ERIU UZE'EG A'E KURY
32
32–37
1 Izo ukwaw weko haw a'e. — Naiko kwaw ikatu 'ym ma'e iapo har romo ihe, i'i uzeupe. A'e rupi imyrypar upytu'u ikatu 'ymaw imume'u re izupe wà kury. 2 Amo awa Eriu her ma'e wiko a'e pe. Marakew ta'yr romo Muz izuapyr romo Hàw izuapyr romo hekon a'e. Eriu wikwahy Izo pe kury. Ta'e Izo umume'u ukatu haw a'e pe har wanupe a'e xe. — Nazapo kwaw ikatu 'ym ma'e ihe, i'i wiwi a'e pe har wanupe. — Tupàn upuraraw kar e ma'erahy ihewe a'e, i'i wanupe. 3 Wikwahy a'e na'iruz imyrypar wanupe no. Ta'e nupuner kwaw Izo pe ize'eg iwazar haw rehe wà xe. — Tupàn ru'u uzawy aipo, i'i a'e pe har uzeupeupe wà. 4 Xo iahykaw rehe uze'eg Eriu kury. Ta'e amogwer itua'u wera'u izuwi wà xe. 5 Amogwer nukwaw kwaw ize'eg iwazar haw rehe Izo pe wà. A'e rupi wikwahy.
Uzypyrog Eriu uze'egaw rehe pitài haw rupi
32–33
Tupàn Ikàg Wera'u Ma'e ukwaw kar tuwe ma'e teko wanupe
6 A'e rupi uzypyrog uze'eg pà kury. — Aiko kwàkwàmo romo ihe. Peiko tua'u ma'e romo.
Azeruze'eg penehe ihe. A'e rupi naze'eg kwaw.
7 Nezewe a'e hezeupe. — Tuwe tua'u ma'e ràgypy uze'eg wà nehe.
Wereko kwarahy tetea'u wà. A'e rupi ukwaw katu ma'e wà. Tuwe wexak kar wemigwaw purupe nehe, a'e hezeupe.
8 Heta amo hekwe teko wapy'a pupe.
Tupàn upuner wera'u ma'e upy teko wapupe ma'e kwaw katu haw imono pà wanupe.
9 Tua'u wera'u ma'e nukwaw wera'u kwaw ma'e kwàkwàmo wanuwi wà.
Màràmàrànaw uzawy wà, ikatu ma'e iapo àwàm ikwaw 'ym pà wà.
10 A'e rupi pezeapyaka katu heze'eg rehe nehe kury.
Ihe amume'u putar hema'enukwaw paw ihe nehe no.
Xo Tupàn zo uwazar putar Izo ize'eg izupe nehe
11 Peze'eg mehe we naze'eg kwaw ihe.
Aenu katu pema'enukwaw paw. Pekar ze'eg ikatu wera'u ma'e peze'eg mehe.
12 Azekaiw katu a'e peze'eg rehe ihe.
Izo nuzeruzar kwaw peze'eg rehe.
Napewazar kwaw ize'eg izupe.
13 — Uruexak ma'e kwaw katu haw ure, peze peiko. Màràzàwe tuwe pepuner nezewe haw imume'u haw rehe.
Teko nupuner kwaw Izo ize'eg iwazar haw rehe wà. Xo Tupàn zo upuner.
14 Aze mo aze'eg izupe, namume'u iwer mo ze'eg peze'eg zàwenugar ihe. Naze'eg kwaw izupe.
Ta'e Izo uze'eg iko peme a'e xe. Nuze'eg kwaw ihewe.
— Hepurumume'u wer hema'enukwaw paw rehe ihe kury, i'i Eriu
15 Izo, 'aw na'iruz nemyrypar wiko heityk pyrer romo wà kury.
Naheta kwaw waze'eg wanupe kury. Nupuner kwaw uze'eg wiwi haw rehe newe nehe kury.
16 Upytu'u uze'eg ire wà kury. Nuze'eg wi kwaw wà nehe.
Waze'eg 'ym mehe, aipo àro putar aha teko nehe.
17 Nan. Awazar putar neze'eg newe nehe kury.
Amume'u putar a'e ma'e rehe hema'enukwaw paw nehe kury.
18 Heta tetea'u heremimume'u ràm.
A'e rupi napuner kwaw heze'eg 'ymaw rehe kury.
19 Aze naze'eg kwaw nehe, Apok putar nehe.
Win ipyahu omopok uwyru a'e. Nezewegatete apok putar ihe nehe no.
20 Napuner kwaw heze'eg 'ymaw rehe. Heze'eg wer kury.
Amume'u putar hema'enukwaw paw nehe.
21 Naze'eg kwaw peze'eg awer rehe nehe.
Namume'u kwaw peze'eg awer ikatu haw nehe.
22 Namume'u e kwaw teko wakatu haw wanupe ihe.
Aze mo azapo nezewe haw, zaneapo arer uzepyk mo herehe.