9
Taɗ Farta Israilawecha
1 Thlǝ nechi mɓuˈ kittaˈan hur Kǝristi, nga tǝni lektawa, saktǝ wanɗǝkaɗatinchi tǝmɗi Shemeta, pǝnichǝswa ngga tǝni lektawa. 2 Ngǝt tǝ sǝɓtǝ hwǝrfǝ kaˈan tǝ ɓilla weenmǝta hur wanɗǝkaɗatinchi. 3 Ngǝt ndat wa kǝ ɗǝfichife ǝn kafa, ndu kǝ chaki chife ha tǝ Kǝristi, kǝthlǝm wanmanchina fee nech kǝ kwathl na, 4 ndat wa nafchi Israˈilawacha. Tanɗǝ ɗi chadi Farta tandǝ kaɗ kǝ wanchan, pǝnankan tandi maanɗiˈyan, nɗǝf kan mǝyan tǝ tanda fǝrankan tandǝ kusiˈ i Musa, pǝnankan taɗi nban manandǝ Farta i kit, nɗǝf kan miyan tǝ tanda. 5 Ɓechandi kesh hur kwathl kaakech kaakech nandi ɗiya. Kǝristi paɗ kǝd pong nefa, nechan ǝ kwathl nanɗa. Malaman kǝ manan fee Farta thla thlǝ chich kurakta kǝ ɓǝra chikami, kǝ kwǝkǝchi. kǝ chokkǝɗu.
6 Nga wa tǝni ndata wa nɗikti Farta ǝ wulanchi ndiit ha wa. Kǝthlǝm nga nat nafchiɗi ɓech kesh hur kwathl Israˈilawacha, nech kǝ kaa nafchi Israˈilawecha wa. 7 Nga nat kwahtl Ibrahim nech kǝ wanchi Ibrahim wa. Ndangkǝ Farta Ibrahim wa, ndat wa, “Wanchiɗi naa Ishaku ngǝtta fen naa fee ˈyatawa kwathl wa.” 8 Nga wanchiɗi ngǝttǝ Ibrahim tǝ indiyan nech kǝ wanchi Farta wa, auwa, wanchiɗi ɗǝfandi Farta miyan Ibrahim fen thlǝ ndafe wa kwathl Ibrahim. 9 Kǝɗaya mbuˈtǝ fee kǝ ɗar ɗǝfmiyan. Ndatwa, “Huraɗi nech ɓatyu mǝt kǝɗaya ni nggǝr ɓata, Saratu paɗ nan ngǝt waa.”
10 Ngga thleya ndak wa. Wanchiɗi Rifkatu chapyu, chin nanda arta, thla nech kǝ chinmǝn Ishaku. 11 Tapawa ngǝt fee wanchaˈan wa, ndu kǝ sǝndǝ ǝnɗi nech ndiˈchan ndu sǝɓtaˈan mbuˈankǝ Farta maananda ǝnɗi nech sǝɓta, yah Farta kǝ taɗ har arta hurnanda kǝ chok kǝ ǝnɗi yahtǝn. 12 Ngga kǝthlǝm tarchɗi chit nda wa, paɗ tǝmɗi ˈyatˈyan, ndangkan wa, “Thla manchan nan choktǝ kǝ mafati thla nguɗyeh.” 13 Kǝɗ thla yarandǝfe ha ndat wa, “Yahǝnchi Yakubu, karki Isuwa.”
14 Mǝnatmǝn ndat hacha? Thlǝna wu Farta kaɗ ndiˈchan waˈ wa? auwa, chǝk nguɗyeh. 15 Kǝthlǝm ndanchan Musa wa,
“Nan haɗitǝfa, thla kǝmchis kǝ haɗichǝ fa.
Nafɗi yahti chan kaakǝta, ni chan kaakǝta.”
16 Kǝthlǝm ndaˈan, chokwa kǝ ɓǝra ǝnɗi thlǝ yahtǝ nefa wa ndu kweˈtiyan ha wa, paɗ kǝ ɓǝra haɗaanɗǝ thlǝ haɗandǝmǝn Farta fa. 17 Kǝthlǝm ǝ hur ndikti Farta, yarankǝfe tǝ nadtwa, ndangkǝ Farta Firˈauna ndat wa, “Thla u chi kǝnen kǝ kwitira kǝthlǝm ǝn arta. Yahǝnchi kǝ pǝni alkǝtinchi tǝmɗiyo, paɗ thlǝmna kǝ welha hurheshi nat.” 18 Kǝthlǝm ndaˈan, thlǝ haɗanchan thla kǝmchis kǝ haɗanchifa, paɗ thlǝ chanchan wanɗǝkaɗati thla yahtǝn kaɗ kwaˈkwaˈ.
