1 Kǝthlǝm ndaˈan, mbǝsmǝn choktǝ kǝ fǝ sǝɓawakchi ǝn kaɗi ǝ pangngǝn Farta tǝmɗi fǝr kit, kaɓikaɗi ˈyamǝn si tǝ Farta tǝmɗi Chinmǝn Yesu Kǝristi. 2 Tǝmɗiyan mbǝstǝ mǝn yimnda kǝ hur kaakǝt ɗiya, thla nakanya thlar tǝmǝn si, tǝmɗi fǝrkit ˈyamǝn. Paɗ nggǝmǝn thlaˈandǝ kirsha tǝ ɗǝf kǝfat si ˈYi mbǝs maanɗiya i Farta. 3 Ngga ndaˈan ndak wa, kǝthlǝm paɗ nggǝmǝn thlaˈandǝ kirsha hur ɓahtiyamǝn ha, kǝthlǝm ǝ sǝnmǝn wa ɓahtǝha thlǝ kaɓchan kǝrǝs ǝna, 4 kǝrǝs ǝna, thlǝ ɓechan tǝ nat ha ndiˈchan, nat ha ndiˈchan thlǝ ɓechan tǝ ɗǝf wanɗǝkaɗat si. 5 Paɗ dǝf wanɗǝkaɗat si, nech ɗǝf minchi kǝ haraminchǝ fata wa chika ngguɗyah, kǝthlǝm Farta thlǝr tǝ kafatˈyan kǝ hur wanɗǝkaɗech ˈyamǝn, tǝmɗi Shemeti Farta, thla fǝramǝndǝ fee.

6 Fartǝɗi nawak tǝ alkǝt si fiyamǝn kwaɗǝn, keˈkeˈ ǝ wanshengngǝn ɗi kǝmchǝ si mǝr kǝ Kǝristi kǝthlǝm fee thlǝ para wakchǝ Farta. 7 Nan nat ˈyangˈyang kǝ mbǝs fee yowuna, kǝ fǝr tǝ shishingndi yan kǝthlǝm thlǝ kafata. Chika mǝ nakan wa, maˈ ya kǝthlǝm thlǝ kafata, yowuna nan yahtǝsi kǝ fǝr tǝ shishingndi yan. 8 Kǝɗu paɗ Farta wathlan chi ya mǝn ha, tǝ kafaɗi thlǝ natǝn chamǝnda. Ndat wa kǝ peˈkamǝn kǝ fǝ ɓǝɓifecha, Kǝristi mǝrchan kǝthlǝm nggǝmǝn.

9 Kǝɗ thlǝ nakan wa, hǝraˈamin chǝ fee nakanya tǝmɗi ferˈyan, awi ǝnɗi natǝn chamǝnda nan mbǝrandǝ thle ya ha, nan hǝraˈamǝnda hur sǝɓtǝ hwiri Farta. 10 Kǝ peˈchamǝn kǝ fee thlǝ chich atekrikǝt tǝ Farta, mbǝnaminchǝ fee kaɗi tǝ anchi tǝmɗi mǝrti Waˈyan. Kǝɗu, kǝɗ mbǝnamǝn kǝ fee kaɗya, naa fee hǝraˈamǝnda tǝmɗi natˈyan ha tǝ shishingndǝ fa. 11 Ngga kǝɗuyu ndak naa ǝnaɗan wa, kǝɗu nechamǝn thlaˈandǝ kirsha tǝmɗi Chinmǝn Yesu Kǝristi, thla nech tǝmɗi yan nakanya tahsandǝ fee pǝthlǝr mǝn kaɗi tǝ Farta.

