20
Zopar uze'eg mokoz haw rupi
20
Zopar Nama pe har uze'eg putar a'e nehe kury.
 
Izo, hemuzemumikahy kar pe ne.
A'e rupi awazar putar neze'eg newe na'arewahy nehe kury.
Urewe neze'egahy awer na'ikatu kwaw.
Nezewe rehe we akwaw iwazar haw imume'u haw.
Iaiw ma'e iapo har hurywete haw ipixika'i a'e
Erekwaw katu ko ma'e. Kwehe mehe arer we,
Teko ywy rehe waneko mehe arer we,
Nezewe wanekon wà.
Ikatu 'ym ma'e numumaw kwaw kwarahy tetea'u hurywete pà.
Aze ma'e ikatu izupe, upaw na'arewahy izuwi.
Aze iaiha katu ywak ài,
Aze iàkàg uzekok ywàkun rehe,
Nezewe rehe we upaw putar tuwe tanimuk ài nehe. Nukweraw kwaw nehe.
Ikwaw parer nukwaw kwaw izupe uzeapo ma'e kwer wà.
Ukàzym putar puahu haw ài nehe.
Nuzawy kwaw puahu haw zàwenugar pyhaw har.
Ni amo nuexak wi kwaw wà nehe.
Ipyr wiko ma'e kwer
Nuexak wi pixik kwaw wà nehe.
10 Imunar teko hemetarer 'ym ma'e wanemetarer rehe wikuwe mehe.
Ta'yr umuzewyr putar wanemetarer wanupe wà nehe.
11 Hetekwer ipyahu ma'e ikàg ma'e uzeapo putar ywyku'i romo nehe.
Katu 'ymaw uzeapo puruzuka haw iaiw ma'e romo
12 Ikatu 'ymaw hete katu ikatu 'ym ma'e pe.
Umim uwapeku iwy pe.
13 Omonokatu uzuru pupe.
Nezewe mehe umumaw a'e 'ar hete katu haw ikwaw pà.
14 Na'e uwezyw ipy'a pe kury.
A'e pe uzeapo puruzuka haw iro ma'e romo.
15 Awa ikatu 'ym ma'e uhuhuk, temetarer amo wanuwi wemipyhyk kwer imur pà wie wi. Ta'e imunar hehe xe.
Tupàn wenuhem hie wi.
16 U'u puruzuka haw mozaiw izuru pe har.
A'e puruzuka haw uzuka i'u arer.
17 Tapi'ak kamykwer uwyryk yrykaw ài. Hàir uwyryk nezewegatete no. Ikatu i'u mehe.
Ikatu 'ym ma'e nu'u kwaw nehe.
18 Weityk putar ma'e uma'ereko haw pupe wemimono'og kwer nehe.
Hemetarer numurywete kar kwaw nehe.
19 Ta'e imunar hemetarer 'ym ma'e wanehe a'e xe. Heharaz wanuwi.
Imunar amo wanehe wanàpuz pupe wixe pà no.
Nuzapo kwaw wàpuz uzeupe.
20 Ma'e hemimono'og kwer ipo pe har numurywete kar pixik kwaw uzar.
Tuweharupi uputar amo. Na'e uputar amo no.
21 Tuweharupi hemetarer wera'u oho iko, aze upuner.
Nezewe rehe we hemetarer upaw putar izuwi nehe.
22 Hemetarer katuahy ma'e romo heko mehe hemetarer 'ym ma'e romo heko haw ur putar izupe iàmàtyry'ym pà nehe.
Iaiw paw ipuhuz haw u'ar putar hehe paw rupi nehe.
Tupàn izepykaw u'ar putar ikatu 'ym ma'e wanehe
23 Tuwe umynehem upy'a nehe.
Ta'e Tupàn umu'ar kar putar wekwahy haw hehe nehe xe.
Tupàn umugyr kar putar wekwahy haw hehe àmàn ài nehe.
24 Aze uzepyro takihepuku wi nehe,
U'yw itazu morog wakwa katu ma'e ukutuk putar nehe. Waxaw putar nehe.
25 Ozo'ok putar u'yw ikupe wi wà nehe.
Huwykwer heny putar u'yw rehe nehe.
Ma'e wi ikyze haw wiko putar izar romo nehe.
26 Amo ukauka putar hemimono'og kwer paw rupi wà nehe.
Tata teko wanemimunyk kwer 'ym umumaw putar a'e awa nehe.
Umumaw putar iànàm paw rupi wà nehe no.
27 Ywak wexak kar putar ikatu 'ym ma'e wanemiapo kwer purupe nehe.
Ywy upu'àm putar wanemiapo kwer ikatu 'ym ma'e imume'u pà nehe no.
28 Tupàn uzakook putar wekwahy haw wanehe nehe.
A'e 'ar mehe umumaw putar wanemetarer paw rupi nehe no.
29 Nezewe haw Tupàn uzapo iaiw ma'e wanupe.
Omonokatu agwer ma'e imono pà ikatu 'ym ma'e wanemiapo kwer hekuzaromo.