1 Kǝɗu, mǝ natmǝn ndata kǝ indi Ibrahim, kaakat kaakechmǝn tǝmɗi fata? 2 Ma mbǝs chǝ Ibrahim chok chǝdchǝɗ kǝta ǝ pangngǝn Farta, tǝmɗi tarchiyan hacha, ǝn ˈyansi thla natǝn hupandǝ kirshi si. Kǝɗu taˈan ngga ǝ pangngǝn Farta wa. 3 Mǝ nda ndikti Fartaˈan? “Fǝr Ibrahim kit kǝ Farta, fǝr kittiˈini ˈyanyu shengngan fee tǝ ndat wa, kaakǝta kǝmɗiyan.”

4 Nafɗi nech chit tar tita, titiyan ngga pafǝn wa, kǝnau terˈyan. 5 Thla thlǝ chiwak chǝ tar tita, paɗ fǝr tǝ kit kǝmɗi Farta, thla thlǝ hǝraˈanchǝ fee nawakchǝ chǝdchǝɗ. Thlǝ shengngan chǝ fee fǝrkit ˈyan, tǝ ndat wa, kaakǝt hacha. 6 Kǝɗu paɗ mbuˈtǝ Dauda kǝ ɗar mbǝsˈǝn har, nafɗi thla shengnga ndǝ Farta kaakǝta kǝmɗiyan, ngga kǝthlǝm tǝ chit tar tita wa. Nda kan wa,

9 Mbǝsˈǝnaɗi har ya yi fee hecha ndǝ fee ndakwa, ndu nat tǝ fee hecha wak tǝ fee wa? Ai, ǝnɗi thlǝ natmǝm mbuˈta ndaˈan nech wa, “Shengngan fee fǝr kit i Ibrahim ndat wa, kaakǝta kǝmɗiyan.” 10 Kǝɗu, tǝ yen mbenna shengnga ndǝ fee kaakǝt ɗiyan ya? Shengngan chǝ fee, kǝn fee hechanda wa, ndu kǝrsǝ hechet ˈyan wa?

11 Hecheta thla chandǝ fee Ibrahim tǝn kǝ wanɗǝsǝnda, thla wathlanchǝ ha tǝ ndat wa, mbǝs chan kaakǝta tǝmɗi fǝrkit thla nech siyan, fartǝɗi hechawak tǝ fee kwaɗǝn. Kǝthlǝm ndaˈan mǝthlan nech kǝ chinda kǝmɗi fee fǝr chǝ kit paɗ hechawu fee tanda wa, kǝthlǝm kǝ shengngan fee kaakǝt tandǝ kaf paɗ. 12 Paɗ Ibrahim nech kǝ chinda kǝmɗi fee hechecha, ngga fee hechandǝ fee tandǝ ndak wa, kǝɗu fee thlǝ nech wiˈta hur fǝrkit, thla nech si chinmǝn Ibrahim kǝn fee hechanda.

13 Ɗǝf mii ɗi chandǝ fee Ibrahim waa tǝ kwathlan, ndat wa, nan chokta kǝ thlǝ sǝm kǝrsǝ mǝrta yi heshi, ngga tǝmɗi kusiˈ chandǝ fee wa, kǝthlǝm tǝ fǝr tǝ kit hacha, ndaˈan chicha thlǝt Farta anchi kǝ thlǝ kafat hacha. 14 Ma fee thlǝ parech kusiˈ tandǝ nech nat kǝ fǝ sǝm kǝrsǝ mǝrcha, awi, fǝrkit chok kǝ koha ǝna, ɗǝf mii yan chok wa kǝɗ ngga ǝna wa. 15 Kǝthlǝm kusiˈ thlǝ kaɓchan sǝbtǝ hwiri Farta. Mǝɗi nggawak tǝ kusiˈsi, nggǝ talandǝ kusiˈ sǝ wa.

16 Kǝthlǝm ndaˈan, ɗǝf miyan thlǝ ɓechan tǝmɗi fǝr kit, kǝthlǝm kǝ chok wa tǝmɗi kaakǝta, kǝ wathlanchi fee nech kǝ kwathl Ibrahim, ngga kǝmɗi fee nech kan ɗukwati kusiˈ ndak wa, kǝɗu fee naa fǝr kit ˈyanda kǝɗ Ibrahim. Mǝthlan nech kǝ chinmǝn nat. 17 Kǝɗ ǝnɗi natǝn kǝ yaraɗan ndat wa, “Ɗǝfinchǝ wechi kǝ chokin kǝ chinda kǝmɗi nafchi hahi chǝ terchan.” Mǝthlan nech kǝ chinmǝn ǝ panggǝn Farta, thla fǝrtǝn kitsi. Mǝthlan thlǝ fǝr chǝ shishinggǝnchǝ kǝmɗi mǝmatecha, thlǝ ˈyechan ichiɗi choh nawakchǝ si kǝ nden wa tan ndǝ si.

18 Paɗ Ibrahim chika mǝ nakan wa, nggǝ ǝna chit ˈyansi yi ɗǝf wanɗǝkaɗatsi fiyan wa, chat nakan ɗǝftǝ si. Fǝr tǝ kit wa nan chok ta kǝ chin pong nafchǝ terchan, kǝɗ ǝnɗi mbuˈandǝ fee tǝ ndat wa, “Kǝɗaya naa kwathlchu terta.” 19 Fǝr kit ˈyan chi wa hashas wa, ɗǝ pawa sherkǝt ˈyan wa, kǝthlǝm hurech ˈyan sheˈ kumchit kum arta ǝ fartǝ ini, ɗǝ pa wa tǝ ndat wa, Saratu kware ya wa. 20 Chiwa tuˈta tǝ ɗǝf meˈi Farta wa, tǝ pǝn kumi fǝr kit wa, kǝɗu chekan kan alkǝta hur fǝr kit ˈyan, nakan maanadǝ Farta. 21 Wathlanchi ha hur wanɗǝkaɗat ˈyan ndat wa, Farta alkǝtˈyansi kǝ chit ǝnɗi ɗǝftǝn miyan wa nan chita. 22 Ndaˈan chicha, “Shengnga ndǝ fee fǝr kit i Ibrahim kǝ kafata, kaf ˈyan.” 23 Thleya ndiktǝɗiya, “Ə shengngan fee kafˈyan,” ngga kǝthlǝm mǝthlan ichiɗan yara fee wa. 24 Kǝɗu yaran chǝ fee thleya kǝthlǝm nggǝmǝn paɗ, nggǝmǝn tǝɗi naa Farta shengnga mǝnda wa nggǝmǝn fǝ kafecha, nggǝmǝn tǝɗi fǝr chǝ kit kǝmɗi yan, mǝthlan tǝɗi thlaˈanchǝ Yesu Chinmǝn, hur mǝmatecha. 25 Kǝthlǝm ɓǝɓifechˈyamǝn fǝr tǝ fee Yesu kǝ mǝrta, paɗ thlaˈan fee tǝ shishingndǝ fa, kǝthlǝm kǝ mbǝs mǝn chokta kǝ fǝ sǝ ɓawakchǝˈǝn kaɗi ǝ panggǝn Farta.