19
Uwazar Izo waze'eg
19
Peze'eg zemueteahy ihewe, i'i wanupe a'e
Izo uze'eg putar a'e nehe kury.
 
Màràn 'ar pemumaw putar peze'egahy pà ihewe nehe,
Hekutuk pà peze'eg pupe nehe.
Peze'eg zemueteahy tetea'u herehe.
Aipo napemaranugar kwaw nezewe hererekoahy awer wi.
Aze mo ikatu 'ym ma'e iapo har romo aiko,
Nezewe rehe we mo ikatu herehe pezepyk wi wi haw.
— Zanekatu wera'u Izo wi zane, peze peiko pezeupe.
— Iaiw haw izupe uzeapo ma'e kwer wexak kar ikatu 'ymaw purupe, peze peiko.
Tupàn uzepyk e herehe
Nan kwaw nezewe. Tupàn uzepyk e herehe. Nazapo kwaw ikatu 'ym ma'e.
A'e uzapo miar ipyhykaw zàwenugar hepyhyk pà a'e.
Amume'u ipuruzuka haw ihe. Ni amo naherenu kwaw wà.
Aenoz hepytywà haw purupe. Ni amo naherereko katu kwaw wà.
Tupàn uwàpytym herape ràm pàrirogaw pupe a'e.
A'e rupi napuner kwaw a'e pe rupi heho haw rehe.
Upyk herape ipytunaw pupe.
Tupàn o'ok heremetarer ihewi paw rupi.
Teko tetea'u umume'u hekatu haw kwehe mehe wà. Tupàn umumaw hekatu haw imume'u haw.
10 Umàmàn heywyr heàmàtyry'ym pà. Te hemumaw.
O'ok hema'eràrogatu haw ka'akyr ài. Te hapo o'ok.
11 Ihewe ikwahy haw ukaz tata ài.
Herereko wàmàtyry'ymar ài a'e.
12 Hekutuk iaiw haw pupe.
Iaiw haw nuzawy kwaw zauxiapekwer wà. Uhàwykàz ywykwar uzeàmimaw romo wà.
Uzapo uker haw heràpuz izywyr wà.
Hemyrypar wà, heànàm wà no, upaw rupi utyryk ihewi wà
13 Tupàn hereityk kar herywyr wanupe a'e.
Hekwaw par herereko wemigwaw 'ym ài wà.
14 Heànàm utyryk ihewi wà.
Hemyrypar na'ima'enukwaw kwaw herehe wà kury.
15 Heràpuz me upyta ma'e imaranugar ihewi wà. Nuzawy kwaw hekwaw 'ymar wà.
Ihewe uma'ereko ma'e herereko amo ae ywy rehe har ài wà.
16 Aenoz uma'ereko ma'e imuwà. Nuzekaiw kwaw herehe.
Aze aze'egatu izupe, nezewe rehe we nuzapo kwaw heremimutar.
17 Hezuru ipihe haw iro heremireko pe.
Herywyr ihuhuk wer herehe ume'e mehe wà.
18 Te kwarera'i hereityk wà.
Hepu'àm mehe na'arewahy uze'eg urywahyahy herehe wà.
19 Te hemyryparete wanupe hero kury.
Teko heremiamutar wera'u hereityk wà.
20 Xo hepir hekagwer rehe we upyta we ihewe.
Hereko wiwi haw zawaiw katu ihewe.
21 Hemyrypar wà, hepuhareko pe nehe.
Ta'e Tupàn ipo a'e xe, hekutuk arer romo hekon a'e xe.
22 Màràzàwe tuwe pepurapo wer ikatu 'ym ma'e rehe ihewe Tupàn ài.
Màràzàwe tuwe napepytu'u kwaw ma'erahy ihewe ipuraraw kar ire.
Hemonokatu har wikuwe a'e
23 Aze mo amo umuapyk heze'eg pape rehe, ikatu mo ihewe.
Ikatu mo heze'eg pape rehe imuapyk pyrer ihewe.
24 Aze mo umuapyk itaxu rehe ikaikair haw itatàtà iapo pyrer pupe, ikatu mo ihewe.
Aze mo umuapyk ita rehe, ikatu mo ihewe.
25 Ta'e akwaw hekatu haw imume'u àràm hekuwe haw ihe xe.
Iahykaw rehe ur putar xe ywy rehe hekatu haw imume'u pà a'e nehe.
26 Hema'eahy haw uxi'uxi'u putar hepir paw rupi a'e nehe.
Nezewe rehe we aexak putar Tupàn ko heretekwer pupe hereko mehe ihe nehe.
27 Aexak putar hereha pupe nehe.
Hereha wexak putar nehe.
Nuiko kwaw heremigwaw 'ym romo ihewe nehe. Akwaw putar nehe.
Aputar tuwe a'e ma'e izeapo àwàm ihe.
28 — Nuruzapo kwaw ma'e newe ma'erahy ipuraraw kar pà, peze peiko.
— Ko iaiw haw herur arer wiko nepupe a'e, peze peiko.
29 Pekyze takihepuku wi nehe.
Tupàn uzepyk ikatu 'ym ma'e iapo arer wanehe a'e takihepuku pupe a'e.
Pekwaw ko ma'e nehe. Heta zaneremiapo kwer imume'u har. Heta zaneremiapo kwer hekuzaromo zanerehe uzepyk ma'e ràm.