1 Ga ŋunhi Jewwa Nhinanhamirri Walu nhakuna dhawarꞌyurruna ŋunhili yuṯuŋgurr-munhamirriy. Ga beŋurudhi bala walala Mary Magdalene ga Salome ga Mary ŋunhi Jamesku ŋäṉḏiꞌmirriŋu marrtjina buŋgan bäwgu wuŋuḻiꞌyunarawa marr ga walala dhu goŋ-ŋamathirri ga rarryun buŋgan bäw nhanukala rumballili. 2 Ga Sunday marrtjina djaḏawꞌyurruna, bala ŋunhi miyalkkurruwurrunydja marrtjinana baladhina mathirralilina. 3-4 Ga ŋunhi walala marrtjina wäŋgaŋalanydja dhukarr-ŋupanmina, bala walala waŋanhaminana, “Yolthu limurruŋgu dhu ŋunha guṉḏanydja giṯmarama? Yindi mirithirri ŋunhi.” Ga ŋunhi walala bunananydja ŋunhilidhi bala walala nhäŋalana guṉḏanydja, dhärrana gana galililina.

5 Ga ŋunhi walala gulŋiyinanydja mathirralilinydja bala nhäŋalana ḏirramunha girriꞌ watharrmirri, nhinana gana. Ga mirithina walala ŋunhi ganyimꞌthurruna. 6 Ga bitjarra ŋayi waŋana, “Yaka walala barrari. Dhuwalanydja nhuma ga Djesuwa rumbalgu ḻarruma wäŋa Nazarethpuygu ŋunhi walala ŋanya bumara rakunyguŋula dhiŋganhamaraŋala. Bilina ŋanya ŋunhi Godthu walŋakuŋalana dhiŋganhaŋuru, bäyŋuna ŋayi dhuwala. Nhäŋuna walala, dhuwalinydja dharapulnha ŋunhi walala märrkitjkuŋala ŋanya rumbal. 7 Maꞌ roŋiyina nhuma balathi ga ḻakaraŋuna nhanukalaŋawala malthunamirriwala walalaŋgala marr ga walala dhu buna ŋunhala Galileelili. Ga biyaku ḻakaraŋu ŋunha ŋayi ga marrtji ŋäthili, ga ŋunhalana nhuma dhu nhanŋu bunanydja, ga ŋunhalana nhuma dhu ŋanya nhämanydja. Ga ḻakara yana Peterwala. Yo, bili muka ŋayi ŋunhi Djesuy ŋäthili yana walalaŋgu bitjarra ḻakaraŋala,” bitjarra ŋayi ḏirramunydja waŋana.✡16:7:Matthew 26:32; Mark 14:28

8 Ga nhäŋalanydja walala ŋunhi miyalkkurruwurruy dharapultja bala yäna mukthurrunana dhawaṯthurruna mathirraŋurunydja, bala marrmarryurrunana marrtji barrariŋu nhanŋuwuy yäna waṉḏinana. Ga bäyŋuna walala ŋunhi ŋula yolku yolŋuwa dhäwunydja lakaranha dhukarrŋura bili walala ŋunhi mirithina barrarina ga dhumbal'yurruna gana.