95
Senhor pe japoraei aguã regua
1 Peju ke, japoraei Senhor pe!
Jarovy'a nhande'itaova nhandereraa jepea!
2 Jarovy'aa rupi jaa oĩa py,
jaroporaei ipo'akaa jarovy'a vy.
3 Mba'eta Senhor ma Nhanderuete Yvate ete va'e,
Huvixave ipo'akapa va'e oiko tuuete ikuai va'e áryve.
4 Ipo py oĩ yvy guýry vegua,
yvyty yvatevea voi ixupegua meme.
5 Ye'ẽ avi ixupegua oĩ, ha'e ae ojapo rire,
yvy voi opo py ojapo va'ekue itui.
6 Peju ke, nhanderova yvy re nhamovaẽ nhamboete vy,
nhanerenapy'ã re nhaĩ Senhor nhanemoingoare renonde.
7 Mba'eta ha'e ma Nhanderuete.
Ha'e rã nhande ma hymba kuery vexa'i nhandekuai,
ikora rupi opo py openaa va'e.
Aỹ voi ijayvua pendu vy
8 peneakã ratã eme, Meribá py guare rami e'ỹ,
Massá tekoa e'ỹa py guare rami e'ỹ.
9 Mba'eta ha'e py ma peneramoĩ kuery xereko a'ã vy
xembopoxya rupi ikuai va'ekue,
opa mba'e porã ajapo rã oexa rire teĩ.
10 Quarenta ma'etỹ re ajou vai ha'e kuery ikuaia.
Ha'e rami vy “Ha'e kuery ma opy'a py ojerovia e'ỹ va'e!
Ndoikuaai ae xeguigua tape!” ha'e va'ekue.
11 Ha'e nunga rupi xepoxya rupi aura:
“Ha'e kuery ndoikei 'rãe opytu'u aguã ame'ẽ va'e py.”*Hebreus 3.7–4.11; Êxodo 17.1-7; Números 13.25–14.23