1 Kǝ tǝɓangkǝ Yesu mbuˈichiˈini nat yu. Chat ndangkan kǝmsichiyan wa, 2 “Sǝnwunwa mbinfa tathla takchan mǝndǝ chap, naa fee fǝr nggǝta Waˈi Nefa kǝthlǝm kǝ kukwichi fee ha.”

3 Chat nggomkǝ paktǝ pangngǝnchǝ ha tǝ paktechi Yahudawecha ǝ wiri kappa pangnda thla naa thlǝman wa Kayafa. 4 Wuman kandǝ mee ǝ mbanɗi natndǝ kǝsandǝ Yesu ǝ wuɓta kǝ ɓilanda. 5 Paɗ ndaka nda wa, “Ngga far mbǝnfaɗan wa, kǝthlǝm kǝ thlaˈan nafchǝ hur indi yanda wa.”

6 Kǝnak Yesu ǝ Betani ǝ wiri nafɗi thlǝ ˈya fee wa Siman, thla naa hatǝfa tarkwai fiyan choh. 7 Chat ɓak yowun nunefa kǝmɗi Yesu tǝ kuruɓtǝɗi nech ndiˈchan kaan heet tǝ fiɗeɗi nech ˈyangˈyang. Thlǝrankan Yesu fiɗeɗan kǝ inda, ǝ wanshengngǝnɗi natǝn sǝm ɗǝsǝmnda.

8 Paɗ kǝ nak kǝmsichaˈan kǝɗu, chat sǝɓkǝ hurchandǝ kaɗi ndang kandǝ raˈan wa, “Mǝ naa fee sǝɓandǝ ǝn kaɗ kǝɗa. 9 Mam wa tǝ hiyan fee fiɗeɗa kaɗi, mǝ naa fee hiyandǝ kaɗ ɗar wanɗǝɓithl kaan, mǝ tǝr wu fee wanɗǝɓithlan kǝ chakan fee fǝ ɓahcha wa?”

10 Paɗ nakan tapi sǝn Yesu ǝnɗi natndǝ mbuˈta ndangkan tanda wa, “Kǝthlǝm mǝ natwun ɓilla nuɗiya? Ai, ǝn ndiˈchan chitǝn. 11 Fǝ ɓahcha tandǝ tǝ wunchi weenmǝta, paɗ nggǝta ngga weenmǝt nati nat tǝ wunchǝ wa. 12 Fiɗeɗi thlǝritǝn kafya, tǝ tahsanchi fatinchi kǝthlǝm thlohta. 13 Kittaˈan nati mbuˈowun nda, nat mǝɗi naa fee ɓas kwastǝ kusheˈtǝ ndiktǝɗa yi sǝkta, ǝ hur heshi nat. Naa fee mbuˈ ǝnɗi chǝt nuɗiya kǝthlǝm kuɗuktǝ tǝ ndi.”

14 Chat artǝ hur kum nggǝrsǝ chap taˈan, thlana thlǝman wa Yahuda Iskariyoti. Ɗǝkan kǝmɗi paktǝ pangngǝncha, 15 ndakan wa, “Mǝ nat wun fǝrita, maa hiyowunchi Yesu?” Shengngan kandǝ wanɗǝɓithl ɓishet kum chǝt mahkan fǝrang kanda. 16 Nggak tǝ ǝ wanshengngǝnˈini nggakkan kaa mbanɗi natǝn hiyandǝ tandǝ Yesu.

17 Ə tǝrkwathl fartǝ mbǝnfa njohǝma thla nawaktǝ yistisi fiyan, ɓak kǝmsichaˈan kǝmɗi Yesu. Chǝhankandǝ tǝ ndat wa, “Ə ayi yahtusi kǝ tahsuchǝˈǝn mǝtsi, kǝthlǝm kǝ sǝmin ɗǝsǝmǝn mbǝnfa tathla?”

