8
Nat ha hur alkǝti shemeta
1 Nakanya peˈwu chakmee su wa kǝmɗi fee nech kǝ yi Yesu Kǝristi. 2 Kǝthlǝm tarchi Yesu Kǝristi ǝnɗi naa shemeɗan mɓuˈta kǝ chifee kǝthlǝm kǝ mbǝsmǝn shishingnda hǝraˈamǝnchi mǝɗi ǝnɗi naa ɓǝɓifat mbuˈta kǝ chifee thla thlǝ ɓech tǝ mǝrta. 3 Ənɗi mbahǝnwaktǝ Kusiˈ chita kǝthlǝm kuɓandǝ fati pong nefa, ǝ chǝ Farta. Chapankǝ Farta alkǝti ɓǝɓifat kaɗi ǝ fi nefa, tǝmɗi waˈyan Yesu Kǝristi. Thlǝndǝn thla ɓech kǝ pong nefa nawaktǝ ɓǝɓifat ˈyansi. 4 Chich Farta thleya paɗ, kǝthlǝm kǝ chokmǝn kǝɗ ǝnɗi yahtǝ Shemeti Farta ngga kǝɗ ǝnɗi yahtǝ fati nefawa. Kǝ chimǝn ǝnɗi nech ndiˈchan thla yahtǝ kusiˈ i Farta kǝ chimǝn paɗ kǝ chimǝn keˈkeˈ.
5 Fee thlǝ nech ha hur tar fata, ǝnɗi yahtǝ fata ndaˈan thlǝ nech parat har tǝ wanɗǝkaɗech ˈyanda. Fee thlǝ nech ha kǝɗ ǝnɗi mbuˈtǝ shemeta, ǝnɗi yahtǝ shemeta ndaˈan thlǝ nech parat har tǝ wanɗǝkaɗech ˈyanda 6 Dǝf wanɗikaɗaɗ kǝ ǝnɗi yahtǝ fata, nggǝl miyan mǝrta. Dǝf wanɗikaɗaɗ kǝ ǝnɗi yahtǝ shemeta, nggǝl miyan kǝ mbǝs shishingnda tǝ kǝɓikaɗi. 7 Ɗǝf wanɗǝkaɗat kǝ ɓǝra ǝnɗi yahtǝ fata atǝkretǝ tǝ Farta ni, Nech para kusiˈ ˈyi Farta wa, paɗ nen mbahǝnwa. 8 Fee thlǝ nech ha hur fata, ngandǝ tam tǝrantǝ wanɗǝkaɗati Farta ha wa, chǝk ngudyeh.
9 Paɗ kun nakanya, nga fǝ chit tar fat nakonwa, yi Shemet nakonwun, ma Shemeti Farta hur wanɗikaɗechˈyowun. Nat thla nawaktǝ shemetǝ Kǝristi yansi, nga yi Kǝristi nakanwa. 10 Ma Kǝristi si wanɗikaɗechˈyowun, kǝmmowunwu ǝn tǝ ɓǝɓifata wa, tǝn Shemet choktǝ kǝ shishingnda kǝmɗiyowun kǝthlǝm mbiswun kaafatǝ Farta. 11 Ma Shemeɗi Farta thlaˈanchǝ Yesu hur mǝmatecha nech wanɗikaɗechˈyowun, mǝthlan tǝɗi thlaˈanci Kristi hur mǝmatecha nan fǝran shishingnda mǝrtǝ fatˈyowun tǝmɗi Shemetˈyan thla nech wanɗikaɗech yowun.
