37
Ikatu 'ym ma'e wahykaw, ikatu ma'e wahykaw no
Zegar haw Tawi hemiapo kwer
Nema'enukwawahy zo ikatu 'ym ma'e wanehe nehe.
Ikatu 'ym ma'e iapo har wanehe nerewyrowyroahy zo nehe.
Ukàzym putar na'arewahy ka'a uxinig ma'e kwer ài wà nehe,
Ka'akyr umàno ma'e kwer ài wà nehe.
 
Ezeruzar Tupàn Tuweharupi Wiko Ma'e rehe ikatu ma'e iapo pà nehe.
Eiko katu tuwe ywy imume'u pyrer rehe nehe.
Tuwe nerurywete Tupàn Tuweharupi Wiko Ma'e inuromo nehe.
Umur putar neremimutar nepy'a pe har newe upaw rupi nehe.
 
Ezemonokatu nereko haw Tupàn Tuweharupi Wiko Ma'e ipo pe nehe.
Ezeruzar hehe nehe. Nepytywà putar nehe.
Neremu'em 'ymaw nehe, nemunar 'ymaw nehe no, umuigo kar putar tatainy ài nehe.
Umuhyape katu kar putar nekatu haw nehe, kwarahy wapyter pe hin mehe har ài nehe.
 
Aze amo wiko hemetarer katu ma'e romo wà nehe, eikwahy zo wanupe nehe.
Nerewyrowyroahy zo ikatu 'ym ma'e rehe ipurapo wer ma'e wanehe nehe, aze uzapo a'e ma'e wà nehe.
Eàrogatu uzeapo ma'e ràm nehe. Ta'e Tupàn Tuweharupi Wiko Ma'e uzepyk putar wanehe nehe.
 
Eikwahy zo nehe, nepuruzukaiw zo nehe.
Nerehaite zo nehe, ta'e nereko haw iaiw putar newe nehe xe.
Tupàn Tuweharupi Wiko Ma'e rehe uzeruzar ma'e
Wiko katu putar ywy imume'u pyrer rehe wà nehe.
Ikatu 'ym ma'e uzemumaw putar wà nehe.
 
10 Nan kwehe tete teko ikatu 'ym ma'e ukàzym putar wà nehe.
Erekar putar eho nehe wà nehe. Nerexak kwaw wà nehe.
11 Amo wanuwi wiko wera'u 'ym ma'e wiko putar katu haw rehe wà nehe, ywy imume'u pyrer rehe wà nehe.
Hurywete putar wà nehe. Heta tetea'u putar ma'e wanupe nehe no. Wiko putar zeàmàtyry'ym 'ymaw rehe wà nehe.
 
12 Ikatu 'ym ma'e umume'u wemiapo ràm iaiw ma'e a'e wà, ikatu ma'e wanupe wemiapo ràm a'e wà.
Ume'e wanehe iakatuwawahy 'ym pà wà.
13 Zanezar upuka iko teko ikatu 'ym ma'e wanehe,
Ta'e ukwaw wa'ar ihem etea'i haw a'e xe.
14 Ikatu 'ym ma'e wenuhem utakihepuku wà. Umuapar uwyrapar wà no.
Ipuruzuka wer zepe hemetarer 'ym ma'e wanehe wà, ma'e hereko 'ymar wanehe wà no.
Ipurumumaw wer hemu'em 'ym ma'e wanehe imunar 'ym ma'e wanehe wà no.
15 Ipuruzuka wer zepe wanehe wà. Amo uzuka putar a'e ikatu 'ym ma'e a'e wà nehe, watakihepuku pupe a'e wà nehe.
Uwyrapar uzuhaw putar wà nehe no.
 
16 Aze amo nuwereko kwaw ma'e tetea'u a'e, aze wiko ikatu ma'e romo a'e,
Hereko haw ikatu wera'u hemetarer katu ma'e heko haw wi a'e, aze hemetarer katu ma'e wiko ikatu 'ym ma'e romo a'e.
17 Ikatu 'ym ma'e wakàgaw upaw putar nehe.
Tupàn Tuweharupi Wiko Ma'e umunyryk kar ikatu ma'e ikatu 'ymaw wi wà nehe.
 
18 Tupàn Tuweharupi Wiko Ma'e uzekaiw ikatu ma'e wanehe tuweharupi a'e.
Ywy imume'u pyrer rehe wanekon putar awyzeharupi wà nehe.
19 Kwarahy ikatu 'ym ma'e mehe nupuraraw kwaw ma'erahy wà nehe.
Heta putar wanemi'u ràm wanupe ma'uhez taw uhua'u ma'e mehe nehe.
 
20 Ikatu 'ym ma'e umàno putar wà nehe.
Tupàn Tuweharupi Wiko Ma'e iàmàtyry'ymar ukàzym putar ma'eputyr ka'a pe har ài wà nehe.
Tàtàxiner ài ukàzym putar wà nehe.
 