18 Nggǝmankan tanda wa, “Ɗam kǝ hur mǝrɓan kǝmɗi yowun nefa. Kǝ ndawun wa, ‘Ndech Thlǝchaˈanan kaɗ wa, wanshengnan inchi nduk ha, nii sǝm ɗǝsǝmǝn mbǝnfa tathla ǝ wirˈyo tǝ kǝmsichinchi.’ ” 19 Kǝmsichaˈan paɗ chikandǝ kǝɗ ǝnɗi mbuˈandǝ Yesu tanda kǝ chǝ nda. Tahsan kandǝ ɗǝsǝmǝn mbǝnfa tathlan ha ǝ minni.

20 Kǝ chǝk farwita, chokkǝ Yesu ha kǝthlǝm kǝ sǝm ndǝ ɗǝsǝmnan tǝ kǝmsichiɗan kum nggǝrsǝ chap yu. 21 Tandǝ hur sǝm ɗǝsǝmnda chat ndangkǝ Yesu tanda wa, “Kittaˈan nati mbuˈowun nda, artǝ hur wun nan hiyitǝ kaɗi.”

22 Mbiɗ kǝ fatˈyandǝ kaɗi, nggakkandǝ chǝhan mee artǝ-arta nakandǝ ndat wa, “Nggǝta wa, Chinda?”

23 Nggǝmankǝ Yesu tanda, ndakan wa, “Thla nech sǝm ɗǝsǝmnda ǝ tiɓ arta tǝ nggǝta, mǝthlan nech hiyitǝ kaɗi. 24 Nggǝta Waˈi Nefa nii mǝrta kǝɗ ǝnɗi yarandǝ fee ha hur Laulawati Farta kǝ indinchi. Paɗ ai i nafɗi nech hiyandǝ nggǝta Waˈi Nef kaɗi. Mǝ nat nan ndiˈchan mǝɗi nef ini mam wa mǝ nggǝt wu fee ndǝ wa.”

25 Chat ndak Yahuda thla nech hiyandǝ Yesu kaɗ yu wa, “Thlǝ chaˈanan kaɗi, ndu nggǝta wa?”

Nggǝrangkǝ Yesu su wa, “Aa, ǝ mbuˈin.”

26 Tandǝ hur sǝm ɗǝsǝmnda, Chat tǝrkǝ Yesu njohǝman, chǝkan usoko kǝmɗi Farta. Chichenkan njohǝman ha fǝrangkan kǝmsichiyan ndakan wa, “Thlama kǝ kangwun, thleya fatinchiniya.”

27 Tǝrkan tǝɓ saa ema thla naa ˈyam inabi huran. Kǝrsǝ chan usoko Farta, chat fǝrangkan tanda, ndakan wa, “Sama natwun. 28 Thleya ferinchi niya yi ndiiɗandǝ ɗǝf mee ha, thla naa fee thlǝrandǝ kaɗ kǝthlǝm nafchǝ terchan. Kǝthlǝm kǝ kalan Farta tandǝ ɓǝɓifechˈyandǝ ha. 29 Nggǝt mbuˈowunda, peˈwi nggǝr saa ˈyam inabi tǝɗa wa, maangga fartǝɗi nati saa yuwa ˈyam inabi ɓukwa tǝ wunchi ǝ kuturakti Papa wa.

30 Kǝ in kǝ Yesu tǝ kǝmsichiyan emsa, chat chekandǝ kesh, pǝɗakandǝ kǝ Mǝt Ɗakwan Zaitun.

31 Chat ndangkǝ Yesu tanda wa, “Natwun nowun rakata kǝ malwun nenchi ha ǝ witǝɗa, kǝthlǝm ǝnɗi nech sǝɓtǝ tǝ nggǝta. Nechan kǝ yaraɗan hur Laulawati Farta ndat wa,

32 “Paɗ kǝrsǝ thlaˈitǝ ǝ mǝrta, nii lat mǝ kun kǝ Galili.”