12 Kǝthlǝm daˈan fenchina, niwun tar fata, nen mbisaminchi inawa nat mǝn nat tǝndǝwa. 13 Ma kun chit tar fata, nowun mǝrta, paɗ ma alkǝti Shemet thlǝ ɓǝlandǝwun tar fata, mbǝskowun hǝraˈta 14 Nat thla thlǝ para Shemeti Farta tǝ tanda, tandǝ nech kǝ wanchi Farta. 15 Shemeɗi fǝrowun ndǝ Farta, ɗǝf wa wunchǝ kǝ chok wun kǝ mafechawa, kǝ chok wun paɗ tǝ lekǝtawa. Auwa, Shemeɗan ɗǝftǝ wunchi kǝ chokwun kǝ wanchi Farta, tǝmɗi alkǝti Shemeɗan paɗ thlǝ mbahǝn chamǝn ˈyatawa Farta, “Chinech kǝ Papa.” 16 Shemeɗan tǝ indiyan nat tǝ shemetˈyamǝn, sǝnamǝn chǝndǝs tǝ ndat wa, ngǝmǝn wanchi Farta. 17 Nakan chok mǝn kǝ wanchi Farta, kǝthl sǝnmǝnsǝwa namǝn mbǝs ǝn kǝ har thla naa Farta fǝrandǝ wanchi yan. Nggamǝn tǝ Kǝristi Yesu namǝn mbǝs ǝn kǝ har tǝɗiya. Ma ɓahmǝn ha tǝ anchi namǝn mbǝs shishingnda paɗ tǝ anchi.
Maanda thla nech ɓatˈ kǝ pangga
18 Ə saktinchi, ɓahtǝɗi ha natmǝn fiyan ya, chaˈwa kǝ kaɗanfee tǝ maanɗi nafee pinamǝndawa. 19 Nat nafchǝɗi tǝndǝ Farta tandǝ pǝkta tǝ ɗǝfkǝfatsi kaˈan fartǝɗi natǝn pǝn wanchiyan hayang. 20 Nat ichiɗi chit Farta tandǝ chit njiiɓ, sǝnwandǝ ǝnɗi nafee huranwa. Thleya ngga tǝ yahtiyanda wa, paɗ tǝmɗi yahti Farta mǝthlan tǝɗi chich ichiɗiya paɗ ɗǝf tǝ wanɗikaɗsi kǝ ɗarnanda. 21 Ichiɗi tǝndǝ Farta, nat tǝ idiyan nadǝ hǝraˈata tǝ ɓahta, naandǝ mǝthl kaɗwa. Kǝ mɓǝs ndǝ kwas tǝ yipta thla natǝn fǝrandǝ wanchan.
22 Kǝthlǝm ndaˈan sǝnmǝnwa ichiɗi tǝnɗǝ Farta, paˈ kǝ nakanya tandǝ fǝfǝrta welǝla hur fat ˈyanda, kǝɗ hatǝ ngǝtta. 23 Ngga ichiɗi tǝndǝ Farta ndak thlǝ nech fǝfǝrtawa, paɗ ngamǝn tǝɗi tapech kǝ mbǝsmǝn Shemeta, thla tǝrkwathl kanan, hur ichiɗi natmǝn mbǝsta, ngamǝn fǝfǝrtǝ hur wanɗǝkaɗechˈyamǝn, ngamǝn pǝktǝ kǝ chokamǝn chifee kǝ wanchi Farta, paɗ, kǝ hǝraˈanfee fechˈyamǝn. 24 Tǝmɗi ɗǝf wanɗǝkaɗeˈini mbǝstǝmǝn hǝraˈta. Ɗǝf wanɗǝkaɗat kǝ ɗar ǝnɗi thlǝ natmǝn ngga ɗǝf wanɗǝkaɗat ni wa. Wun thlǝ ɗǝf chi wanɗǝkaɗat kǝ ɓǝra ǝnɗi tapatǝn kǝ mbǝsa? 25 Ma thlǝ ɗǝfchamǝn wanɗǝkaɗat kǝ ɓǝra ǝnɗi mbǝswaktǝmǝn kwaɗǝn, pǝkkamǝn tǝ kǝrǝsa.
