2 “!A Job, inau au pada laka igoe nogo kesa o sasaga loki!

?Megua ti o tsonigira na goko kobakoba lê vaga gira ara tau tamani sa rongona?

3 Tagara sa tinoni sasaga loki ke dona na tsoniana na goko vaga igoe o gini goko,

se ke gini isutuguna segeni na tsaqina goko tagara rongona lê vaga gira.

4 Me ti vaga na tinoni kara rongomia nimu tsaqina goko bubulega vaga gira,

me sauba igira kara tau goto kukuni tania God;

me tagara goto ke kesa ke ngaoa na lotu vaniana.

5 Nimu sasaga tabaru nogo igoe e labavulagia tana nimu goko bubulega o tsonia;

migoe o tovoa moa laka ko poia na sasagamu tana nimu tsaqina goko sasaga.

6 Me tau nogo kilia inau kau kedego;

igira nogo pipi sui nimu tsaqina goko segeni ara kede segenigo.

7 “?Megua, o pada ngatsua laka igoe nogoria na kesanina tinoni e botsa i barangengo?

?Mo totu nogo igoe ti God e aqosigira na vungavunga?

8 ?Me laka igoe o sanga na rongomiana kalina God e vorogokona na omea aia e vangaraua na aqosiana?

?Me laka igoe segeni moa o sasaga loki?

9 Me tagara goto sa omea ko donaginia igoe kami tu tau donaginigotoa tugami.

10 Mi tugami ami tu sasanigotoa na sasaga loki i koniqira na tinoni sasaga e senge nogo na ivuqira,

igira na tinoni ara botsa ida bâ vania na tamamu igoe.

11 “God e ngaoa ke bisilia nimu rota. ?Megua ti o sove tania moa?

I tugami ami tu goko ragorago vanigo tana asana God.

12 ?Megua te e gini seko tobamu mo gini vusulitugami tana kore vaga ia?

13 ?Megua ti o kore vania God mo tatamanga gana?

14 “?Me laka tangomana sa tinoni ke totu male saviliu tana maurina,

me ke totugoto saikesa i matana God?

15 Maia God me tau goto dona ke norugira nina angelo;

rongona igira na angelo mara tau goto totu male saviliu i matana aia.

16 Ma na tinoni aia e inuvia na nauseko ngiti gana kô,

me seko pitsu bâ nina sasaga, me tabaru sui pipi nina omeomea.

17 “Migoe a Job ko rorongo vata dou kalina ia, minau kau tsarivulagia na omea au donaginia.

18 Igira nogo na tinoni sasaga loki ara sasaniginiau na manana

vaga nogo igira ara sasania i koniqira na tamaqira,

mara tau goto molopoia sa omea.

19 Igira ara totu segeniqira i laona niqira kao,

me tagara goto sa tinoni ni veratavosi ke totu i laoqira, me ke raqaligigira tania God.

20 “Ma na tinoni vanga tsutsukibo aia e dona na bingi sekoliaqira na tinoni tavosi,

sauba ke totu moa tana rota tana maurina popono.

21 Na leleona na omea mamataguniga ke tatangi loki tana kulina,

migira na tinoni labupoi kara baginia kalina aia e padâ laka e totu raviravi dou.

22 Me ke tagara goto sa omea ke sangâ na tsogo taniana na rodo,

maia e pada sailaginia moa laka e kesa na isi e totu pitua sa nauna me ngaoa na labumatesiana,

23 me laka igira na manusata ara tao pitua aia gana kara gania na konina.

Maia e donaginigotoa laka na rodo e totu pitunogoa;

24 me gini ponopala sosongo tobana, me vatsangisavi, me gini matagu loki bâ,

vaga moa kalina e dona laka kesa na taovia tsapakae susuliga e vangaraunogoa na vailabugi koluana.

25 “Aia nogoria ke vaga gana kede ke totu pitua na tinoni

aia e langa limana na labuginiana God,

me pea sekolia Aia e Susuliga Sosongo.

26-27 Ma na tinoni vaga ia e kaekae manana me tsatsarae sosongo;

me adikaea gana tako, me ulo bâ laka ke vailabugi kolua God.

28 “Migira na verabau aia e tangoligira,

ma na vale ara tsogo tania na tamanina maia e laugira,

sauba kara toroutsa sui lakalaka tana vailabu.

29 Maia sauba e utu ke tamanigira oka nina omea tatamani;

me tagara goto sa omea aia e tamanigira kara totu saviliu.

Me atsa goto na nununa, maia goto sauba ke nanga lê,

30 me sauba ke utu goto vania ke taopoi tania na rodo.

Aia sauba ke vaga moa na gai e ganisuia na lake na arana,

ma na guguri e puasala bamaia na latsena.

31 Me ti vaga aia ke bubulega sosongo me ke norugira moa na omea kobakoba lê kara sangâ tana maurina,

me sauba na omea kobakoba lê nogo ke ngiti gana peluna.

32 Me ke tau vati tsau mai moa gana tagu na mate, maia sauba ke matsele lê nogo,

vaga moa na arana gai matemate e matsele lê na rauna, me utu goto ke marao douvisutugua.

33 Maia sauba ke vaga moa na itai na uaeni ara dudu lê na vuana boruboru;

me ke vaga goto na gai na olive ara dudu lê na latsena.

34 “Migira ara tau tutunina God sauba kara tau goto tamanina sa kukuaqira,

ma na lake sauba ke ganisuia na valeqira igira ara lavu na voli dodo tinoni

rongona kara gini sangagira tana nauana na omea seko.

35 Ma na tinoni vaga gira ara dona sosongo na vorogokona manoga na tangopeke ma na nauana na omea e seko;

ma na perobulesi tinoni moa e dangali poponoa na tobaqira.”