33 Nggǝmangkǝ Biturus wa, “Chǝka tǝ rakandǝ natnda kǝthlǝm ǝnɗi nech sǝɓtǝ tǝ wechi, nggǝt nii tam rakawa.”

34 Nggǝmangkǝ Yesu wa, “Kittaˈan nati mbuˈuta, ǝ witǝ ɗa, kǝn chakkartǝ kwarta, no ass in sǝn nenchi harke mahkan.”

35 Nggǝmangkǝ Biturus wa, “Chǝka tǝn fee ɓilitǝ tǝ wechi, nii ass in sǝn wech wa.”

Takǝɗ kǝmsichaˈan nat mbuˈ kandǝ kǝɗu paɗ.

36 Kǝn Yesu tǝ kǝmsihichiyan ɗǝkandǝ kǝ mǝɗi thlǝ ˈya fee wa Getsemani mǝɗi thlǝ yimandǝ fee wan inabi. Ə minni ndangkan kǝmsichiyan wa, “Chokam ha mǝɗa, nggǝt chi kǝmɗi kǝ shiyi.” 37 Chat pǝɗakan tǝ Biturus tǝ wanchiɗi Zabadi chap yu, Yabuku tǝ Yohanna. Nggakkan chǝt sǝɓtǝ hwira tǝ ɓillat kaan. 38 Ndangkan tanda wa, “Sǝɓ hwirin chǝ kaɗ kaan, kǝɗ tǝni mǝrta. Thlaram ha mǝɗa, kǝ nowun tǝ tahǝsfa tǝ nggǝta.”

39 Kǝ ɗǝkan kǝ pang ngguɗyeh hǝmkan ha tǝ chimaandiyan ǝ haha shikan ndakan wa, “Papa, maa nan chǝta, tǝrandǝn tǝɓ saa ˈyam ɓahtǝɗinchi kaɗ ya. Ckǝka mǝ nakan wa ngga ǝnɗi yahti naa fee chǝta wa paɗ ǝnɗi yahtu.”

40 Ɓakan kaɗ kǝmɗi kǝmsichiɗan mahkan yu ɓakan mbǝsandǝ tandǝ saˈena. Ndangkan Biturus wa, “Awi, nowun mbahan chok tǝ tahǝsfa tǝ nenchi chǝka wanshengnan arta wa? 41 Chokam tǝ tahǝsfa, paɗ kǝ nowun shita kǝ yimwun kǝ hur kaɗata wa. Shemeɗan yehi, paɗ faɗan alkǝtsǝ wa.”

42 Nggǝrkan nggǝrandǝˈin yi chapataˈan shikan. Ndakan wa, “Papa, manggǝ tǝɓ saa ˈyam ngwarkwana tǝɗa mbǝr ha wa, nwaat kǝ si, malan kanɗat ˈyo kǝ ndiiɗ ha.”

43 Nggǝrkan ɓat kaɗ kǝ thlǝmat nanda ɓakan mbǝsandǝ tandǝ saˈena, kǝthlǝm wenitǝˈyanda ndiiɗ kaɗ tǝ ena. 44 Nggǝrkan maltandǝ ha ndǝkan shita yi mahkannan, nggǝrkan nggǝrandǝ shitǝɗi chǝtǝn choh.

45 Ɓakan kaɗ kǝmɗi kǝmsichaˈan, ndangkan tanda wa, “Paˈkǝ nakanya nggun saˈena, kun yipta? Nama, wanshengnan nduk ha thla naa fee fǝr nggǝta Waˈi Nefa kǝ hari fǝ ɓǝɓifecha. 46 Thlaˈama kǝ pǝɗamǝn. Thla nech fǝr nenchi, ǝ seˈi.”

