8 Nawu KAWOHRNAN bimarneyimeng Eleydja.

9 “Ngayi ngamarneyimeng ngalkodjmong kure kunred Djarabad yingimen kure Djeydon ba ngunwon manme. Ngudda yiray kure kubolkkimuk, kumekke yini.”

10 Wanjh Eleydja kamwam darnkih kure kubolkkimuk kurrukdangmaye kure Djarabad. Nungka binang ngalbu ngalkodjmong menehme manyahyay nungka bidjawam “kamak ngudda yimka ngarduk kunronj.”

11 Ngaleng wam bomey kunronj mak biyawoyhdjawam, “kamak ngudda yimka ngardduk manyahwurd lodno.”

12 Ngalkodjmong biwokmey, “marneyimeng kure kungey nuye kahni nawu KAWOHRNAN nawernkimuk Kod. Ngayi minj ngakarrme manbu lodno ngayime woyhbukki. Ngayi ngakarrme manyahyey mane wanjh bolkkime ngare kured. Mak ngayi ngakarrme manyahwurd manduy mak manyahwurd kunkalkid. Ba ngakinje ngarrewoneng ngayi mak ngardduk nayawh yerre wanjh bu nganemarrwer dowenh.”

13-14 Eleydja yimeng, “Nawu KAWOHRNAN, Kod kure Israel bu kakurduyime kunmak kabukubukmen. Nguddangke ngahlanno manduy minj kayakmen nguddangke budjulung kunkalkid minj mak kayakmen. Bu wanjh yerre kamunkewe mandjewk. Yirrokmen kured ba ngudda yikinje bu yiyimeng. Yikinjemen manyahwurd manlod mak yimka kure ngayi. Wanjh yikinjemen ngurrewoneng. Wanjh bonj bu kamak rowk.”

15 Ngalekke ngalbu ngalkodjmong dokmeng kured marnbom rowk bu Eleydja bimarneyimeng. Ngalbu ngalkodjmong ngalenngarre nayawh mak Eleydja birrikarekarrmeng manme kunkuyeng bedberre.

16 Bu kunwok nuye nawu KAWOHRNAN bimarnewokdi Eleydja. Bu ngalengarre rowk ngalkodjmong ngahlanno manduy minj kayakmen dja budjulung kunkalkid minj mak kayakmen.