1 Amume'uahy amo ma'e kwehe mehe ihe.

— Name'e pixik kwaw kuzà awa puhe oho pixik 'ym ma'e rehe iputar pà ihe nehe, a'e Tupàn henataromo.

2 Aze mo azuhaw heremimume'u kwer,

Ma'e Tupàn umur ihewe hekuzaromo.

Aipo Tupàn upuner wera'u ma'e umur mo uze'egatu ihewe ywak wi a'e.

3 Tupàn umur kar zemumikahy haw purehe a'e.

Umur kar iaiw haw a'e, ikatu 'ym ma'e zutyka'i iapo har wanupe a'e. 4 Tupàn ukwaw heremiapo kwer upaw rupi a'e.

Wexak heata haw pitàitàigatu no.

5 Amume'u ko ma'e Tupàn henataromo kury. Nazapo kwaw ikatu 'ym ma'e ihe.

Nazeagaw pixik kwaw amogwer wanupe heremu'em pà.

6 Tuwe Tupàn wexak katu hekatu haw nehe.

Wexak putar hekatu haw nehe. — Nuzapo kwaw ikatu 'ym ma'e a'e, i'i putar ihewe nehe.

7 Napiza e kwaw pe ikatu ma'e wi.

Aze aputar amo ma'e, aze a'e re a'e ma'e iapo awer uzapo kar ikatu 'ym ma'e hepy'a pe,

Aze azapo ikatu 'ym ma'e, aze apyhyk wyzài teko wama'e hezeupe,

8 A'e mehe, tuwe amo teko u'u heremitygwer wà nehe.

Tuwe amo umumaw hema'etymaw wà nehe.

9 Aze heruwake har hemireko hereraha uker haw pe,

Aze azeàmim hàpuz huwake hukenaw rehe heme'e pà,

10 A'e mehe, tuwe heremireko wiko amo pe uma'ereko e ma'e romo nehe.

Tuwe amo awa uker ipuhe wà nehe. Nazapo kwaw agwer ma'e ihe.

11 Aze mo azapo a'e ikatu 'ym ma'e iaiw ma'e,

Tàmuzgwer umume'u mo herehe uzepyk àwàm wà.

12 A'e ikatu 'ym ma'e iapo awer nuzawy iwer mo tata iaiw ma'e. Nuzawy iwer mo tata uhua'u ma'e. A'e tata umumaw mo hema'e paw rupi.

13 Kwehe mehe amo 'ar mehe amo heremiapo kwer na'ikatu kwaw amo ihewe uma'ereko ma'e pe.

A'e rupi amuàgy'ygatu a'e ma'e henataromo ihe.

14 Aze mo namukatu iwer mo a'e ma'e, ma'e mo azapo Tupàn herehe uzepykaw imume'u mehe.

— Màràzàwe tuwe erezapo a'e ma'e, aze i'i ihewe, ma'e a'e mo izupe.

15 Ta'e Tupàn heapo arer uzapo ihewe uma'ereko ma'e a'e wà no xe. Hemuiguwe kar a'e.

Umuikuwe kar ihewe uma'ereko ma'e a'e wà no.

16 Napytu'u pixik kwaw hemetarer 'ym ma'e wapytywà re ihe.

Namuzai'o pixik kar kwaw kuzà imen umàno ma'e kwer ihe wà, ma'e hereko 'ym mehe ihe wà.

17 Namai'u pixik kwaw ihe zutyka'i.

Tuweharupi amono heremi'u tu 'ym ma'e wanupe no.

18 Areko wanu ài ihe wà.

Tuweharupi apyro kuzà imen umàno ma'e kwer ikatu 'ymaw wi ihe wà no.

19 Aze amo umàno etea'i tuwixàgaw wi ukamir 'ym pà,

Aze amo hemetarer 'ym ma'e nuwereko kwaw uzewànaw,

20 Amono kamir purumuaku katu ma'e izupe,

Hereimaw àràpuhàràn wanawer kamir romo iapo pyrer amono izupe.

