1 Fǝ Chaˈandǝ Kusiˈ i Musa kaɗi, tǝ Farisiyawecha, fee ɓech ǝ Urshelima nggom kandǝ kǝ thlǝma Yesu. 2 Nakandǝ fowuna hur kǝmsichiyan sǝm ǝn tǝ harcha yohthlǝm nda, ndaˈan nech ngga tǝ chapa ndǝ her kaɗ kǝɗ ǝnɗi mbuˈtǝ raˈat ˈyanda wa.

3 (Kǝthlǝm Yahudawecha, tǝ Farisiyawecha, nat nda, sǝm wandǝ ǝn maa ngga tǝ chapandǝ her kaɗ wa, thlǝ nechan ndǝ chǝt tar raˈat ˈyanda kǝɗ yi kaakechnanda. 4 Maa ǝ ɓi ndǝ kaɗ ǝ lǝmo, sǝmwa ndǝ ǝnawa maangga tǝ chappandǝ harchi kaɗ wa. Ichǝs terchan thlǝ thlǝna ndǝ nda, kǝthlǝm kǝ par fee, kǝɗ chapandǝ tǝɓ saa em kaɗi, tǝ ɓucha tǝ kuruɓcha.

5 Chǝhan kǝ Farisiyawecha ɗi tǝ fǝ Chaˈanchaˈan kaɗi tǝ ndat wa, “Kǝthlǝm mǝ thlǝ para waktǝ kǝmsichiyo ǝnɗi mathlǝ pangngǝnchamǝn ha choh, nakandǝ sǝm ǝna ngga tǝ harchiɗi nech chiɗ chiɗ wa?”

6 Nggǝrang kan tandǝs wa, “Keˈkeˈ mbuˈtǝ thlǝ shenuˈta tǝ yahti Farta Ishaya kǝ ɗarwun kun fǝ wenikicha ndat wa,

8 Ndang kǝ Yesu tanda wa,“Malawun kusiˈ i Farta, nakowun para raˈati nafcha.”

9 Ndang kan tanda wa, ‘Kittaˈan ɗathl mal mban kusiˈ i Farta ha ˈyowunsi, kǝthlǝm kǝ nowun chǝt tar raˈat ˈyowun ndak. 10 Kǝthlǝm ndech Musa wa, ‘Kǝ fireen maanda kǝ chu tǝ mu.’ Ndakan paɗ wa, ‘Nat thla ˈyarech chinan tǝ manan nwaat kǝ ɓǝlan fee.’ 11 Paɗaa kun ndechowun wa, maa ǝ ndan nef chinan ndu manan wa, ‘Nat ǝnɗi mǝ natwun mbǝs tǝ mǝɗinchi tapi chok kǝ Korban,’ ndaˈan nech kǝ ǝnɗi fǝrandǝ fee Farta. 12 Tǝ kǝɗu njankowun nef ini kǝ nggǝr tǝ chan ǝn chinan tǝ manan wa. 13 Tǝ kǝɗu thlǝ natwun tǝr ndikti Farta, kǝɗ ngga ǝnawa. Kǝthlǝm tar raˈatˈyowun thlǝ chaˈandǝ wun nafchǝ har. Thlǝ natwun chǝt ichi kaan kǝɗ thlenni.”

14 Nggǝrkǝ Yesu ˈya nafcha, ndang kan tanda wa, “Kam thlǝ mat ha natwun kǝ sǝkwun nenchi, tǝ paɗ kǝ wathlowunchǝ ǝnɗi ha nati nbuˈta. 15 Ngga ǝnɗi thlǝ yimchǝ kǝ hwiri nefa, ndaˈan thlǝ tǝkma kaɗ ǝ pangngǝn Farta wa, ǝnɗi thlǝ chech kesh meˈi nefa ndaˈan thlǝ ɗǝfchi nefa kǝ tǝkǝm nan ǝ pangngǝn Farta.” 16 [Thla naa thlǝma sǝk tansi kǝ sǝka.]

17 Kǝrsi mal nafchaˈan ha yim kan kyeuri, chǝhan kǝ kǝmsichiyan wan ngaˈal saktǝ ndiktaˈan. 18 Nggǝrang kan tandǝs wa, “Kun paɗ wathlowun wa ha wa?” Sǝnwowun wa nat ǝnɗi yimchǝ kǝ hwiri nefa thlaˈ tǝ heshi, tǝkma wa nef kaɗ ǝ pangngǝn Farta wa, 19 Kǝthlǝm ǝnɗi nech heshi ngga thlǝ yimchan kǝ hur wanɗǝkaɗatˈyan wa, yimchan kǝ hwirˈyan, kǝnan chet kesh.” (Tǝ ndiktiɗiya pǝndǝ Yesu nat ɗǝsǝm nda chiɗ chiɗ ǝ pangngǝn Farta)

