6 Ga ŋunhi maṉḏa gana nhinananydja ŋunhiliyi wäŋaŋura Bethlehem, bala nhanukalaŋawa yothuwa walu gilitjinana dhawal-guyaŋanharawnha. 7 Bala nhanukuŋu ŋunhi Marywuŋunydja yothu maḻamarr dhawal-guyaŋanana ḏirramu, ga ŋayi ŋanya Marynydja garrpira girriy'nha, bala yorrkuŋalana ŋanya mulmupuylili bathilili, ŋunhi gana ŋatha malanha ŋorrana warrakan'ku malaŋuwa ŋunhiliyi. Ga ŋunhinydja buṉbu ŋunhi yolŋu walala gana ŋorra'ŋurrana, ŋunhiliyinydja buṉbuŋura dhaŋaŋdhina ŋäthili yana, ga bäyŋuthinana ŋunhi maṉḏaŋgunydja dhaḻakarr ŋorranharawanydja, bala ŋanya ŋayi Marynydja yorrkuŋalana yothunhanydja mulmupuylili bathilili.

8 Ga ŋunhili bili yana waŋganyŋura wäŋaŋura, yurru ḏiltjiŋura, warrakan'-djägamirri mala gana djäga walalaŋguwuy walala bimbiwa malaŋuwa. Ga ŋuruŋiyi bili munhay, 9 Godku dhäwu-gänhamirrinydja yolŋu maḻŋ'thurruna walalaŋgala ŋunhiliyi warrakan'-djägamirriwala malaŋuwala, ga baḏayalayny'tja walalanha ŋunhi Godkalanydja ḻiw'maraŋalana djeŋarra'mirriyaŋalana, ga barrarinana walala ŋunhi mirithina yana dhika.

10 Ga ŋayinydja ŋunhi Godku dhäwu-gänhamirrinydja yolŋu waŋana walalaŋgu bitjarrana, “Yaka walala barrari. Ŋarranydja dhuwala marrtjina räli gäŋala mirithirri manymak dhäwu nhumalaŋgu, ga dhiyaŋiyina dhu ŋunhi dhäwuyny'tja galŋa-djulŋithinyamaramanydja yolŋunhanydja walalanha bukmaknhana yana. 11 Bili dhiyaŋunydja bala munhay gäthura nhumalaŋgu Walŋakunhamirrinydja bilina dhawal-guyaŋanana ŋunha Davidkala wäŋaŋura, yurru ŋayi ŋunhi Garray, Maŋutji-dhunupayanhawuynha Godkuŋu. 12 Ga dhuwalatjanna nhuma ŋanya dhu ŋunhi dharaŋandja, maḻŋ'maramanydja nhuma dhu ŋanya ŋunhiyi yothunhanydja garrpinawuynha girri'mirrina, ga ŋorra ŋayi ga ŋunha mulmupuyŋura bathiŋura.”