1 Mah! Ngurrimanjbu nawu Yawey, dja ngurringeykayhmen. Ngurrimulewa bu ngurrbenbengdayhke birriwarlahkenh bininj rowk kore nungka kurdukurduyimi. 2 Ngurrimarnewayinin dja ngurriburluburlumen. Ngurriyolyolmerren kore ngurrikurdunang kore kunmakmak nungka kurdukurduyimi rowk. 3 Ngurringeyburlumen nuye kunngey, nungka nawu ngeymakkaykenh duninjh. Ngudda bininj nawu ngurriyawayawan nawu Yawey, wanjh ngurrikangemarrmarr duninjh! 4 Ngurridjaldjarenin bu ngurrikebnan nawu Yawey, nawu narrulkarrekimuk duninjh. Ngurridjalyawa nuye kukeb bu munguyh munguyh. 5-6 Kab ngudda nawu Abraham ngunkebmawahmeng, nahni nawu bimarnedurrkmirri Yawey, dja mak ngudda nawu Jacob nuye bebeywurd rowk, nawu Yawey ngundjarrngbom, wanjh ngurribengka rowk bu nungka kurdukurduyimi kundulkarre dorrengh nuye kore ngurrikangebarrhmeng, dja mak ngurriburrbu kore mankarre kanwong bu kandjadmekenh.

7 Nawu Yawey nakka God kadberre! Nungka kandjadme ngad karriwarlahkenh bininj rowk karrihni kondah kurorre. 8 Nungka rayekwong kunwok nuye bu wokkurrmerrinj kadberre, dja kadjalburrbun munguyh munguyh. Nungka wokrayekwong kunwok nuye ba kawokbimbuyindi bedberre bininj nuye dja minj munguyh kawokyakmen. 9 Nungka wokrayekwong dja wokkurrmerrinj biberrebbom nawu Abraham, dja yerreh wokkurrmerrinj nawu Isaac warridj.Genesis 12:7; 17:8; 26:3 10 Dja mak mulewarrinj bu yawoyhwokrayekworrinj nuye nawu Jacob, dja mak yolyolmerrinj bu bimarneyimeng nawu Israel dorrengh. Benmarneyimeng bu nuye kunwok wokkurrmerrinj wanjh kadjaldi munguyh munguyh. 11 Kuhni yimeng bu wokkurrmerrinj dja kawokbimbuyindi bu kayime, “Ngaye wanjh bolkwon ngudberre kunbolk Canaan, dja ngurribolkkarrme ngudberre munguyh munguyh.”Genesis 28:13

12 Nahni nawu nuye bininj wanjh kerrngehkenhni birrimirndeyahwurd, dja minj birribangmebolkkarrmeninj kunmekbe kunbolk Canaan. Birridjalrengehrey kumekbe. 13 Bedda birridjalrengehrey kubolkbubuyika kumekbe kore birriwern kings birribebbehbolkwohrnani. 14 Wanjh Yawey minj benbawoyi birribuyika bininj bu bindibongkarrmeninj, dja bendabkeng. Nungka Yawey bendungi kings nawu bindinani nuye bininj, yimeng, 15 “Yuwn yibenkilekme bininj nawu ngaye ngabendjarrngbom bu ngandimarnedurrkmirri, dja yuwn bu mak yibenwarrewon birrimekbe nawu prophets ngardduk!”

16 Kaluk Yawey bolkwarrewong Canaan ba bu mandjewk ngurdmeng, dja wanjh manme yakayakminj rowk. Nungka bularrbom manme bedberre.Genesis 20:3-7; 41:53-57 17 Kunmekbe wanjh bimunkeweng nakudji bininj bu yingkihdokmeng bedberre kore Egypt. Namekbe bininj ngeyyoy Joseph, dja nawu birridangerrinj birriweykang dja birribuyika bininj birribongkarrmi ba benmarnedurrkmirri.Genesis 37:28; 45:5 18 Bedda wanjh birridengedukkang Joseph wirlmurrng dorrengh dja wanjh dengemokminj. Dja mak birrikomdukkang nuye wirlmurrng dorrengh. 19 Kaluk Joseph yingkihyolyolmi kore yerre kurduyimerranj, dja bu kunmekbe bolkyimi, wanjh Yawey nuye kunwok wanjh woybukkendanj.Genesis 39:20—40:23 20 Wanjh king nawu bolkwohrnani kore Egypt bibebkeng nawu Joseph. Nahni king wanjh nakimuk duninjh kore birriwarlahkenh bininj.Genesis 41:14 21 Dja bikurrmeng Joseph bu bimarnedurrkmirri dja mak bu wohrnawohrnani manwern nawu king nuye.Genesis 41:39-41 22 Dja mak biwong Joseph bu kabenbukkankenh rowk nawu bebeywurd nuye king, dja mak nawu birrikihkimuk bininj nuye ba bu birrimayaliwernminj.