26 Tǝ kǝɗu thlǝ kǝsamǝn ndǝ Shemeti Farta tǝsi kǝthlǝm hatatˈyamǝn ha. Sǝnwamǝn ǝnɗi kǝmchǝs nat mǝn shitǝ kǝ ɗaran wa, paɗ Shemeti Farta thlǝ nechan shitǝ tǝ fǝfǝrta thla nawaktǝ wanshenuˈta mbahǝn mbuˈta. 27 Mǝthlan tǝɗi thlǝ tausanchi wanɗikaɗechˈyamǝn, sǝntǝ ǝnɗi naa Shemet kaɗata. Kǝthlǝm Shemeta thlǝ nechan shiyandǝ Farta kǝthlǝm nafchiɗi nech kǝ yaˈan. Thlǝ shichan kǝɗ ǝnɗi kaɗa Farta.
28 Sǝnmǝnwa hur ichi nat, Farta thlǝ nechan chit tanda, kǝ chok ndǝ kaakǝta kǝmɗi fee yahchindi. Kǝmɗi fee ˈyatǝn tanda tǝmɗi kaɗatˈyan. 29 Fee tatǝ Farta tǝrkwathl kanan yu, fen tahsandǝn ha kǝnandǝ kǝɗ Waˈyan, kǝthlǝm Wanan kǝ chok kǝ walla waa hur fenchaˈan terchan. 30 Fee tahsandǝn hayu, tandǝ ˈyatǝn. Fee ˈyatǝn paɗ yu, chan kan tandǝ kǝ fee nawaktǝ ɓǝɓifat ˈyandǝsi ǝ pangngǝnan. Fee nawaktǝ ɓǝɓifat ˈyandǝsi ǝ pangngǝnan, manankan tanda.
Yahti Farta hur Kǝristi
31 Nakanya, mǝ natmǝn mɓaˈta kǝ ɗar ichiɗiya? Ma Farta tǝ mǝnchi, wun chaˈchǝsi kǝ chit atǝkrekǝta tǝ mǝnchi? 32 Farta, mǝthlan tǝɗi ˈyatawakchǝ waˈyan, paɗ firtǝndi kǝthlǝm kǝt ngamǝn nat, nen fǝramǝnchi ichi nat pafǝn wa? 33 Wun nech ndatawa, nat tati Farta chindǝ ɓǝɓifata? Farta ndak thlǝ ndechawa nafcha chokndǝ kǝ fee nawaktǝ ɓǝɓifat ˈyandǝsi ǝ pangngǝ ɗan. 34 Wun chaˈchǝs kǝ chakan tǝ mee tanda? Kǝristi Yesu ndak thla mǝrcha ǝ ɓǝra palangnda, paɗ thlaˈankǝfe hur mǝmatecha. Mǝthlan ɗas harsǝm i Farta, mǝthlan shita kǝthlǝm ngǝmǝn. 35 Wun nech chakamǝndiha tǝ thlǝrɗakti Kǝristi? Na ɓahta, sǝbtǝ wanɗikaɗata, mita, ɓah kapecha, mii mǝrta ndu mǝrta tǝ thluta? 36 Kǝɗ ǝnɗi yarandǝfee ha hur laulawati Farta ndat wa,
“Kǝthlǝm kǝt cha thlǝ ɓǝlaˈandǝ fee thlaˈtǝ walwurta kǝ hǝmǝn Farta,
chamǝnchifee kaɗ kǝɗ chohrechiɗi nafe ɗǝt thleˈnda ɓǝrata.”
37 Chǝk tǝ kǝɗu, hur ichǝˈinni nat nech sǝɓtǝ tǝ mǝnchi yu, mbǝramǝn alkǝtˈyandǝ ha kaˈan tǝmɗi Farta mǝthlan tǝɗi yahchimǝnchi. 38 Kǝthlǝm sǝninchǝsi ndat wa, ǝnsi nech chakamǝndǝ ha tǝ thlǝrɗakti Kǝristi wa. Chika mǝrta, natˈha, fǝ thlǝnchi Farta, kuturcha, ndu ichiɗi nechsi nakanya, ichiɗi nech ɓata, tǝ alkicha. 39 Ichiɗi nech hulafǝrta, ichiɗi nech kan haha, ndu ǝnsi hur ichiɗi nat tǝndi fee, nen mbahǝn chakaˈǝn chiha tǝ yahti Farta thla pǝnamǝndǝn tǝmɗi Yesu Kǝristi chinmǝn wa.