94
Nhanderuete ha'evea rami oikuaa pota aguã re ojerurea ague
1 Ndee Senhor Oreruete ma nhombopaga va'e reiko.
Oreruete nhombopaga va'e, exa uka nerexakãa!
2 Epu'ã ke yvy regua ha'e javi remboayvu aguã.
Embopaga ojejou porã rei va'e kuery.
3 Raka'e peve 'rã nda'u heko vai va'e kuery ovy'a rei?
Senhor, raka'e peve 'rã nda'u ha'e ramigua oiko?
4 Ha'e kuery ma nhombojaru ha'e nhomotare'ỹ reia rupi ijayvu.
Teko vai rupi ikuai va'e ojejou porã reia rupi rive 'rã ijayvu.
5 Senhor, ha'e kuery omou'ũmba ndevygua kuery,
ojavyky rei 'rã ndevygua ikuai va'e.
6 Ojuka 'rã imeve'ỹ va'e ha'e mombyry guigua,
tyre'ỹ kuery voi omomba 'rã.
7 Ha'e vy aipoe'i 'rã: “ Senhor ndoexai oiny.
Ha'e nunga re Jacó Ruete ndoikuaa potai 'rã”, he'i okuapy.
8 Xeretarã kuery peikuaa axy va'e, peikuaa pota!
Pene'arandu e'ỹ va'e, raka'e nda'u pemoĩ 'rã pene'arandurã?
9 Apyxa apoare nda'u noendui 'rã ri pejapo va'e?
Texa apoare nda'u ndoexai 'rã ri?
10 Yvy regua kuery pe ijayvu va'e nda'u nanhombopagai 'rã?
Avakue mo'arandua re nda'u noĩ 'rã 'arandua?
11 Senhor oikuaa ae ma avakue onhembopy'aa,
oikuaa ha'e kuery onhembopy'aa mba'everã ndovareia.*1 Coríntios 3.19-20
12 Senhor, ovy'a ete 'rã avakue remo'arandu va'e,
ndeguigua lei rupi rembo'e va'e.
13 Ha'e va'e kuery re ojexavaia ára ou teĩ remombytu'u 'rã,
yvykua heko vai va'e kuery mbo'aarã rejapo peve.
14 Mba'eta Senhor ndoejai 'rã ojeupegua kuery,
noipytyvõ e'ỹi 'rã ixupe ikuai va'e.*Romanos 11.1-2
15 Ha'e rami rã teko porã ojekuaa nho 'rã nhomboayvuaty py.
Ha'e va'e rupi anho 'rã ikuai anhetẽ rupi ipy'a va'e.
16 Mava'e nda'u heko vai va'e re opu'ã 'rã xerepyarã?
Mava'e nda'u onhemoĩ 'rã xea katy mba'emo vai apoa jokoarã?
17 Senhor naxepytyvõi va'e rire
xenhe'ẽ oo ma 'rãgue okyrirĩ va'e anho ikuaia katy.
18 Ha'e rami 'rãgue py “Xepyxyry ta ma”, ha'e nhavõ
ndee xejoko 'rã xerayvua rupi.
19 Xepy'a eta reia aendu ramo
ndee xembopy'a porã ha'e xembovy'a ju.
20 Ndereve nda'u onhemoirũ 'rã ri teko vai rupi joe opena va'e,
lei oĩa rami merami joguereko teĩ joapo vai va'e?
21 Mba'eta ha'e kuery ma nhomoirũ 'rã heko porã va'e rekove rovai,
ijayvu 'rã okuapy heko porã va'e ojuka aguã re.
22 Ha'e rã xevy pe ma Senhor oo ikorapa va'e oĩ,
Xeruete ma itaova anhemiaty.
23 Ha'e kuery ma ombopaga 'rã heko vaiague re,
teko vai rupi ikuaiague re omokanhymba 'rã.
Senhor Nhanderuete ae 'rã omomba.