19 Arta hurwun nech ndǝtawa, “Ma chok kǝɗu, mǝchich thlǝ naa Farta naa ɓǝbǝfati yowun ha nakanya? Wun chaˈchǝsi kǝ yatanchi Farta ǝnɗi natǝn chita”? 20 Paɗ wun nako, chi nefa, natu ass ǝndǝ tǝ Farta? “Ənɗi tǝndǝfe chaˈwasi kǝ ɓahǝn tǝ ndaˈdǝ thla tǝnchiɗi wa ‘Mǝchich tǝndu nenchǝ kǝɗaya?’ ” 21 Thlǝ tahǝs ɓucha tǝ taɓta alkǝtˈyansi kǝ chǝt ter tǝ taɓtaˈan kǝɗ ǝnɗi yahtǝn wa. Thlǝ mbahǝnchan chǝt ter tǝ fowun taɓtaˈan kǝ tǝnti ɓucha kǝthlǝm tarchiɗi kǝmchǝsi fowun kǝthlǝm tarchiɗi kǝmwakchǝsi wa.
22 Ngga kǝɗu yahtǝ Farta wa? Ma yahsǝ kǝ pǝntǝ sǝɓtǝ hwǝrˈyan, paɗ kǝ pǝntǝ alkǝtˈyan hayang. Kǝ kǝrǝs tǝ fee kǝmchǝs kǝ sǝɓanchǝ hwǝr kaɗ kǝ ɗarnanda, chaˈwasi wa? 23 Ma chichan ichiɗiya, kǝthlǝm kǝ inantǝ kutǝraktiyanha hayang kǝmɗi fee thlǝ haɗanchifa, kǝthlǝm fee tahsandǝn kutǝraktǝ tandǝs turkwathl kanan, 24 chika nggǝmǝn, ngamǝn tǝɗi ˈya Farta, ngga hur Yahudawecha ndak wa, paɗ hur fee nawakchi kǝ Yahudawecha. 25 Kǝɗ thla mɓuˈtǝfe hur laulawati Hosiya ndat wa, “Fee choh nawakchǝ kǝ nafchinchǝ, ni ˈya tandawa ‘Nafchinchi.’ Nafchi hahǝɗi choh yahwakti nechi ˈya tandawa ‘Fee yahti.’ ” 26 Paɗ “Mǝɗi ndandǝfe tandawa, ‘Nggun ngga nafchinchiwa’ Minni nafe ˈya tandawa ‘Wanchi Farta thlǝ shishingnda.’ ” 27 Thlǝ shenuˈta tǝ yahti Farta, Ishaya, shenuˈkan tǝ kapa ɓǝrata kǝ ɗar Israˈilawa ndat wa, “Chika nakan wa Israˈilawa chi terchan, kǝɗ chokita mǝ kufa, ngguɗeh hur nandǝ nech hǝraˈta. 28 Kǝthlǝm chinmǝn Farta nan ndǝɗandi chakmeeˈyan ha kǝ ɗar heshi ngga tǝ sǝɓandǝ wanshengnan kaɗwa.” 29 Kǝɗ ǝnɗi mbuˈtǝ thlǝ thlǝndi Farta Ishaya choh ndadwa, “Ma ngga ǝnɗi malamǝn kan fowun hur kwathlan wa, mǝ nechamǝn nat kǝɗ Sodom, kǝ ngǝramǝn chifee ha kǝɗ Gomora.” 30 Mǝ natmǝn ndad hacha? Fee nawakchi kǝ Yahudawecha fee kawakchǝ chok ndǝ kaakǝta pangngǝn Farta wa, mɓǝsnda, tǝmɗi fǝr kit. 31 Paɗ Israˈilawa, chǝɗi kech chok kaakǝta pangngǝn Farta tǝmɗi kusiˈ i Musa mbǝswandawa. 32 Mǝ chich kǝɗu? kawa ndǝ tǝmɗi fǝr kit wa, kechanda tǝmɗi mbǝs ǝn kǝ har. chekandǝ wansarta tǝ ɗakwanɗǝ thlǝ chefe wansarta. 33 Kǝɗ thla yarandǝfe ha hur nɗǝkti Farta, ndat wa, “Nakanya thlohanni ɗakwen ha thla nech ɗǝf nafcha kǝ che wansarta ǝ Sihiyona. Kapa ɗakwana thla nech ɗǝf tanda kǝ hǝmndǝ ha. Nat thla tǝngngǝs chiha kafi ɗakwanan nggǝ fat haranchiwa.”