1 Nwaat chikawun nefa kǝ fǝrtǝ manda kǝ pangngǝnchi haha. Kǝthlǝm alkǝt pangndǝswa, ma nga mǝɗi Farta wa. Paɗ nat fǝ alkǝt pangngǝn chiɗi nessiyamǝn Farta ɗǝfchi tandǝsi. 2 Kǝthlǝm ndaˈan nat thla karchǝ fǝr maandǝ kǝ pangngǝnchi haha, kartǝ fǝr maandǝ kǝ ndar nafchǝɗi ɗǝftǝ Farta ha, nat thla thlǝ chich kǝɗu nan kab chak mee kafa. 3 Kǝthlǝm pangngǝnchi haha nga ina lekandata wa, maa thlǝ chicho ǝnɗi kǝmchisi, ma nga fee thlǝ chich ɓǝɓifata wa. Yehǝnsi kǝ chekǝnha tǝ lekandǝ nafɗi naa alkǝt pang ndiyan suwa? Chiko ǝnɗi nech ndiˈchan, mǝthlan paɗ nan chǝmwechi. 4 Kǝthlǝm pangngǝn chaˈan fǝ tarchi Farta nakanda, kǝthlǝm kǝ kǝsowun chindǝsi. Paɗ ma thlǝ chicho mɓǝɓifata, leka ndǝn tanda, kǝthlǝm alkǝtˈyandǝsi kǝ chuchindǝ kita yi kit. Tandǝ fǝ tarchi Farta, kǝthlǝm kǝ chandǝ kita fee thlǝ thlǝnanchǝ mɓǝɓifat kaɗi. 5 Kǝthlǝm ndaˈan nwaat kǝ fǝrwun maanda kǝmɗi pangngǝncha. Ngga kǝthlǝm kǝ rakawun sǝɓtǝ hwiri Farta harwa, paɗ kǝthlǝm ǝnɗi mbuˈtǝ wanɗǝ kaɗat ˈyowun kǝ chǝwun.

6 Ndaˈan chicha thlǝ titǝwun chamnda, kǝthlǝm pangngǝncha fǝ tarchi Farta, fee malanchǝ tarchanda kǝ ɗar tar pangnda. 7 Tiyaman chikawun ǝnɗi natǝn parawunchi. Ma chamnda kǝmchǝsi kǝ tiwun, tikowun, ndu yi ichiyowun, tikowun. Lekaman thla kǝmchǝsi kǝ lekan fee, manaman thla kǝmchǝsi kǝ manan fee paɗ.

8 Mǝ par yowun wunchǝ kuma ǝna wa, maangga yi yahraˈan ndakwa. Kǝthlǝm thla thlǝ yahchǝ sheɗan, ndiɗan tǝ kusiˈ i Musa ha paɗ. 9 Kusiˈ chǝɗi ndechwa, “Mǝ chin fǝlaukǝtawa, ɓilin fatawa, yerkǝn wa, yehǝn ǝni nefawa, nat tǝ kwaan kusiˈ chaˈan mbǝsndǝ ndiiɗ tǝ ha, tǝmɗi kusiˈ tǝɗi ndechawa, yaham chika wun nefa kǝɗ ǝnɗi thlǝ yahtu indiˈyo.” 10 Ma thlǝ yahcho yowuna, no tam chantǝ mɓǝɓifata wa. Kǝthlǝm ndaˈan yah raˈan ndaˈan nech kǝ ndiiɗ tǝ kusiˈ taˈan.

11 Nwaat kǝ chǝwun kǝɗu, nakan sǝnwun weˈtǝ yuwa heshiɗi natmǝn huran, saˈ fartǝɗi natwun nahǝndǝ ǝ ˈyena. Kǝthlǝm fartǝɗi naafe hǝraˈamǝnda, ǝ ɓi nduk ha nakanya, pǝɗantǝ fartǝɗi tǝrtǝmǝnha. 12 Mǝt nduk weendǝ kaɗi, wat fartǝ ɓat kesh. Kǝthlǝm ndaˈan welaman tarchi wuthlǝ kaɗi, pam kapa yaˈancha yi ɗaˈkǝta. 13 Wi ˈyam kǝɗ ǝnɗi kǝmchǝsi tǝ fee thlǝ chokchǝ hur ɗaˈkǝta. Ngga tǝ nggaathla, tǝ saaɓǝɓiˈicha wa, ndu tǝ fǝlaukǝta wa. Ngga tǝ ka chok sǝk mbǝndǝfa yi kumi hartǝfata wa, tǝ mbata, tǝ sǝraˈta wa. 14 Kǝthlǝm ndaˈan tǝram ɗǝchiti chinmǝn Yesu Kǝristi. Kǝ fǝrawun fech ˈyowun mbanda kǝ chǝt ǝnɗi yahtǝn wa.