1 Ə hur wan minchiˈini, nggǝr kǝ nafchǝ nggom ndǝ terchan. Nakan ǝnsi nat ndǝ sǝm nda wa, ˈyak Yesu kǝmsichiyan, ndang kan tanda wa, 2 “Nggomǝnɗiya tandǝ haɗitǝ fa, kǝthlǝm mǝndǝ mahkan tandǝ tǝ nggǝta, paɗ ǝnsi natndǝ sǝmnda wa. 3 Maa ǝ kallinchǝ tandǝ ha kǝ ɗǝ ndǝ kaɗi tǝ mita, fowuna naa fat wulandǝ tandǝ ɗar mbanda, kǝthlǝm fowun ɓechandǝ mǝt langnga.”

4 Nggǝmang kǝ kǝmsichiyan wa, “Nech fee mbǝs ɗǝsǝmǝnɗi nech nggallandǝ tertǝ nafchǝɗa hur chanjang ɗiya ayi?”

5 Chǝhan kan mee tanda wa, “Ɓilshet kurmi nessiyowun?” Nggǝrang kandǝs wa, “Muɗ.”

6 Ndang kan tertǝ nafchaˈan wa kǝ chok ndǝ ha kǝ haha. Tǝr kan ɓilsheɗi muɗ yu, chankan usoko Farta, chichenkan ha, chakan kan kǝmsichiyan kǝthlǝm kǝ fǝrandǝ nafchaˈan, fen paɗ chǝkandǝ kǝɗu. 7 Wan yirǝf chiyandǝs ngguɗyeh. Chankan usoko Farta, ndang kan kǝmsichaˈan wa kǝ chakandǝ nafchaˈan paɗ. 8 Sǝm kǝ nafchaˈan, nggal kanda, ngomankandǝ takǝt fishirchaˈan, ndiiɗan tǝ inaftǝ muɗ. 9 Tertǝ nafchǝɗi sǝmchǝ ɗǝsǝmǝnɗi hǝssa aruˈ foɗɗa. Kalkan tandǝ ha. 10 Chat kǝɗuyu yim kan kǝ hur kombawal fen tǝ kǝmsichiyan pǝɗakandǝ kǝ thle Dalmanuta.

11 Ɓak fowun Farisiyawecha kesh nggak kandǝ as indǝ tǝ Yesu. Nakandǝ chǝhan mee kǝ pǝnantǝ tandǝ wanɗǝ sǝnda ǝ hulafǝrta, kǝthlǝm kǝ kaɗa nda. *8:11 Mat 12:38; Luk 11:16 12 Kǝt kan yiptǝ tǝ alkǝta, ndakan wa, “Kǝthlǝm mii naa nafchi yuwa heshiɗiya kaa wanɗǝ sǝnda? Kittaˈan nati mbuˈowunda, nggǝ fee fǝr wanɗǝ sǝnda kǝ nafchi yuwa heshiɗiya wa.” *8:12 Mat 12:39; Luk 11:29 13 Malkan tandǝ ha, nggǝr kan yim ndǝ kǝ hur kombawal, chenkan hawurtaˈan kǝ kǝ heshi thla.

14 Nakan kǝmsichi Yesu mbǝtan kan tanda, ɓawandǝ tǝ njohǝma wa, njohǝm artǝ ndak nesiyanda hur kombawal taˈan. 15 Kahan kǝ Yesu thlǝmechˈyanda, ndakan wa, “Mbǝranmsi tǝ yisti i Farisiyawecha tǝ yi Hiridus.” *8:15 Luk 12:1 16 Nakandǝ chǝhandǝ raˈan, ndakanda wa, “Mbuˈchan kǝɗu kǝthlǝm kǝɗ ǝnɗi nawaktǝ njohǝm ˈyamǝn su wa?”

17 Yesu sǝntǝ ǝnɗi nat ndǝ kaɗata, chat ndang kan tanda wa, “Kǝthlǝm mii natwun naa chihandǝ raˈan wa njohǝm yowun su wa? Wathlowun wa ha paˈ kǝ nakan ya wa, paɗ sǝnwowun wa? Kǝthlǝm mǝ naa wanɗǝkaɗech ˈyowun kwaˈkwa? 18 Wenitǝ yowunsi, nawowun mǝta wa? Thlǝmechˈyowunsi, sǝk wowun mǝtsǝ wa? Kuɗuk wowun ǝna wa wa? *8:18 Irm 5:21; Eze 12:2; Mar 4:12 19 Kǝ chichenki ɓilsheɗi ɗǝrman yu kǝthlǝm nafchi aruˈ ɗǝrman, nggoman chowun fishir chaˈan inaftǝ kurmi?”

Nggǝmang kanda wa, “Inaftǝ kum nggǝrsǝ chap.”

20 Nggǝr kǝ Yesu chihanda mee ndat wa, “Chichenki ɓilsheɗi ha muɗ yu kǝthlǝm nafchiɗi aruˈ foɗɗa, inaftǝ kurmi ngomandǝ wun fishir chaˈan?”

