“Eo, igami na tinoni e kurikuri lê na maurimami i lao eni.

Me tuturiga kalina e vasugami na tinamami, me gadovigami pipi na vatana na rota.

2 Ami vaga moa na tsitsi e tavuresi tana matsaraka, me tavongani matsele lê tana ngulavi,

mami nangaligi tsaku vaga moa na auau lê.

3 ?Megua igoe God, ti o vilekea moa nina sasaga kesa e totu sekona lê vaga ia,

mo ko raqâ moa tana pede?

4 Me tagara goto sa omea male tangomana ke talumai i konina sa omea e tau male vaga na tinoni.

5 Igoe nogo o titivania na okana na maurina,

ma na dangana na vula sauba aia ke mauri tsaulina,

me tau goto tangomana kesa ke olia na omea igoe o titinogoa.

6 Me dou ti ko moroligi tania, me ke mango tetelo tana susuina na maurina,

vaga moa na maneaqo e gini mage na mango kalina e sui nina aqo tana ngulavi.

7 “Ma na gai ara kavitsunâ e dona ke kutsu vaolu na vasuna tana tuturina me ke mauritugua.

8 Me atsa moa ti kara tuturiga nogo na tola na lamuna,

ma na tuturina ke mate nogo i laona na kao,

9 me ti vaga na kô i tana, maia sauba ke kutsutugua vaga moa ti na gai dato vaolu.

10 Mi kalina e mate na tinoni mi tana nogoria e sui vania.

?Maia e mate, me laka iava ia kalina?

11 “Vaga moa na kô ara tau nogo vuvura mai,

migira na reku ara mamatsa buto lê,

12 me vaga goto na tinoni ara mate nogo, e utu goto kara mauritugua.

Me poi tsau ke sui na barangengo, me utu goto kara mamata,

se kara galisigira tania niqira maturu.

13 “Ke dou sosongo bâ vaniau inau ti vaga igoe ko molopoiau tana barangengo na mate;

mo ko tami moa vaniau kau ba totu raviravi tana poi tsau kalina ke luba na koremu,

mo ko titia na tagu i tana ko padavisuau tugua.

14 ?Me ti vaga ke mate na tinoni, me laka tangomana aia ke maurivisutugua?

Minau sauba nomoa kau berengiti ma kau pipitu moa, poi ke sui niqu tagu na rota.

15 Mi tana tagu nogo ia, ti sauba igoe ko soaau inau, minau kau gokovisu vanigo,

mo ko gini mage na reiaqu inau nimu omea vovola.

16 Mi tana ti igoe ko matanigira rago pipi sui niqu tsakutua,

mo ko tau nogo padavisugira niqu sasi.

17 Sauba ko padalegira vaniau, mo ko tsavupoigira i laona na todo.

18 “Au morosigira na omea sui ara totu i laona na barangengo,

mau reia laka igira sui lakalaka ara dona kara sui lê.

Igira na vungavunga ara dona kara tatsora lê,

ma na maragova kara ratsuligi tania na sasaqira.

19 Ma na susuligana na kô ke tuatsuna tana vatu loki, me kiki rago kara nanga lê,

ma na usa loki ke salaligia na kao popono.

Mo vaga nogoria igoe God, kalina igira na tinoni ara padâ laka ara totu dou nogo,

migoe o tû mo veoligi vanigira niqira amesi vania na mauriqira.

20 Igoe o susuliga liusia na tinoni, mo raia ke vanoligi saikesa;

mi kalina aia e mate, me rerei seko na ngorana.

21 Mi muri ti vaga igira na tinoni kara tsonikaegira na dalena, maia e utu goto ke donaginia,

me ti vaga kara paluvangamaqira na dalena, me utu goto kesa ke ba tsarivulagi vania.

22 Aia e pada saikesalia moa na sosongo e vatsangia tana kokorana,

ma na melu loki e ngolia na tobana.”