21 Ikatu 'ym ma'e wenoz temetarer imekuzar pyr a'e wà. Numuzewyr kwaw izar pe wà.
Ikatu ma'e hurywete ma'e imono mehe amo pe wà.
22 Tupàn omono uze'egatu amo teko wanehe.
A'e teko wiko putar katu haw rehe ywy imume'u pyrer rehe wà nehe.
Omono uze'egaiw amo wanehe. Umumaw putar a'e teko wà nehe.
 
23 Tupàn Tuweharupi Wiko Ma'e umuata katu kar teko pe ikatu ma'e rupi wà.
Aze teko ikatu izupe wà nehe, Tupàn omonokatu putar a'e teko a'e wà nehe.
24 Aze u'ar wà nehe, nupyta kwaw ywy rehe wà nehe,
Ta'e Tupàn upytywà putar a'e wà nehe xe, wamupu'àm kar pà a'e wà nehe xe.
 
25 Kwehe mehe aiko kwàkwàmo romo ihe. Hetua'uhez tuwe ihe kury.
Nezewe rehe we naexak pixik kwaw awa ikatu ma'e Tupàn hemityk kwer ihe.
Naexak pixik kwaw ta'yr temi'u henoz mehe nahu rupi ihe wà.
26 Amo pe ma'e imono e haw ikatu izupe. Temetarer imono haw ikatu izupe no.
Ta'yr umurywete kar u wà no.
 
27 Etyryk katu 'ymaw wi nehe. Xo ikatu ma'e zo ezapo nehe.
Nezewe mehe ereiko putar ywy imume'u pyrer rehe tuweharupi nehe.
28 Ta'e Tupàn Tuweharupi Wiko Ma'e uzamutar katu katu haw a'e xe. Uzamutar katu iawy har 'ym no.
Nutyryk kwaw wemiruze'eg uzeruzar katu ma'e wanuwi.
Uzekaiw katu wemiaihu wanehe.
Umumaw putar ikatu 'ym ma'e wazuapyapyr wà nehe.
29 Teko ikatu ma'e wereko putar ywy imume'u pyrer wà nehe.
Tuweharupi hehe wanekon putar wà nehe.
 
30 Umume'u ma'e ma'e kwaw katu har ài wà. Tuweharupi uze'eg ikatu ma'e rehe wà no.
Uze'eg ikatuahy ma'e rehe wà.
31 Omonokatu uzar Tupàn ze'eg upy'a pe wà.
Nutyryk pixik kwaw ize'eg wi wà.
 
32 Ikatu 'ym ma'e ume'e ikatu ma'e wanehe wà.
Uzeagaw wazuka haw rehe wà.
33 Nezewe rehe we Tupàn Tuweharupi Wiko Ma'e nomono kwaw ikatu ma'e a'e wà nehe, ikatu 'ym ma'e wapo pe a'e wà nehe.
Aze tuwihaw umume'u kar ikatu ma'e wanemiapo kwer wà nehe,
Tupàn numuzepyk kar kwaw tuwihaw wà nehe, a'e ikatu ma'e wanehe wà nehe.
 
34 Pezeruzar Tupàn Tuweharupi Wiko Ma'e rehe nehe.
Peruzar ize'eg nehe no.
Umur putar ywy imume'u pyrer peme a'e nehe. Nezewe mehe peiko putar ikàg ma'e ikwaw pyr romo nehe.
Tupàn umumaw putar ikatu 'ym ma'e a'e wà nehe. Pexak putar wamumaw mehe pe wà nehe.
 
35 Aexak amo awa iaiw ma'e purupe ma'erahy ipuraraw par ihe.
Ikàg wera'u teko paw wanuwi a'e. Nuzawy kwaw ywyràkàxigyw Irimano ywytyr rehe har a'e.
36 Amo 'ar mehe akwaw huwake ihe. Naexak kwaw, ta'e ukàzym a'e xe.
Aekar zepe ihe. Naexak kwaw.
 
37 Eme'egatu ikatu ma'e wanehe nehe. Eme'e imunar 'ym ma'e hemu'em 'ym ma'e wanehe nehe.
Heta wazuapyapyr zeàmàtyry'ym 'ymaw iamutar har wanupe wà. Erexak putar waneta haw nehe.
38 Teko Tupàn ze'eg heruzar 'ymar wà nehe,
Uzemumaw kar putar paw rupi wà nehe.
Wazuapyapyr ukàzym putar wà nehe no.
 
39 Tupàn Tuweharupi Wiko Ma'e upyro ikatu ma'e ikatu 'ymaw wi wà.
Uzekaiw katu wanehe ma'erahy ipuraraw mehe.
40 Tupàn Tuweharupi Wiko Ma'e upytywà wà, wapyro pà wà.
— Uremunyryk kar pe ikatu 'ymaw wi nehe, i'i izupe wà.
A'e rupi upyro ikatu 'ym ma'e wanuwi wà.