1 Ndangkan tanda wa, “Kittaˈan, nati mbuˈowunnda, fowunsi kikit mǝɗiya nggandǝ mǝr kwaɗǝn wa, naa ndǝ naa kutǝrakti Farta ɓat tǝ alkǝtˈyan.”

2 Kǝrsǝ mǝndǝ mich cha, tǝrkǝ Yesu Biturus tǝ Yakubu tǝ Yohanna, tǝr kan ndǝ kǝ ɗar ngwela thla nech njang, fen ichǝt nanda mǝt arta. Ə ɓeɗek fati Yesu ha ǝ pangngǝn nanda, 3 chǝk kapatˈyan kaɗ heɗǝɗǝ kaan mǝthlan chǝmndǝ fa, thla nawaktǝ nef mbahǝn chapandǝ kaɗ kaa heɗǝɗaa hur heshiɗiya kǝɗ thla natǝn. 4 Ɓak ndǝ Iliya tǝ Musa kǝmɗiyanda, nakandǝ ndiktǝ tǝ Yesu.

5 Ndang kǝ Biturus, Yesu wa, “Thlǝwira, keˈkesi nat mǝn mǝɗiya, naa ǝn tahǝs kuwurchǝ mahkan, arta kǝthlǝm cha, arta yi Iliya paɗ arta yi Musa.” 6 Sǝnwa ǝnɗi natǝn mbuˈta wa, kǝthlǝm pǝparindǝ ha kaan.

7 Ɓak husamba nggǝlandata, chek ɓǝratǝ kesh hur husambiˈan, nda kan wa, “Thleya Waˈinchi. Thla thlǝ mbǝndifaɗan kaan. Sǝkamndi.” *9:2-7 2 Bit 1:17-18

8 Chat nakandǝ ɗǝpat ha, nawandǝ nefa wa, nakan ndǝ Yesu ichiɗan thlǝmat nanda.

9 Kǝ nakandǝ ɓat kah ɗar ngwallan, kahan kǝ Yesu thlǝmech ˈyanda mǝ mbuˈa ndǝ nef ǝnɗi nat nda wa, maangga tǝ thlaˈan fee Waˈi Nefa ǝ mǝrtǝ kwaɗǝn wa.

10 Kǝthlǝm ndaˈan kǝskandǝ ndiktaˈan har, nakandǝ chǝhandǝ raˈan wa, “Mǝ natǝn saktǝ tǝ thlaˈti mǝmatecha?”

11 Chǝhan kandǝ mee, nda ka nda wa, “Kǝthlǝm mǝ nda fǝ Chaˈandǝ Kusiˈchi kaɗ wa, naa Iliya ɓat kwaɗǝn kǝn Kǝristi ɓata?”

12 Nggǝrang kan tandǝs wa, “Kittaˈan naa Iliya ɓat kwaɗǝn, kǝ nggǝranchǝ kaɗ kǝ nandǝ keˈke. Nggǝrkan chihandǝ tandǝ mee, kǝthlǝm mi yara ndǝ fee ha kǝ ɗar Waˈi Nefa wa nan saa ɓahtǝ samǝn samǝn, kǝ njiran fee kaɗi? 13 Paɗaa nggǝt mbuˈowunda, tapi ɓi Iliya, paɗ chan nafchǝ ichiɗi yahtǝ nda, kǝɗ ǝnɗi yarandǝ fee ha hur Laulawati Farta kǝ ɗaran. *9:13 Mat 17:13

14 Kǝ ɓakandǝ kah kǝmɗi takǝɗ kǝmsichaˈan, nakandǝ nggomnan tauran ndǝ takǝɗ kǝmsichaˈan ha, nakandǝ fǝ Chaˈandǝ Kussiˈ i Musa kaɗ asˈinda tǝ tanda. 15 Nat ngomnan, kǝ nakan ndǝ Yesu, sakandak indǝ kaan, rakaka ndǝ kǝmɗiyan kǝthlǝm kǝ ndandǝ ǝna.

16 Chǝhangkan tandǝ mee, “Mǝ natwun asˈinda tǝ tandǝ kǝ ɗaran?”

17 Yowun hur nggomnan nggǝman kan wa, “Thlǝ chaˈanan kaɗi, tǝ ɓuchi waˈinchi, thla naa ɓǝɓi shemet fiyan, njanchi shenuˈta. 18 Nat fartǝɗi thlaˈandǝn, thlǝ nechan thlǝf anchi ha, huɓ kǝ meˈyan, nakan kang wan thlancha, paɗ thlǝ shingnganchan fatˈyan kaɗi. Shiyani kǝmsichiyo kǝm kǝ kǝtandǝ ɓǝɓi shemeɗan kesh, paɗ mbahǝn wanda wa.”

