36
Teko wakatu 'ymaw, Tupàn ikatu haw
Zegar haw Tawi hemiapo kwer
Ikatu 'ymaw nuzuawy kwaw
Uze'eg ma'e iaiw ma'e ipy'a pe a'e.
Iaiw ma'e nuzemu'e kwaw Tupàn wi ukyze haw rehe.
— Aiko wera'u amo wanuwi ihe, i'i uzeupe.
— Tupàn nuexak kwaw heremiapo kwer ikatu 'ym ma'e a'e nehe.
Nuzepyk kwaw herehe nehe, i'i uzeupe.
Ize'egaw na'ikatu kwaw a'e. Tynehem temu'emaw pupe.
Nukwaw katu kwaw ma'e a'e. Na'ipurapo wer kwaw ikatu ma'e rehe.
U'aw uker haw rehe iaiw ma'e wemiapo ràm rehe uma'enukwaw pà.
Pe ikatu 'ym ma'e rupi wata iko.
Nuweityk pixik kwaw ikatu 'ym ma'e.
 
O Tupàn Tuweharupi Wiko Ma'e, nepuruamutar katu haw uhem ywak rehe a'e.
Puruwi netyryk pixik 'ymaw oho ywàkun pe no.
Nekatu haw ikàg ywytyruhu ài.
Neze'eg typya'u yryhu ài.
O Tupàn Tuweharupi Wiko Ma'e, erezekaiw teko wanehe ne. Erezekaiw ma'ea'yr wanehe no.
Ikatuahy nepuruamutar haw.
Nepepo iwype uruexak urepyro haw.
Eremur temi'u tetea'u urewe ne. Ikatuahy a'e temi'u urewe.
Nekatu haw nuzawy kwaw yrykaw urewe.
Uremui'u kar pe a'e 'y pupe ne.
Ereiko ma'e paw wamuigo kar har romo.
Ereiko tatainy zàwenugar romo no, a'e rupi xixak tatainy zane.
 
10 O Tupàn, ezamutar katu wiwi nekwaw par ne wà nehe.
Ezapo wiwi ikatu ma'e teko nereruzar har wanupe nehe no.
11 Tuwe amogwer wanuwi wiko wera'u ma'e nuzypyrog kwaw herehe wà nehe. Tuwe ikatu 'ym ma'e nuzypyrog kwaw herehe wà nehe no.
Tuwe nahemuzàn kar kwaw wà nehe.
12 Pe pe wanekon u'ar ma'e kwer romo wà. Amo weityk wà.
Nupuner kwaw upu'àmaw rehe wà.