Ipyhyk ire umume'u tuwe hekatu haw.

21 Aze amo 'ar mehe tàmuz upetek kar amo tu 'ym ma'e ihewe wà,

Aze a'e rupi apetek,

22 Tuwe amo uzuhaw hezywa wà nehe,

Tuwe ozo'ok heaxi'i wi wà nehe.

23 Nazapo pixik kwaw agwer ma'e ihe.

Ta'e akyzeahy Tupàn izepyk àwàm wi ihe xe. Aze mo azapo agwer ma'e,

Napuner iwer mo henataromo heho àwàm rehe nehe.

24 Nazeruzar pixik kwaw or rehe.

Heremetarer nuiko pixik kwaw hepyro har romo.

25 Heremetarer katu kwehe mehe ihe. Nezewe rehe we naiko wera'u kwaw amo wanuwi.

— Temetarer imono'ogaw akwaw katu wera'u pewi ihe, na'e kwaw amo wanupe.

26 Aexak kwarahy ihyape mehe.

Aexak zahy upuràg eteahy haw rehe iata mehe no.

27 Nezewe rehe we ni kwarahy namuwete pixik kwaw hezar romo ihe. Ni zahy namuwete pixik kwaw hezar romo. Nazeàmim pixik kwaw wamuwete pà.

Namomor kwaw hezurupyter haw wanupe hepo pupe wamuwete pà.

28 Aze mo azapo a'e iaiw ma'e,

Apytu'u mo Tupàn ywate har heruzar ire.

Tàmuz uzepyk mo herehe wà.

29 Naherurywete pixik kwaw heàmàtyry'ymar ma'erahy ipuraraw mehe ihe.

Iaiw haw wanupe ihem mehe naherurywete kwaw.

30 — Ezuka a'e heàmàtyry'ymar nehe,

Na'e pixik kwaw Tupàn pe.

31 Hereminozgwer umai'u katu heràpuz me wiko mehe wà.

Ihewe uma'ereko ma'e ukwaw wamai'u katu haw wà.

32 Namuger kar pixik kwaw amo ae ywy wi ur ma'e kwer nahu rupi ihe wà.

Wata ma'e uker heràpuz me tuweharupi wà.

33 Nazeagaw pixik kwaw hekatu 'ymaw imim pà amo teko wazàwe ihe.

Nazumim kwaw ikatu 'ym ma'e heremiapo kwer hepy'a pupe.

34 Nakyze pixik kwaw amo wanemimume'u wi.

Napyta kwaw heràpuz pupe heze'eg 'ym pà.

Nakyze kwaw herehe wapuka haw wi.

35 Aze mo amo herenu, ikatu mo ihewe.

Amumaw putar hekatu haw imume'u haw xe ihe nehe kury.

Tuwe Tupàn upuner wera'u ma'e uwazar heze'eg ihewe nehe.

Tuwe hekatu 'ymaw imume'u har umuapyk uze'eg pape rehe nehe kury.

36 Na'e araha putar a'e pape heaxi'i rehe nehe.

Amunehew putar heàkàg rehe tuwihawete iàkàg rehe har ài nehe.

37 Amume'u putar heremiapo kwer paw rupi Tupàn henataromo nehe.

Azurupu'àm putar henataromo nehe.

38 Heywy nuzai'o pixik kwaw.

Nuhapukaz pixik kwaw ywak rehe hekatu 'ymaw imume'u pà wà.

39 A'u wanemimuezuzgwer i'a kwer ihe.

Nezewe rehe we amono temetarer uma'ereko ma'e wanupe wama'ereko awer hekuzaromo.

Namumàno kar pixik kwaw wama'uhez haw rehe wà.

40 Aze heremu'em teko,

Tuwe xu hezuz heywy rehe arozràn hekuzaromo nehe.

Tuwe hezuz ka'akyr xewar hekuzaromo nehe.