19 Nggǝmang kǝ Yesu tanda wa, “Aˈyowun, nafchi sǝɓtǝ heshiɗiya fǝ kumi fǝr kit. Kǝ kwat nati choktǝ tǝ wunchi? Kǝ kwat nati kǝriswunchi? Ɓamitǝn ndi.” 20 Ɓakandǝ tǝ wannan kǝm ɗan.

Kǝ nak shemeɗan Yesu, chat ɗǝfkan wanan ha nak fatˈyan rǝɓtǝ fa. Hǝm kan ha, nakan takǝrtǝ ha, nak meeˈyan huɓta. 21 Chǝhankǝ Yesu chin wannan, nggak chǝ ǝnɗiya kwati?

Nggǝman kan wa, “Kǝ natǝn kǝ waa. 22 Thlǝ nechan mǝk anchi kǝ wata, tǝ ema, kǝthlǝm kǝ ɓǝllanchi. Paɗaa maa no mbahǝn chǝt ǝna, kǝ haɗu chǝ ǝnfa, kǝssaˈansi.”

23 Ndaˈan nda Yesu wa, “Michich chǝhitu wa, ‘Ma no mbahanda’? Nat ichi paˈpaˈ kǝmɗi thla fǝrchi kit.”

24 Chat kǝɗuyu, thlaˈankǝ chin wannan ɓǝrata tǝ alkǝta ndakan wa, “Fǝrinchi kit, kǝsisi chekan fǝr kit inchi.”

25 Kǝ nak Yesu nafchǝ chekta kǝmɗiyanda, yanan kan ɓǝɓi shemeɗan ha, ndang kana, “Shemeta thla thlǝ njanchǝ wanɗiya shenuˈta tǝ sǝkta, nduchi wa ɓo kesh fiyan, mǝ nggirin yimndǝ kafˈyan wa.”

26 Hwak shemeɗan, nakan saktat fǝ kaan, chekan kesh fǝ wannan. Wanan ɗuk haha kǝɗ tǝ mǝra, nak nafchǝ terchan ndat wa, “Ə miri.” 27 Paɗaa kǝskǝ Yesu heri wannan, thlaˈan kan, mǝthlan paɗ thlarkan kit.

28 Kǝrsǝ nggǝrandi Yesu in kaɗ kyeuri, chǝhankǝ kǝmsichiyan mee ǝ wuɓta, ndang kanda wa, “Kǝthlǝm mǝ mbahǝn waktǝ ǝn chendǝ ɓǝɓi shemeɗan kesh?”

29 Ndang kan tanda wa, “Ɓǝɓi shemet kǝɗ thleya, chewa ndǝ kesh kǝɗu wa, mangga shenuˈtǝ tǝ Farta wa.”

30 Chek Yesu kesh tǝ kǝmsichiyan minni, para kandǝ tǝ thle Galili. Yahwa kǝ sǝn nafcha wa tandǝ minni wa, 31 kǝthlǝm thlǝ chaˈanchan kǝmsichiyan har tǝ ndat wa, “Naa fee fǝr Waˈi nefa kǝ hari nafcha. Nandǝ ɓǝlanda. Kǝrsǝ mǝndǝ mahkan nan thlaˈtǝ paɗ.” 32 Paɗaa sǝn wandǝ ǝnɗi natǝn mbuˈta wa, nakandǝ lekǝt chǝhan mee.

33 Yesu tǝ kǝmsichiyan ɓakandǝ kǝ Kafarnahum. Kǝ yim kǝ Yesu kyeuri, chǝhan kan kǝmsichiyan tǝ ndat wa, “Kǝ ɗar mǝ natwun asˈindǝ mbanda?”