Nggǝrkandǝs wa, “Inaftǝ muɗ.”

21 Ndang kan tanda wa, “Paˈya wathlowun wa ha wa?”

22 Ɓakandǝ kǝ mǝrɓi Betsaida, chat ɓak fee tǝ komnda, shiyan kanda kǝ tǝkantǝ her fa. 23 Kǝskan heri komǝnɗi chekandǝ kesh kǝ kǝrsǝ wan mǝrɓan, chǝhangkan yahtǝ kǝ wenita, ɗǝfankan herˈyan kǝ in, chǝhangkan mee, “Thlǝ mbahǝncho naa ǝna wa?”

24 Thlaˈan kǝ komǝnɗi indǝ kafǝrta, nda kan wa, “Nggǝt naa nafchǝ kuɗa, paɗ nggǝt naa tandǝ kǝɗ ɗǝfcha, tandǝ wiˈta.”

25 Nggǝr kǝ Yesu ɗǝf herˈyan kǝ wenitaˈan ˈyan, inan kǝ nafan wenitaˈyan ha. Kǝnkǝ wenitaˈyan kaɗi, nakan chǝka mǝ ha ndiˈchan. 26 Kalkan nafan ha kǝ pǝɗ kaɗi, ndang kana, “Kǝ ɓehǝn laa parat tǝ hur wan mǝrɓan wa.”

27 Chek Yesu kesh, pǝɗakan ndǝ tǝ kǝmsichiyan, yim kandǝ kǝ wan mǝrǝɓ chaˈan i mǝrǝɓ Kaisariya Filipi. Tandǝ ɗar mbanda, chǝhan kǝ Yesu kǝmsichiyan wa, “Thlǝ ndech nafchǝ wa wun naki?”

28 Nggǝman kanda wa thlǝ ndech fowun wa, “Chǝ Yohanna thlǝ chǝt baptisma. Fowun ndat wa chǝ Iliya thlǝ shenuˈtǝ tǝ yahti Farta. Paɗ fowun ndat wa arta hur fǝ shenuˈtǝ tǝ yahti Farta.” 29 Chǝhangkan tanda wa, “Kun paɗ kǝni? Thlǝ ndechowun wa wun naki?” Nggǝmankǝ Biturus wa, “Chǝ nech kǝ Kǝristi.” 30 Kahan kan thlǝmechˈyanda, mǝ mbuˈandǝ chǝka wun inɗiya wa.

31 Ə farti ini, nggak kǝ Yesu chaˈandǝ tandǝ har tǝ ndat wa, Waˈi Nefa nwaat kǝ saa ɓahtǝ samǝn samǝn. Paɗ kǝ kar paktechǝ nafcha ndi, tǝ paktǝ pangngǝncha, ta fǝ chaˈandǝ kussiˈ i Musa kaɗi. Nandǝ ɓǝlanda, paɗ far mahkanan kǝ thlaˈ tǝ shishingnda.” 32 Ndiktǝɗiya mbuˈchan hayang. Kaɓ kǝ Biturus ndi kǝ kǝthlar, nakan yananda. 33 Tǝɓǝr kan ha ɗǝpan kan takǝɗ kǝmsichiyan paɗ, yanan kan Biturus ha, ndangkan wa, “Nggǝran in kǝrsǝna Hweˈra, Kǝthlǝm tǝthl nen kaɗa ǝnɗi nech kǝ yi nafchǝ ngga yi Farta wa.”

34 ˈYakan nggomnan tǝ kǝmsichiyan kə ɓandǝ nduk tǝ ndi, ndang kan tanda wa, “Nat thla nech paranenchi, nwaat kǝ kartǝ fatˈyan, kǝ tǝrtǝ palangndiyan kǝ paranenchi. 35 Nat thla yahchǝ kǝ hǝraˈantǝ shishingndiyan nan kuɓata, nat thla paɗ fǝrchǝ shishingndiyan kǝthlǝm nggǝta, tǝ kwastǝ ndiktǝɗiya yi sǝkta, nan hǝraˈandǝ shishingndiyan. 36 Mǝnan thlendi i nef kaɗi ma mbǝstǝ heshi nat, kǝ kuɓa shishingndiyan? 37 Mǝ naa nef mbahǝn fǝrta kǝ ɓeɗa shishingndiyan? 38 Nakan chǝk wun harandǝ fata kǝthlǝm nggǝta, tǝ ǝnɗi thlǝ chaˈandǝ kaɗi, hur sǝɓtǝ heshiɗiya yi kumi kaakǝta, tǝ ɓǝɓifat kaan. Paɗ naa fat harandǝ Waˈi Nefa kǝthlǝm kǝt ndi, fartǝɗi natǝn ɓat kaɗ hur maandi Chinan, tǝ fǝ thlǝnchiyan fee chiɗ chiɗ.”