt ǝ pursuna wiˈiwowun fa wa.’ 44 Fen paɗ nandǝ nggǝmaanda wa, ‘Chinda, kwat nat ǝn wech mita, ndu kwichǝmnda, ndu ramkǝta, ndu tandǝr kwaiˈ, ndu hatǝ fata, ndu ǝ pursuna, kǝsu waˈan su wa?’ 45 Kǝn kuturan nggǝmandǝ tanda wa, ‘Kittaˈan nati mbuˈowun nda, nakan chawowun artǝ hur fee nech ngguɗyeh kaan ya wa, chiwowun wa.’ 46 Fee ya, naa fee pǝktanda kǝ ɓahta thla nawakchǝ tǝɓata. Fee nech tǝ kafat fǝ paɗ nandǝ yimndǝ kǝ shishingnda kǝ kwekǝchi.”