47 Kǝ nak Yesu ɗar shenuˈta chat ǝ Yahuda ya arta hur kǝmsichiɗan kum nggǝrsǝ chap yu ǝ seˈi. Tǝ nggommǝn nafchǝ terchan, kǝsndǝ wan fuhwichǝ har, tǝ nggoˈloorcha. Paktǝ pangngǝncha tǝ paktechi Yahudawech thlǝnchi tanda. 48 Thla nech fǝr ndi tapi fǝranchǝ nggomǝn nafchaˈan wanɗǝsǝnan ndangkan tanda wa, “Thlanati nggǝthl ndǝ kafa, mǝthlan nech kǝ nafan. Kǝsa maandǝn.”

49 Kǝ ɓak Yahuda chat mbǝrkan ha ndelengnga kǝ thlǝma Yesu ndangkan wa, “Kaɓikaɗi, Thlǝ chaˈanan kaɗi” Nggǝthl kan ndǝ kafa.

50 Nggǝmangkǝ Yesu wa, “Shiketǝna, chu ǝnɗi ɓech tǝ wechi.”

Chat ɓak nafchaˈan kǝsan kandǝ Yesu, kǝskandǝ anchi har ɓakrak. 51 Tǝ nat kǝɗu, artǝ hur fee nech tǝ Yesu, kǝtankan wan fuhwaˈyan kesh, chathl kan mafati kappa pangnda, thlenkan thlǝmatˈyan kaɗi.

52 Ndangkǝ Yesu wa, “Nggǝran wan fuhwaˈyo kaɗi, kǝthlǝm nat thla yanchǝ tǝ wan fuhwa, nechan mǝrta tǝmɗi wan fuhwa. 53 Sakcho wa nii mbahǝn shiyanchi Papa, paɗ kǝɗ thlǝ nakanya kǝ thlǝnichǝ fǝ thlǝnchiɗi nech pǝɗandǝ wumǝn fǝ thlǝrwecha ha kum nggǝrsǝ chap wa? 54 Hacha, kan tǝ kǝni naa fee ndiiɗa ndǝ ǝnɗi ha mbuˈtǝ fee hur Ndikti Fartǝɗi ndech wa nwaat ǝnɗa kǝ sǝɓa?”

55 Ə wanshengngǝnˈini ndangkǝ Yesu nggomǝn nafchaˈan wa, “Ɓechowun kesh tǝ wan fuhwi cha, tǝ nggoˈloorcha kǝ kǝsi chuwun kǝɗ tǝni kǝ thlǝ fasa fata? Weenmǝta thlǝ chokchi ǝ Wiri Farta thlǝ chaˈanchi kaɗi kǝsi wowun wa. 56 Paɗ nat ichiɗi sǝɓchiya ndiiɗantǝ ǝnɗi ha mbuˈtǝ fǝ shenuˈta tǝ yahti Farta ǝ hur yara ndikti Farta.”

Kǝ sǝkkǝ kǝmsichiyan kǝɗuyu rakakanda, malkandǝ anchi ha.

57 Chat fee kǝsanchi Yesu ɗǝkandǝ tǝ ndi kǝ pangngǝn Kayafa, kapa pangnda, mǝɗi nggomndǝ fǝ chaˈandǝ kusiˈ i Musa kaɗi tǝ paktechi Yahudawecha. 58 Paɗ nak Biturus para ndi mǝt langngǝ toppaˈ, har kǝ saˈndǝ kǝ hur wiri kapa thlǝ pangnda. Kǝ yimkansi chokkan ha tǝ fǝ pǝk mii mbanchǝ har kǝthlǝm kǝ naa ndukwa ǝnɗi na fee tǝɓanda. 59 Tǝkǝɗu, paktǝ pangngǝncha tǝ takǝɗ paktechaˈan, kakandǝ koha lekcha thla naa fee chandǝ Yesu kafa kǝthlǝm kǝ mbǝsndǝ mban ɓilanda. 60 Paɗ mbǝswa nda wa, chǝka nakan fowunsi terchan fǝrchǝ koha lekchi kafˈyan. Ə ndukwaɗan ɓak fowun nafchǝ chap kǝ pangnga. 61 Ndakanda wa, “Ndech naf ɗa wa nan mbahan tǝtokandǝ Wiri Farta kaɗi paɗ kǝ nggǝrtǝ tǝnanda ǝ hur mǝndǝ mahkan.”

