1 Kǝthlǝm ndaˈan, wanmanchina, kǝthlǝm tertǝ haɗandǝ nafchi Farta fa kǝmɗiyamǝn, nggǝt shiyowunnda, fǝram indiyowun kǝɗ kǝnau pafǝn yi shishingnda, chiɗ chiɗ ina thlǝta kǝmɗi Farta. Thleya nech kǝ fǝr kǝnau pafǝn yi kit natwun chita kǝmɗi Farta. 2 Kǝ nggǝmwunfa natˈyowun ha, kǝ chokwun kǝɗ ǝnɗi naa nati nafchi heshiɗiya wa. Paɗ malan Farta, kǝ mbeɗanchǝ saktǝ wanɗǝ kaɗaɗˈyowunha nat. Tǝ kǝɗu, natwun sǝn ǝnɗi yahtǝ Farta kǝ chiwun. Kǝ sǝnwun ǝnɗi nech ndiˈchan, ǝnɗi nech mbǝnandǝ Farta fa, tǝ ǝnɗi nech keˈkeˈ nat.

3 Kǝthlǝm kaakǝɗ ɗi chi tǝ Farta ya, ngǝt tǝɗandǝ thlǝmati chika wun hur wun, ndat wa, mǝ tǝr chika wun indiyan tǝ maanda kǝɗ thla kǝmwackchǝs kǝ chawa. Paɗ chikawun kǝ tǝrtǝ indiyan keˈke kǝɗ inɗi natǝn. Kǝthl nen chakan mee indiyo keˈke tǝ fǝrkit tǝɗi fǝrutǝ Farta. 4 Tanngathla fat ˈyamǝnsi terchan fǝ fat arta, paɗ nat tanngathlechaˈan tarchiyanda samǝn samǝn. 5 Kǝɗu paɗ natǝn tǝ mǝnchi, chika mǝ nakamǝn terchan, chok mǝn kǝ fat arta hur Kǝristi, nechamǝn terchan wumamǝnchi fee ha kafi fat arta, chikayen tangathlata tangathlati sheɗan nakan. 6 Nakan fǝramǝn kǝ Farta mbǝr ǝn samǝn samǝn tǝmɗi kaakǝɗɗi chamǝn ndǝ Farta, paɗ kǝmsi kǝ chimǝn tersi tǝ tanda. Ma fǝramǝnchan mbaˈ ǝnɗi nech sǝbtǝ kǝ pannga, kǝmsi kǝ chimǝn tersi taˈanchi tǝmɗi fǝr kit tǝɗi nessiyamǝn. 7 Ma mbǝr ǝnɗi fǝramǝndǝn yi manaandǝ nafcha, manankamǝn nafcha. Ma yi chaˈanan kaɗ fǝramǝndǝn, chaˈankamǝn kaɗi. 8 Ma fǝramǝnchan mbǝrˈinɗiya yi ndǝksandǝ raˈan, malan kǝ chokmǝn kǝ fǝ ndǝksandǝ raˈan. Ma fǝranmǝnchan mbǝr ǝnɗiya yi kǝsandǝ raˈansi, chikamǝn kǝɗu tǝ her chaˈ. Ma thlǝ pangndǝ nako, ɗǝko kǝ pang tǝ pangndiyo tǝ hwir arta. Ma yi haɗandǝ raˈanfa chikamǝn kǝɗu tǝ mbǝnfata arta.

9 Kǝmchansi yahraˈan ˈyowun kǝ chok tǝ kit fa. Kǝ karwun nat ǝnɗi nech kǝ ɓǝɓiˈan, paɗ kǝ kǝswun ǝnɗi har nech ndiˈchan kaˈan. 10 Tǝmɗi yahraˈan paɗ, yahamraˈan kaˈan. Tǝmɗi fǝr maandǝ paɗ, chikawun kǝ manantǝ sheɗan kǝ pǝɗantǝ thla ha thlǝ chǝt sheɗan. 11 Mǝ hatowun ha, tǝ kweˈtǝha, tǝ chǝtˈtera wa. Manamandǝn Farta nat tǝ wanɗǝkaɗech ˈyowun. 12 Malaman ɗǝf wanɗǝkaɗech ˈyowun kǝ ɗǝftǝwunchi kǝ chokwun tǝ mbǝn fata. Kǝ kǝriswun hur ɓahti ˈyowun. Kǝnowun shiyandǝ Farta nweenmǝta. 13 Chakam ǝnɗi nessiyowun tǝ fǝ para mbanchi Farta fee nech kata, kǝthl nowun thlǝt ramcha tǝharchi chap-chap.

14 Shiyaman Farta kǝ ndǝfantǝ mbǝs ǝnkǝhar fee thlǝ ɓahowuncha. Kǝ ɗǝfantǝ tandǝ mbǝsˈǝnkǝhar, kǝ hwombanchi tandawa. 15 Mbǝnam fata tǝ fǝ nech mbǝnfata. Paɗ tama, tǝ fee nech tǝta. 16 Chokam hashas tǝ raˈan kǝ pǝnwun thlaˈtǝ indawa, paɗ chokam shikekǝt tǝ fee ɗǝpaandǝ fee wa ngga ǝn nakanda wa. Kǝ pǝnwun indiyowun wa, pǝɗawun nafchiha tǝ ɗathla wa.

17 Mǝ tiwun mbǝɓifat kaɗ tǝ mbǝɓifatawa, mbǝramsi kǝthlǝm kǝ thlǝ naawun ǝnɗi naa nafchi natha, nat ndichan. 18 Ma nan chita kǝmɗiyowun, kweˈyamha kǝ chokwun hashas tǝ chikawuni. 19 Wanmanchina, kǝ tiwun mɓǝɓifat kaɗwa, malamandǝn Farta kǝ tiyamǝchis kaɗi tǝ sǝbtǝ hwǝrˈyan. Kǝthlǝm nechan kǝ yaraɗan hur ndikti Farta, ndat wa, “Titǝkaɗi yina, ngǝt paɗ nii tiyowundǝs kaɗi nda chinda.” 20 Yaran kǝfeha paɗ hur ndikti Farta ndat wa, “Ma mitǝfi atǝkretǝwa, fǝranko ndǝsǝmnda kǝ sǝma. Ma kuchǝmndǝ fiyan, fǝranko ˈyema kǝ sa, ma ngun chǝt kǝɗu nowun ndǝf tandǝ kǝ haran fat tanda hur wanɗikaɗat ˈyanda.” 21 Kǝ malawun ɓǝɓifata, kǝ ngwanowunchiwa. Kǝrsǝ ndaˈan, ngwanaman ɓǝɓifata, tǝmɗi chǝt tarchiɗi nech ndiˈchan.