34 Paɗaa nggas kandǝ ɓaˈ kǝthlǝm hur mbanda tandǝ asˈin ndǝ tǝ ndat wa wun nech manchan kaan. *9:34 Luk 22:4 35 Chok kǝ Yesu ha, ˈyakan fee kum nggǝrsǝ chap yu, ndang kan tanda wa, “Nat thla yah chǝ kǝn manchan, nwaat kǝ chok tǝ maan inda wa, kǝ chok kǝ thla nech ngguɗyeh. Kǝ chok kǝ mafati chǝka wun paɗ.” *9:35 Mat 20:26-27; Mat 23:11; Mar 10:43-44; Luk 22:26

36 Chat tǝrkan wan waa thlaran kan ha kǝ hur ɗǝfi tǝ nanda. Kǝs kan heri wanan har, ndang kan tanda wa, 37 “Nat thla thlich wan waa kǝɗ thleya kǝthlǝm thlǝm na, nggǝt thlǝtǝn, thla thlich nenchi paɗ, ngga nggǝt thlǝtǝn wa, thla thlinchi nenchi thlǝtǝn.” *9:37 Mat 10:40; Luk 10:16; Yoh 13:20

38 Ndang kǝ Yohanna, Yesu wa, “Thlǝ chaˈanan kaɗi, ni ǝn nefa kǝtandǝ hwaˈarchi kesh hur thlǝm wa, njankaˈan paɗ, kǝthlǝm mǝthlan artǝ hur ǝn wa.”

39 Paɗaa ndak Yesu wa, “Kǝ ˈyata wun wa, kǝthlǝm nefsi nech mbahǝn chǝt ǝna saka inda hur thlǝm na, kǝ nggǝr tǝ mbuˈ sǝɓtǝ ǝn kǝ indinchǝ wa. 40 Kǝthlǝm nat thla nawakchǝ kǝ atǝkretǝmǝn, yimǝn ni. *9:40 Mat 12:30; Luk 11:23 41 Nggǝt mbuˈowun kittaˈan, nat thla fǝrowun chi ˈyam sata chǝka hur tǝɓ saa ema hur thlǝmna, kittaˈan nati mbuˈowunda, nggech kuɓa titiyan chǝka ngguɗyeh wa.” *9:41 Mat 10:42

42 “Maa ɗǝf yowun arta hur wan wanchiɗiya, fee fǝrchi kit kǝmɗinchi kǝ chǝ ndǝ ɓǝɓifata. Ɓahtǝɗi natǝn sata, kwech chan kǝ kǝnan fee ɗakwan fǝn haˈta kǝ ɓǝrata, kǝ mǝk fee ndi kǝ hur hawurta. 43 Ma thlǝ ɗǝfchǝ herˈyo wechi kǝ chin ɓǝɓifata, kwech chan kǝ thleen kaɗi. Nan nat ndiˈchan kǝ yimin kǝ shishingnda kǝ kwekǝchi tǝ her arta, mǝni yim ndǝ kǝ hur wata tǝ harchi chap. Waɗan ɓǝlawu fee wa, 44 [ǝ minni paɗ waˈchiɗi nech kangnga ndǝ tanda mǝrwa nda wa, waɗan paɗ nggǝ fee mbahǝn lifanchi wa.] 45 Maa thlǝ ɗǝfchǝ sartiyo wech kǝ chin ɓǝɓifata, thlen ko kaɗi. Kwech chan kǝ yimin kǝ hur shishingnda kǝ kwekǝchi tǝ sartǝ arta, mǝni kǝ mǝk fee wech kǝ hur wata tǝ sarchi chap.” 46 [ǝ minni paɗ waˈchiɗi nech kangnga ndǝ tanda mǝrwa nda wa, waɗan paɗ nggǝ fee mbahǝn lifanchi wa.] 47 Ma naa wenitiyo ɗǝf wech kǝ chin ɓǝɓifata, huhlanko kaɗi. Kwech chan yimndu kǝ hur kutǝrakti Farta tǝ wenitǝ arta, mǝni kǝ mǝk fee wech kǝ wata, tǝ wenichiyo chap.*9:47 Mat 5:29 48 Ə minni,

49 “Na fee hilengnga ndǝ chǝka wuni kǝn chiɗ chiɗ tǝ wata, kǝɗ thla thle chapandǝ fee ɗǝsǝm ndǝ kaɗ tǝ fisha. *9:49 Lfr 2:13

50 “Fisha ǝna thla nech ndiˈchan, paɗaa maa tapi tǝr mbǝnan kaɗi, tǝ mǝ naa fee nggǝrandǝ mbǝnan kaɗi? Chokam tǝ mbǝndi fish fǝ pǝthlǝrwun, kǝthlǝm kǝ chok wun has has tǝ raˈan.” *9:50 Mat 5:13; Luk 14:34-35