62 Chat thlaˈkǝ kapa pangnan kit ndangkan wa, “Ə nggǝmndiyosi kǝ ɗar ǝnɗi mbuˈtǝ nafchiɗa kǝ ɗar wa wa?” 63 Paɗ nggaskǝ Yesu ɓaˈ. Chat ndangkǝ kapa pangnan wa, “Wumuchi tǝ Farta thlǝ Shishingnda, mbuˈaˈan ndǝn ndu chǝ nech kǝ Kǝristi Waˈi Farta wa.”

64 Nggǝmangkǝ Yesu wa, “Aa kit mbuˈtu. Paɗ nggǝt mbuˈowunda, thlaˈtǝ nakanya nowun naa nggǝta Waˈi Nef ɗas ǝ harsǝm i Thlǝ Maanda, mǝthlan ɓat paɗ ǝ hur husamba ǝ hulafǝrta.”

65 Chat kapa pangnan thlahankan kapatˈyan kaɗi kǝthlǝm sǝɓtǝ hwira, ndakan wa, “Mǝthlan ˈyara Farta. Shendi mǝ peˈtǝ mǝn kata? Nakanya sǝk wun ˈyaraɗi ˈyaratǝn Farta. 66 Mǝ nech kǝ kaɗatˈyowun?”

Nggǝman kanda wa, “Cheˈsi kǝ ɓǝlan fee, kǝ ɗar ǝnɗi mbuˈtǝn.”

67 Chat chǝhan kandǝ yahtǝ kǝ chimanda, thlǝ thla fangkandǝ fa. Fee mbǝmbalan chǝf yu, 68 ndakanda wa, “Kulo, nakan chǝ nech kǝ Kǝristi. Mbuˈaˈan ndǝn wun mbalech wechi?”

69 Ə wanshengǝnchǝˈini Biturus mǝthlan ɗas file wuran. Chat ɓak yowun wannuwaa thla thlǝ chich ter ǝ wuran mbǝsndi ndangkan wa, “Chǝ paɗ necho tǝ Yesu thlǝ Galiliyawa tǝɗa.”

70 Paɗ askǝ Biturus inda ǝ pangngǝn nandǝ nat ndakan wa, “Nggǝt sǝn wi ǝnɗi natu ndiktǝ kǝ ɗaran wa.” 71 Kǝ ɓakan kesh kǝ mii wuran, chat nggǝrkǝ mafa wannuwaa nandi, ndangkan fee nech kikit minni wa, “Naf ɗiya mǝthlan tǝ Yesu thlǝ Nazarata.”

72 Nggǝrkǝ Biturus asˈinda tǝ ransata nakan ndat wa, “Lawi la sǝn nafan wa.”

73 Machi tollaa chat fee nech kikit minni ɓakandǝ nda ndǝ Biturus wa, “Asˈindǝs wa chǝ paɗ artǝ hurnanda. Kǝthlǝm weˈtǝ ndiktiyo pǝntǝ mǝɗi ɓatu.”

74 Chat nggakkan hommbandǝ indiyan nakan ransata, nakan ndat wa, “Lawi la sǝn naf ɗa wa.”

Chat chat kǝɗuyu kwarkǝ chakkarta. 75 Chat kuɗukkǝ Biturus tǝ ndiktǝɗi nda ndǝ Yesu tǝ ndat wa, “Kǝn chakkartǝ kwarta, no ass in sǝn nenchi harke mahkan.” Chat chek Biturus kesh tǝkan kaan.