12 Kǝthlǝm ndaˈan, kǝɗ ǝnɗi yimndǝ ɓǝɓifata kǝ hur heshi tǝmɗi nef arta, ɓǝɓifat paɗ ɓechan tǝmɗi mǝrta. Nakanya nat nafcha chǝndǝ ɓǝɓifata, kǝthlǝm ndaˈan, mǝrta chokkan kǝ ˈYi chika wuni. 13 Wan shǝgngǝnɗi fǝr waktǝ Farta kusiˈ ˈyan kwaɗǝn, ɓǝɓifata mǝthlan si hur heshi. Farta yara wa ǝn kǝ ɗar ɓǝɓifata wa, kǝthlǝm fǝr wa kusiˈ kwaɗǝn wa. 14 Nat tǝ kǝɗuyu, mǝrta chit kuturakta thlaˈta ǝ thlǝhati Adamu kǝ thlǝhati Musa, saɓ chika kǝ ɗar fee chewak chǝ kusiˈ kaɗi, kǝɗ ǝnɗi chit Adamu, thla nech kǝ saktǝ thla nech ɓaɗan.

15 Kǝthlǝm fǝr pafǝn tǝɗiya nechan samǝn ha tǝ ɓǝɓifaɗan. Ma tǝmɗi ɓǝɓifati nafɗi artiya ndat wa Adamu, mǝrtǝ nafchǝ terchan. Mǝ nechan choktǝ wa kǝni, kaakǝti Farta, tǝ kǝnau pafǝn tǝɗi natǝn fǝrta, tǝmɗi kaakǝti nafɗi artiya Yesu Kǝristi, nan wethlǝ ha kǝ ɗar nafchǝ terchan. 16 Fǝr pafǝn i Fartǝɗiya ngga nechan kǝɗ heˈtǝ ɓǝɓifati nafɗiya wa. Chak miyan thla chit fee kǝ ɗar ɓǝɓifati nafɗi artǝ yu, ndaˈan ɓech tǝ chak mee ˈYi tǝktǝkaɗi. Kǝɗu pafǝn tǝɗiya thla chit fee kǝ ɗar ɓǝɓifech terchan, ɓi tǝ mban hǝraˈta ǝ ɓǝɓifechǝɗi chitmǝn terchan. 17 Ma paɗ kǝthlǝm ɓǝɓifaɗi Adamu ya hacha, mǝrtǝ chit kuturakta, nggǝ fee kaɗan tǝ thleya tǝ thla chit Yesu wa. Nafchǝɗi chandǝ Farta kaakǝt tandǝ terchan, nggǝrandech kaɗ kǝ chok ndǝ tǝ kaakǝtfa ǝ panggǝnan, nandǝ chokta tǝ shishingndǝ fa kǝ chindǝ kuturakta tǝmɗi nafɗi artiya Yesu Kǝristi.

18 Kǝɗu, kǝɗ ǝnɗi kaɓtǝ ɓǝɓifati nef arta chak mee, kǝ indi nafchǝ nat, kǝɗu paɗ tar kaakǝti nafɗi artǝ yu Yesu Kǝristi chokkan wa, ndaˈan ɗǝfchǝ nafcha kǝ chok ndǝ kǝ fǝ kafecha ǝ panggǝn Farta. Nan ɗǝf nafchǝ nat kǝ mbǝs ndǝ shishingnda. 19 Kǝɗ ǝnɗi naa nafchǝ terchan choktǝ kǝ fǝ ɓǝɓifecha tǝmɗi kumi fǝr maandi nef arta, kǝɗu paɗ tǝmɗi fǝr maandi nef arta, naa fee nggǝrandǝ nafchǝ terchan kǝ chok ndǝ tǝ kaakǝt fa.

20 Ɓech Farta tǝ Kusiˈ ˈyan, kǝthlǝm ɓǝɓifata kǝ chikesh hayang. Kǝɗu ǝ mǝɗi naa ɓǝɓifat chekta, kaakǝti Farta mbǝran tǝ chektǝ ha kaan paɗ. 21 Kǝthlǝm ndaˈan, kǝɗ ǝnɗi naa ɓǝɓifata chit kuturakta kǝ ɓǝra mǝrta, kǝɗu paɗ kaakǝti Farta nan chit kuturakta kǝ ɗar nat ha ˈYi kafata, ǝ panggǝn Farta. Kǝɗu kǝ mbǝs mǝn shishingnda thla kǝ poriˈ, tǝmɗi Chinmǝn Yesu Kǝristi.