Η Καινή Διαθήκη ΙΩΑΝΝΟΥ Α 1

ΙΩΑΝΝΟΥ Α΄

1 Ὃ ἦν ἀπ᾽ ἀρχῆς, ὃ ἀκηκόαμεν, ὃ ἑωράκαμεν τοῖς ὀφθαλμοῖς ἡμῶν, ὃ ἐθεασάμεθα, καὶ αἱ χεῖρες ἡμῶν ἐψηλάφησαν περὶ τοῦ λόγου τῆς ζωῆς— 2 καὶ ἡ ζωὴ ἐφανερώθη, καὶ ἑωράκαμεν, καὶ μαρτυροῦμεν, καὶ ἀπαγγέλλομεν ὑμῖν τὴν ζωὴν τὴν αἰώνιον, ἥτις ἦν πρὸς τὸν πατέρα, καὶ ἐφανερώθη ἡμῖν— 3 ὅ ἑωράκαμεν καὶ ἀκηκόαμεν, ἀπαγγέλλομεν *⸆ ὑμῖν, ἵνα καὶ ὑμεῖς κοινωνίαν ἔχητε μεθ᾽ ἡμῶν· καὶ ἡ κοινωνία δὲ ἡ ἡμετέρα μετὰ τοῦ πατρὸς καὶ μετὰ τοῦ υἱοῦ αὐτοῦ Ἰησοῦ χριστοῦ· 4 καὶ ταῦτα γράφομεν *⸂ὑμῖν,⸃ ἵνα ἡ χαρὰ ἡμῶν ᾖ πεπληρωμένη.

5 Καὶ *⸂ἔστιν αὕτη ἡ ἀγγελία⸃ ἣν ἀκηκόαμεν ἀπ᾽ αὐτοῦ καὶ ἀναγγέλλομεν ὑμῖν, ὅτι ὁ θεὸς φῶς ἐστίν, καὶ σκοτία *⸉ἐν αὐτῷ οὐκ ἔστιν⸊ οὐδεμία. 6 Ἐὰν εἴπωμεν ὅτι κοινωνίαν ἔχομεν μετ᾽ αὐτοῦ, καὶ ἐν τῷ σκότει *⸂περιπατῶμεν,⸃ ψευδόμεθα, καὶ οὐ ποιοῦμεν τὴν ἀλήθειαν· 7 ἐὰν *⸋δὲ⸌ ἐν τῷ φωτὶ περιπατῶμεν, ὡς αὐτός ἐστιν ἐν τῷ φωτί, κοινωνίαν ἔχομεν μετ᾽ ἀλλήλων, καὶ τὸ αἷμα *⸂Ἰησοῦ χριστοῦ⸃ τοῦ υἱοῦ αὐτοῦ καθαρίζει ἡμᾶς ἀπὸ πάσης ἁμαρτίας. 8 Ἐὰν εἴπωμεν ὅτι ἁμαρτίαν οὐκ ἔχομεν, ἑαυτοὺς πλανῶμεν, καὶ ἡ ἀλήθεια *⸉οὐκ ἔστιν ἐν ἡμῖν.⸊ 9 Ἐὰν ὁμολογῶμεν τὰς ἁμαρτίας ἡμῶν, πιστός ἐστιν καὶ δίκαιος ἵνα ἀφῇ ἡμῖν τὰς ἁμαρτίας, καὶ καθαρίσῃ ἡμᾶς ἀπὸ πάσης ἀδικίας. 10 Ἐὰν εἴπωμεν ὅτι οὐχ ἡμαρτήκαμεν, ψεύστην ποιοῦμεν αὐτόν, καὶ ὁ λόγος αὐτοῦ οὐκ ἔστιν ἐν ἡμῖν.

*1:3 ⸆ – RP f 35 TR ¦ καὶ TNT2 WH NA NIV SBL

*1:4 ⸂ ὑμῖν RP f 35 TR ¦ ἡμεῖς TNT2 WH NA NIV SBL

*1:5 ⸂ ἔστιν αὕτη ἡ ἀγγελία RP f 35 TNT2 WH NA NIV SBL ¦ αὕτη ἔστιν ἡ ἐπαγγελία TR

*1:5 ⸉ ἐν αὐτῷ οὐκ ἔστιν RP f 35 TR NA NIV SBL ¦ οὐκ ἔστιν ἐν αὐτῷ TNT2 WH

*1:6 ⸂ περιπατῶμεν RP TR TNT2 WH NA NIV SBL ¦ περιπατοῦμεν f 35

*1:7 ⸋ δὲ RP f 35 TR TNT2 WH NA25+27 NIV SBL ¦ – NA28

*1:7 ⸂ Ἰησοῦ χριστοῦ RP f 35 TR ¦ Ἰησοῦ TNT2 WH NA NIV SBL

*1:8 ⸉ οὐκ ἔστιν ἐν ἡμῖν RP f 35 TR WH NA NIV SBL ¦ ἐν ἡμῖν οὐκ ἔστιν TNT2

Public Domain