23 Kaluk God nuye bininj birringimeng kore kubolkkimuk Egypt, wanjh Jacob dja nawu namud nuye birriwam birrihni kore kunred bolkngeyyoy Ham*Kunbolk Ham kunngeybuyika ngarre kunbolk Egypt., dja minj bedberreniwirrinj kunred.Genesis 46:6; 47:11 24 Dja Yawey benmarnbom nuye bininj ba bu birriwernmerrinj duninjh, dja bindiyurrhkeng nawu birriyidko bedberre. 25 Wanjh Yawey benkangemarnbom birrimekbe nawu birriyidkoni bu bindiwirrihmeng bininj nawu birrimarnedurrkmirri nuye, dja bedda wanjh birrikarremarnburrinj bu bindibuyi.Exodus 1:7-14

26 Wanjh kunmekbe Yawey benbenemunkeweng Moses, nawu bimarnedurrkmirri, dja mak Aaron, nawu bidjarrngbom.Exodus 3:1—4:17 27 Kaluk Moses dja Aaron benekurduyimi God nuye kundulkarre dorrengh kore Egypt. Bindibukkabukkang God nuye kundulkarre kumekbe kore kunbolk Ham. 28 Bininj nawu birrikang Egypt birridjalwokburriweng Yawey kore benwokrayekwong, wanjh nungka marnbom bedberre kunbolk bu bolkkakmunun yimerranj. Exodus 10:21-23 29 Kaluk bomarnbom kukku rowk bedberre bu yimerranj kunkurlba. Wanjh djenj nawern bedberre mirndedoweng.Exodus 7:17-21 30 Dja mak kordbolbok wernhmirndewernmerrinj kore bedberre kunbolk. Kordbolbok mirndengimeng kururrk kore bininj nawu birrikihkimuk keyyoy.Exodus 8:1-6 31 Nawu Yawey wokdanginj, dja wanjh bod warridj wernhmirndewernmerrinj, dja mak mayh kilehkilelk warridj warlahminj kore kunbolk rowk bedberre.Exodus 8:16-17,20-24 32-33 Dja nawu Yawey marnbom mandjewk bedberre bu wernhbonjdjekmeng dja rayekminj bu mankurrk nakihkimuk yimerranj, dja warrhwarrhmeni benbom bedberre manrakel dja kundulk manbu karrmi mandjoleng. Namarrkon warridj dulkbakkabakkeng kundulk rowk kore kunbolk bedberre.Exodus 9:22-25 34 Wanjh nawu Yawey yawoyhwokdanginj, dja nawu djeddedde birrimirndewern duninjh birribebmeng, dja minj nangale bininj mirnderohrokmeninj dja kundjalwern duninjh. 35 Djeddedde birringuni mankolhde rowk manme kore kubolk bedberre. Manme nawu dulkdi kore kabbal rowk, wanjh djeddedde djal yakwong rowk.Exodus 10:12-15 36 Kaluk Yawey benbom nawu nawehwernwarre rowk kore namudbubuyika bedberre kore Egypt. Bedda nawu bininj birrikang Egypt bu nadjdjamanbubuyika bindibebbehbornang.Exodus 12:29

37 Wanjh nawu Yawey kuhni kurduyimeng wanjh benbebkeng bininj nawu Israel benkebmawahmeng kore Egpytbeh. Birringorrkani manwern nawu silver dja gold. Bedda wanjh birringudjbangni rowk, dja minj birridoweni. 38 Bininj nawu Egpyt birrikang wanjh bindikengemeng, dja bu bindinang birribolkbawong birriwam, wanjh bedda warridj birrinjilngmakminj.Exodus 12:33-36

39 Wanjh Yawey benmarnekurrmeng kunngol bu benbarrkbom, dja mak kunak benwong bu kunkakwern benmarnebolkwolkang bedberre.Exodus 13:21-22 40 Nawu Israel benkebmawahmeng birridjawam nungka, dja wanjh benmarnekang mayhmayh yiman djirndi, dja benwong buriddi manbu heavenbeh bu benworrkmiwong.Exodus 16:2-15 41 Nungka mak warddemarrhmey dja kukku manbowern bobebmeng, yiman kayime mankabo duninjh borlobmi kumekbe kore kubolkdarleh.Exodus 17:1-7; Numbers 20:2-13 42 Yawey burrbuburrbuni bu kunkare kore nungka yingkihwokkurrmerrinj kunwok kundjamun nuye Abraham nawu bimarnedurrkmirri.

43 Wanjh kuhni rowk Yawey kurduyimeng bu benbebkeng nuye binihbininj nawu birribebmeng birrimarrmarrni dorrengh. Nahni nawu nungka bendjarrngbom, wanjh benbebkeng dja wanjh birriwayini kunnjilngmak dorrengh! 44 Dja mak benwong kunbolkbubuyika bedberre nawu birridjenbubuyika bininj. Wanjh nawu Israel benkebmawahmeng birridjalmey manbu birribuyika bininj birriyingkihmarnbuni.Joshua 11:16-23

45 Kuhni rowk nawu Yawey kurduyimeng bedberre ba bu bedda kabirriwokmang kore nungka benwokwong, dja kore nungka benwong mankarre nuye.

Mah, wanjh Hallelu Yah!