20 Ɗǝkan kǝ pang tǝ ndat wa, “Ənɗi chech kesh meˈi nefa ndaˈan thlǝ tǝkman chǝ nef kaɗi pangngǝn Farta. 21 Kǝthlǝm thlaˈtǝ hur wanɗǝkaɗati nefa, thlǝ naa ɓǝɓi kaɗat ɓat kesh. Kaɗa ɓǝɓifata, rinnikǝta, yarkǝta, ɓǝlfata, 22 tǝ fǝlaukǝta, tǝ yah inda, tǝ sǝraˈta, tǝ lǝkta, tǝ kǝs ǝn kǝ hur, tǝ sǝɓandǝ thlǝm nef kaɗi, tǝ maan inda, tǝ kumi kaɗa ǝna. 23 Nat ichiɗiya thlǝ nechandǝ ɓat kesh hur wanɗǝkaɗati nefa, nakandǝ tǝkǝmandǝ nef kaɗi.”

24 Thlaˈkǝ Yesu minni, pǝɗakan nduk tǝ mǝrɓi Taya tǝ Sidon. Yim kan kǝ wiri nefa, yah wa kǝ sǝn nafcha wa, chǝka kǝɗu mbahǝn wa wuɓandǝ indiyan wa. 25 Chat kǝɗuyu nunef si thla naa waˈyan kǝ nuwa tǝ ɓǝɓi shemet fa sǝk kan kusheˈtaˈan, ɓakan chamkan kuruminchǝ ha ǝ pangngǝn Yesu. 26 Nunafan thlǝ Helenawata. Nggǝt chǝ fee ndi ǝ mǝrɓi Fonikiya, thla nech hahi Suriya. Shiyan kan Yesu kǝ chen tǝ ɓǝɓi shemet kesh fi waˈyan. 27 Nggǝrang kǝ Yesu su wa, “Malan wancha kǝ sǝm nda kǝ ngal ndǝ kwaɗǝn, kǝthlǝm kǝmwa si kǝ mǝkan fee ɗǝsǝmndi wancha yiɗcha wa.”

28 Tǝ kǝɗu, nggǝrang kǝ nuɗi suwa, “Aa, kǝɗuyu, Chinda, paɗaa chǝka yiɗcha thlǝ nechandǝ sǝm fishir tǝ ǝnɗi thlǝ nech hǝhataɗ kah mǝɗi wancha.”

29 Ndangkǝ Yesu wa, “Kǝthlǝm ngǝmǝn ɗi fǝrtu ya, ɗu kaɗi, pongngǝn hwaˈran maltǝ wannan ˈyo ha.

30 Nggǝrang kǝ nuɗi in kaɗi, mbessankan waˈyan ɗuk ɗar mǝt hunata, hwaˈran paɗ chi kesh fiyan.

31 Chek Yesu kesh ǝ thle Taya, parakan tǝ Sidon ɗǝkan kǝ Hawurtǝ Galili ǝ thle Dikafolis. 32 Ə minni ɓang kǝ fee tǝpeng, thla thlǝ mbahǝn wakchǝ ndikta, shiyan kanda, kǝ tǝkantǝ her nafan fa. 33 Kaɓ kǝ Yesu tǝpeng tǝɗi kǝ mǝɗi nawaktǝ nefsi, pakan wan harchiyan kǝ thlǝmechi nafan, chǝhakan yahta, tǝkankan her wanshenuˈti nafan fa. 34 Thlaˈan kǝ Yesu indǝ kafǝrta kǝt kan yiptǝ, ndakana, “Iffata” (ndaˈan nech kǝ) “Inuha.”

35 Chat kǝɗuyu inkǝ thlǝmati tipeng tǝ ɗa hayu, ǝnɗi kǝnanchi wanshenuˈtiyan, kwaskan ha, nggak kan shenuˈtǝ ndiˈchan. 36 Kahankǝ Yesu thlǝmat ˈyanda mǝ mbuˈandǝ nefa wa. Nat tǝ ter tǝɗi nda ndǝn tanda wa mǝ mbuˈ nda wa, fen paɗ nakandǝ ɗǝt kǝ pang tǝ mbuˈ ǝnɗi sǝɓcha. 37 Nafchaˈan ndiiɗ kandǝ tǝ saka inda, ndaka nda wa, “Chǝt chǝkami ndiˈchan. Mbahǝn tǝ ɗǝf tǝpeng kǝ ndika. Fee thlǝ sǝk wakchǝ mǝt paɗ, ɗǝf tǝ tandǝ kǝ sǝk nda.”